ბათუმში, ერთ-ერთი პარტიის მაჟორიტარობის კანდიდატის ავტომობილიდან საბურავების მოხსნის ფაქტზე გამოძიება დაიწყო. როგორც "ინტერპრესნიუსს" საქართველოს შინაგან საქმეთა სამინისტროში განუცხადეს, მომხდართან დაკავშირებით საქმე ქურდობის მუხლით აღიძრა და გამოძიება 177-ე მუხლით მიმდინარეობს.
ბათუმში პარტია "რეფორმატორების" მაჟორიტარობის კანდიდატ ნუგზარ ჯინჭარაძეს დილით ავტომობილზე საბურავები მოხსნილი დახვდა.
ნუგზარ ჯინჭარაძის თქმით, დამკვირვებლების უბნებზე მიყვანას აპირებდა, თუმცა ავტომობილი საბურავების გარეშე იყო.
"დილის 06:00 საათზე მომაკითხა ბიძაშვილმა, ჩვენი დამკვირვებლები ავტომობილით უნდა მიგვეყვანა. სანამ გამოვიდოდი გარეთ, ბიძაშვილმა მითხრა, რომ ავტომობილს საბურავები არ ჰქონდა. მეგონა, რომ ხუმრობდა, გავედი და მართლაც საბურავების გარეშე იყო მანქანა", - აღნიშნა ნუგზარ ჯინჭარაძემ.
ნუგზარ ჯინჭარაძე მომხდარს პოლიტიკურ ზეწოლად აფასებს.
