გამქრალი საკანალიზაციო კოლექტორი დიღომში - ტექნიკურ ბრიგადას კოლექტორი მიწიდან ამოღებული დახვდა

"ჯორჯიან უოთერ ენდ ფაუერის" ტექნიკურ ბრიგადას, დიდ დიღომში, ტარიელის ქუჩაზე 800 მმ-იანი საკალანალიზაციო რკინა-ბეტონის კოლექტორის 11-მეტრიანი მონაკვეთი დღეს მიწიდან ამოღებული დახვდა. კომპანიის ტექნიკური ბრიგადა აღნიშნულ ქუჩაზე გაურკვეველი ავარიული დაზიანების ლიკვიდაციის მიზნით მივიდა.

როგორც "ინტერპრესნიუსს" "ჯორჯიან უოთერ ენდ ფაუერიდან" აცნობეს, შესაძლო დაზიანების თაობაზე კომპანიის ცხელ ხაზს ტარიელის ქუჩის მაცხოვრებლებმა აცნობეს. მათი თქმით, საკანალიზაციო წყლები დიდ დიღომში მდებარე ტარიელის ქუჩაზე მიწიდან ამოდიოდა. ადგილზე მისულ ტექნიკურ ბრიგადას, დაზიანების ნაცვლად, 800 მმ-იანი საკანალიზაციო მაგისტრალური მილის 11-მეტრიანი მონაკვეთი მიწიდან გამქრალი დახვდა. ამ ფაქტის გამოაშკარავება საგზაო სამუშაოების შედეგად მოხდა, კერძოდ კი, მძიმე ტექნიკას, რომელსაც გზა გაჰყავდა, მიწა გამოეცალა და დიდ ორმოში ჩავარდა - მილის არარსებობის გამო გრუნტმა, ქვეშშექმნილი სიცარიელის გამო, ტრაქტორის სიმძიმეს ვეღარ გაუძლო და ჩავარდა.

კომპანიის წყალარინების საავარიო ბრიგადის უფროსის თქმით, ტარიელის ქუჩაზე ტრაქტორის მიწაში ჩავარდნის შესახებ მათ საგზაო დეპარტამენტის მუშებისგან შეტყვეს. ბრიგადის უფროსის ვარაუდით, ტრაქტორის ჩავარდნა კოლექტორის არარსებობით შექმნილი სიცარიელის გამო მოხდა. აღნიშნულის შესახებ ტექნიკურმა ბრიგადამ კომპანიის წყალარინების დეპარტამენტის ხელმძღვანელსა და უსაფრთხოების სამსახურს აცნობა.

როგორც "ჯორჯიან უოთერ ენდ ფაუერის" წყალარინების დეპარტამენტის ხელმძღვანელი ჯამილა ჩაჩხალია აცხადებს, 11-მეტრიან მონაკვეთზე საერთოდ აღარ არსებობს კოლექტორი, აღმოჩენილია მხოლოდ მილის 2-მეტრიანი ნაწილი, ხოლო დანარჩენი ნაწილები დაკარგულია. მისი თქმით, კოლექტორის გაუჩინარების მიზეზი ამ ეტაპზე გაურკვეველია, არადა, აღნიშნული ქსელი გამართულად მუშაობდა.

აღნიშნულ ფაქტთან დაკავშირებით, კომპანია "ჯორჯიან უოთერ ენდ ფაუერი" მოკვლევას აწარმოებს.

"ინტერპრესნიუსი"