რატომ ერიდება პრეზიდენტი მთავრობაში შესაძლო საკადრო ცვლილებებზე კომენტარს

საქართველოს პრეზიდენტი გიორგი მარგველაშვილი მთავრობაში საკადრო ცვლილებების შესაძლებლობის შესახებ კომენტარის გაკეთებას ერიდება, რადგან ფიქრობს, რომ მისი განცხადება საზოგადოებაში "შესაბამის დაძაბულობას" შექმნის.

"მე რომ გავაკეთო ამასთან დაკავშირებით კომენტარი, უნდა შევქმნა შესაბამისი დაძაბულობა და მიმაჩნია, რომ ჩემი განცხადება შექმნის შესაბამის დაძაბულობას. ამიტომაც არ ვაკეთებ განცხადებას. ბუნებრივია, მაქვს ჩემი პოზიცია, ბუნებრივია, ეს პოზიცია არის კონკრეტულიც და ჩამოყალიბებულიც, მაგრამ განცხადებას არ გავაკეთებ", - აღნიშნა გიორგი მარგველაშვილმა გადაცემა "რეაქციაში" საუბრისას.

ამასთან, გადაცემის წამყვანის შეკითხვაზე, მთავრობაში ხედავს თუ არა სუსტ რგოლებს, პრეზიდენტმა აღნიშნა: "მზეზეც კი არის ლაქები და როგორ შეიძლება სადღაც არ იყოს რამე სუსტი?!".

პრეზიდენტმა მისთვის კიდევ ერთი უფლებამოსილების ჩამორთმევის ფაქტი შეაფასა. მას არჩევნების მეორე დღეს მთავრობის მიერ რუსთაველის პრემიების საკითხზე მსჯელობა არაადეკვატურად მიაჩნია.

"ჩემთვის ცოტა გაუგებარი იყო არჩევნების მეორე დღეს რუსთაველის პრემიებზე მსჯელობა. არ მგონია, რომ ქვეყანა ასეთ დროს პრემიების მინიჭების თემაზე უნდა მსჯელობდეს, მაგრამ არ ჩავრღმავებულვარ ამ თემას... კონსტიტუციის ახალი რედაქციიდან გამომდინარე რაღაც საკითხები ბოლომდე მოუგვარებელია - ვინ უნდა მიანიჭოს პრემია, ვინ უნდა ჩამოკიდოს ორდენი და ა.შ. ამ მოუგვარებელ ვითარებაში, ბუნებრივია, ჩნდება სირთულეები. მე ამ სირთულეებს არც ომს დავარქმევდი, არც სკანდალს, არც დემარშს. ესაა ბუნებრივად ახალი კონსტიტუციის ძალაში შესვლის სირთულეები", - განაცხადა გიორგი მარგველაშვილმა შეკითხვაზე კომენტირებისას, თუ როგორ აფასებს მისთვის კიდევ ერთი უფლებამოსილების ჩამორთმევის ინიციატივას, რომელიც ამჯერად რუსთაველისა და ეროვნული პრემიის მინიჭების უფლების პრეზიდენტიდან პრემიერ-მინისტრისთვის გადაცემას გულისხმობს და იქვე დასძინა, რომ საკითხის არჩევნების მეორე დღეს განხილვა ადეკვატურად არ მიაჩნია.

ამასთან, მარგველაშვილმა მთავრობასთან და უშუალოდ პრემიერთან დაძაბული ურთიერთობის შესახებ გავრცელებული ინფორმაცია უარყო და აღნიშნა, რომ მთავრობის მეთაურთან საქმიანი ურთიერთობა აქვს. "მე არ მგონია, რომ ირაკლისთან დამეძაბა ურთიერთობა. აქტიური ურთიერთობა რას ნიშნავს?! დღეში რამდენჯერ უნდა გვქონდეს შეხვედრა მაგალითად?! საქმიანი ურთიერთობა მაქვს", - განაცხადა პრეზიდენტმა.

მარგველაშვილმა საკუთარი პოზიცია დააფიქსირა იმასთან დაკავშირებით, რომ არ შედის იმ დელეგაციის შემადგენლობაში, რომელიც ასოცირების ხელშეკრულების ხელმოსაწერად ბრიუსელში გაემგზავრება.

როგორც პრეზიდენტმა აღნიშნა, მის მიერ მთავრობისთვის უფლებამოსილების დათმობა იყო სახელმწიფოებრივი ინტერესიდან გამომდინარე მიღებული გადაწყვეტილება, სხვა ყველაფერი კი ამ ეტაპზე არის დეტალი.

"პირველ რიგში, მინდა ხაზი გავუსვა, რომ ჩვენ ხელს ვაწერთ უმნიშვნელოვანეს ხელშეკრულებას, რომელიც თვისობრივად ახალ მიმართულებას უხსნის ჩვენს ქვეყანას. რაც შეეხება ხელმოწერას, ჩვენ გამოვედით იმ ღირებულებიდან, რასაც ჰქვია სახელმწიფო ინტერესი. სახელმწიფო ინტერესი კი არის ის, რომ საქართველომ 27-ში ხელი მოაწეროს ამ ხელშეკრულებას. მეორე ღირებულებაა ის, რომ ინსტიტუტები იყოს თავის ადგილზე. ჩვენ წინაშე იდგა საჭიროება დაგვეფიქსირებინა ჩვენი პოზიცია, რომ უპრიანი იქნებოდა ამ ხელშეკრულებისთვის, როგორც სახელმწიფოებრივი დოკუმენტისთვის ხელი მოეწერა პრეზიდენტს, თუმცა ასევე ვთქვით, რომ კინკლაობაში არ შევიდოდით. აქედან გამომდინარე გადავეცით კიდეც უფლებამოსილება მთავრობას. ჩემთვის, როგორც რიგითი მოქალაქისთვის, მთავარი ისაა, რომ ხელშეკრულებას ხელი მოეწერება. შემდეგი დეტალები ჩემთვის საინტერესო აღარ იყო. როგორც კი მე უარი ვთქვი ხელმოწერაზე, შემდგომი დეტალები საინტერესო აღარ გამხდარა. დანარჩენი ამ ეტაპზე არის სწორედ დეტალი", - განაცხადა გიორგი მარგველაშვილმა.

"ინტერპრესნიუსი"