ოთხი პოლიტიკური ძალა, რომელიც საკრებულოში ადგილს მიიღებს

ცესკო-ს წინასწარი მონაცემების მიხედვით, თბილისის საკრებულოში პროპორციული წესით მანდატების მიღებას ოთხი პოლიტიკური ძალა შეძლებს.

პროპორციული სიით ყველაზე მეტ დეპუატატს საკრებულოში "ქართული ოცნება" შეიყვანს, რომელმაც პროპორციულ არჩევნებში 150 052 ხმა მოაგროვა, რაც არჩევნებში მონაწილეთა 45.96%-ს შეადგენს.

მეორე ადგილზეა "ერთიანი ნაციონალური მოძრაობა" 85 326 ხმით, რაც 26.13%-ს შეადგენს.

საკრებულოში პროპორციული სიით მანდატს მიიღებს "ნინო ბურჯანაძე-ერთიანი ოპოზიციაც", რომელმაც ხმათა 10.35%, 33794 ხმა მიიღო.

ყველაზე ცოტა მანდატი კი "დავით თარხან-მოურავი – საქართველოს პატრიოტთა ალიანსს" ექნება, რომელმაც ხმათა 6.37% მოაგროვა.

არჩევნებში მონაწილე დანარჩენმა პოლიტიკურმა პარტიებმა 4 პროცენტიანი საარჩევნო ბარიერი ვერ გადალახეს.

თბილისის საკრებულოში პროპორციული სიით 25 დეპუტატი უნდა შევიდეს. ასევე 25 მაჟორიტარული წესით არჩეული დეპუტატი იქნება წარმოდგენილი. უკვე ცნობილია, რომ 25 დან 24 მაჟორიტარულ მანდატს "ქათული ოცნების" კანდიდატები აიღებენ.

თბილისში თვითმმართველობის არჩევნებში რეგისტირებული 918 661 ამომრჩევლიდან, 342 996 მიიღო მონაწილეობა.

"ინტერპრესნიუსი"