ევროსაბჭოს მონიტორინგის კომიტეტის სხდომაზე საქართველოში თვითმმართველობის არჩევნების საკითხზე იმსჯელეს
ევროსაბჭოს მონიტორინგის კომიტეტის სხდომაზე საქართველოში ჩატარებული თვითმმართველობის არჩევნების საკითხზე იმსჯელეს.
ადამიანის უფლებათა დაცვის კომიტეტის თავმჯდომარის, ეკა ბესელიას აზრით, არჩევნებთან დაკავშირებით პოზიტიური შეფასებები იქნება. "განწყობები, შეფასებები, ვფიქრობ იქნება პოზიტიური. წინასწარი შეფასებებიდან, განცხადებებიდან და საუბრებში ასე ჩანს. რაც შეეხება ოპოზიციას, ის ცდილობს წარმოაჩინოს, რომ იყო ძალადობა ხელისუფლების მხრიდან, თუმცა არსებობს კონკრეტული რეაგირების შემთხვევები, როდესაც ყველა კონკრეტულ შემთხვევაზე, რომელიც დაფიქსირდა სხვადასხვა ოლქში, შსს-მ მოახდინა რეაგირება", - აღნიშნა ბესელიამ.
საპარლამენტო უმცირესობის ერთ-ერთი ლიდერის ჩიორა თაქთაქიშვილის განცხადებით, ევროსაბჭო და მონიტორინგის კომიტეტი შეშფოთებულია იმ ძალადობრივი ფონით, რომელიც ბოლო პერიოდში განსაკუთრებით აქტუალურია საქართველოში.
"ჩემი მიზანი იყო ის, რომ ბოლოს თვითმმართველობის არჩევნებთან დაკავშირებით განვითარებული მოვლენები გამეცნო მათთვის, წარვუდგინე კონკრეტული ადამიანების შესახებ ინფორმაცია, რომლებიც დასისხლიანებული, თავგატეხილები მოთავსებულები არიან საავადმყოფოებში მარტო იმიტომ, რომ ისინი არიან "ნაციონალური მოძრაობის" მხარდამჭერები. ბუნებრივია, ეს არის შეუთავსებელი დემოკრატიასთან, კანონის უზენაესობასთან, განსაკუთრებით მაშინ, როცა არავინ ისჯება და არსებობს საფუძვლიანი ეჭვი, რომ ისინი დაახლოებული არიან "ქართულ ოცნებასთან". ველოდები, რომ შესაბამის დოკუმენტში სრულად აისახება არა მარტო არჩევნებამდე პერიოდი, არამედ არჩევნების შემდგომი პერიოდიც", - აღნიშნა ჩიორა თაქთაქიშვილმა.
ევროსაბჭოს მონიტორინგის კომიტეტის სხდომა საქართველოში თვითმმართველობის არჩევნებს 2 საათზე მეტხანს განიხილავდა. კომიტეტზე მომზადდა სპეციალური დოკუმენტი, რომელსაც გრიფი "საიდუმლო" ადევს და მისი დეტალები საშემოდგომო სესიაზე გახდება ცნობილი.
ევროსაბჭოს მონიტორინგის კომიტეტის სხდომის შესახებ ინფორმაციას ტელეკომპანია "რუსთავი 2" ავრცელებს.
LIVE: გია ხუხაშვილი "ნიუსრუმიდან"
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
