თბილისში ასეთი რამ ჯერ არ მომხდარა! სპექტაკლს მაყურებელი საგანგებო სიტუაციების მართვის თანამშრომლების დახმარებით დაესწრება

ირაკლი კაკაბაძე (იგივე ანტონინ მარტო), რა ირაკლი კაკაბაძე იქნება, ორიგინალურ სიტუაციასა თუ პროექტში თუ არ აღმოჩნდა? ახალახან შევიტყვეთ, რომ 24 ივნისს სანდრო ახმეტელის სახელობის თეატრში მისი პიესის - "მასხარა და ბოდრიარის" საჯარო კითხვა გაიმართება, ამ ყველაფრის ხიბლი კი ის არის, რომ ახმეტელის თეატრის მსახიობები პიესას თეატრის შენობის სახურავზე წაიკითხავენ...

კიბერ ეპოქის ელექტროპიესაში გამოყენებულია ფრაგმენტები ჟან ბოდრიარის წიგნებიდან - "ნივთების სისტემა" და "ტერორიზმის სული". აღწერილია ახალგაზრდა ქართველი მხატვრისა და რეჟისორის, გიორგი მასხარაშვილისა და ცნობილი ფრანგი ფილოსოფოს-მოაზროვნის - ჟან ბოდრიარის წარმოსახვითი დიალოგი...

"ბრეხტი სახურავზე" - ასე ჰქვია პროექტს, რომელიც მსგავსი წარმოდგენითა და ფორმით ქართულ თეატრალურ სივრცეში პირველად ხორციელდება, ბერტოლდ ბრეხტი კი ახალი ტიპის დრამისა და ახალი თეატრალური ფორმის ერთ-ერთი შემქმნელია...

ახმეტელის თეატრში უჩვეულო წარმოდგენაზე მობილიზებული იქნება მერიის საგანგებო სიტუაციების მართვის სააგენტო, - სააგენტოს თანამშრომლები მაყურებლის აყვანას თეატრის სახურავზე სპეციალური ტექნიკის მეშვეობით უზრუნველყოფენ, საღამოზე დასწრების მსურველებმა ბილეთის ნაცვლად, თან უნდა იქონიონ დისტანციური მართვის პულტი, რათა სახურავზე ასვლა და წარმოდგენის ნახვა შეძლონ.

საღამოს დრესკოდი - შარვალი და სპორტული ფეხსაცმელია, ხოლო ბილეთი კი პულტი გახლავთ, რომელიც მაყურებელს თან უნდა ჰქონდეს...

ანონინ მარტო:

- წარმოდგენის თეატრის სახურავზე გამართის იდეა, ირაკლი გოგიას ეკუთვნის. მართლა ძლიერი იდეაა, ძალიან მომწონს. ეს ყველაფერი კი ემსახურება ბერტოლდ ბრეხტის მივიწყებულ სულს. მისი პიროვნების ადამიანებისთვის შეხსენებას... მნიშვნელოვანია, რომ ამ პიესას არაჩვეულებრივი მსახიობები კითხულობენ. მოკლედ, ვიმეორებ, ძალიან თანამედროვე იდეაა, პოსტმოდერნისტული კი არა, პოსტმოდერნიზმის შემდგომი ეტაპია...

- როდის შეიქმნა პიესა?

- პიესა 2002 წელს დავწერე, შემდგომ გადავაკეთე... მოკლედ, ის ბოდრიარისა და მასხარაშვილის გაბაასებაა... მთავარი პერსონაჟი გიზო უნივერსალური მამაკაცია, მას შეუძლია ერთდროულდ შეწვას ერბოკვერცხი, მოამზადოს აჯაფსანდალი, ქალს ასიამოვნოს და 10 ორგაზმი განაცდევინოს,…საოცარი ვინმეა... ასე რომ, გიზოს ნახავენ და გაიცნობენ სახურავზე ამოსულნი...

- ახმეტელის თეატრში რატომ აირჩიეთ ამ სუპერ მოდერნისტური პიესის განხორციელება?

- ყველაზე ავანგარდული თეატრია, საოცრად პროგრესული და იმიტომ. ისეთია, ბრეხტი რომ ოცნებობდა.

- გლდანი, ანუ ქალაქის გარეუბანი ამ ყველაფერს ხელს არ უშლის?

- პირქით, ეს მოსწრებაა ამისთვის: ეს იყო ბრეხტის ოცნებაც, ასეთ დასახლებებში გამართულიყო წარმოდგენები.

- სახურავზე წარმოდგენის გამართვას ამინდი ხელს ხომ არ შეუშლის?

ირაკლი გოგია:

- არა, ინფორმაცია გვაქვს, ეს საკითხი შევისწავლეთ, - არ იწვიმებს. ვიმედოვნებთ, რომ ბევრს დააინტერესებს და პიესის სანახავად მაყურებელი მოვა. ოღონდ, საჭიროა, სპეციალური დრესკოდის დაცვა. ყველას უნდა ეცვას შარვალი და სპორტული ფეხსაცმელი და თან უნდა იქონიონ ტელევიზორის პულტი. ის ბილეთის ფუნქციას ასრულებს და კიდევ თუ რაში გამოიყენებენ მას, ამას წარმოდგენისას მიხვდებიან. მთავარია, რომ ისინი ამ ნივთს როგორც მოიტანეს, ასევე თან წაიღებენ.

ლალი ფაცია

სპეციალურად "ამბები.გე"-სთვის