ბაჩო ახალაია საქართველოს პრეზიდენტს, პრემიერ-მინისტრს და პარლამენტის თავმჯდომარეს მიმართავს და მოითხოვს, საჯარო გახადონ ყველა მოლაპარაკების შინაარსი, რომელიც რაიმე სახით სოხუმსა და ცხინვალს ეხება.
პატიმრობაში მყოფი თავდაცვისა და შინაგან საქმეთა ყოფილი მინისტრი ძლიერი პარტიზანული ომის საფრთხეზე საუბრობს.
ახალაია ე.წ. მატროსოვის ციხიდან მიმართვას ავრცელებს, რომელსაც Ambebi.ge უცვლელად გთავაზობთ:
"ბატონებო, დაჟინებით მოვითხოვ თქვენგან, არ მიიღოთ ისეთი გადაწყვეტილებები, რომლის კონტურებიც ბოლო პერიოდში აშკარად იკვეთება. თქვენ არ გაქვთ უფლება სოხუმსა და ცხინვალთან დაკავშირებით საქართველოს პოლიტიკა კარდინალურად შეცვალოთ. უცილობლად უნდა გახსოვდეთ, რომ საქართველოს ევრო-ატლანტიკური ინტეგრაცია ესაა გზა სოხუმისკენ და არა პირიქით.
თქვენს მიერ წარმოებული პოლიტიკა, ცალსახად გვაფიქრებინებს, რომ აფხაზეთის რუსეთთან შეერთება შეიძლება გარდაუვალი იყოს, რაც თავის მხრივ დე ფაქტო რუსეთის აფხაზეთში ერთადერთ რამეს გამოიწვევს - ძლიერ პარტიზანულ ომს. ნუ უბიძგებთ ისედაც მძიმე ყოფაში მყოფ ქართველ ხალხს უარესი მომავლისა და სირთულეებისაკენ.
ამავდროულად, დაჟინებით მოვითხოვ თქვენგან, საჯარო გახადოთ ყველა მოლაპარაკების შინაარსი, რომელიც რაიმე სახით სოხუმსა და ცხინვალს ეხება, მიეცით ამის განსჯის უფლება იმას, ვისი საქმეც ეს არის - ქართველ ხალხს. არც შეეცადოთ ოკუპაციის პრობლემა ხოლოდ ჰუმანიტარულ საკითხამდე დაიყვანოთ.
ბოლოს, კიდევ ერთხელ დაჟინებით მოვითხოვ, არათუ აფხაზეთის ან ე.წ. სამხრეთ ოსეთის დათმობის, არამედ მათ მიმართ მკაცრი პრინციპული პოლიტიკის ოდნავი ცვლილებაც კი არ უნდა გახადოთ არც ერთი მოლაპარაკების, მათ შორის რუსეთთან მიმდინარე ე.წ. ეკონომიკურ-კულტურული მოლაპარაკებისთვის, სავაჭრო თემის მსგავსიც კი. იხელმძღვანელეთ, საქართველო მომავალზე ორიენტირებული პოლიტიკით და არა მხოლოდ თქვენი პირადი მოკლევადიანი გამოწვევებით", - აღნიშნულია ბაჩო ახალაიას მიმართვაში.