მთავრობის ადმინისტრაციაში თანამშრომომლების მიღების წესი იცვლება

მთავრობის დღევანდელმა ადმინისტრაციამ თანამშრომლების უკონკურსოდ დანიშვნის პრაქტიკა და შესაბამისი წესი მემკვიდრეობით, ყოფილი პრემიერის, ვანო მერაბიშვილის ადმინისტრაციისგან მიიღო.

მთავრობის ადმინისტრაციასთან მიმართებაში 2012 წლის 6 ივლისის დებულება მოქმედებს, რომელსაც მაშინდელი პრემიერ-მინისტრი ვანო მერაბიშვილი აწერს ხელს. აღნიშნული დოკუმენტის ერთ-ერთი სიახლე იყო ის, რომ მთავრობის კანცელარიის თანამშრომლების დანიშვნის შესაძლებლობა, კანცელარიის უფროსის ნაცვლად, პრემიერ-მინისტრის პრეროგატივა გახდა და, "საჯარო სამსახურის შესახებ" კანონის გათვალისწინებით, საჯარო მოხელეთა კონკურსის წესით მიღების ვალდებულება მთავრობის ადმინისტრაციის დღის წესრიგიდან მოიხსნა.

მთავრობის ახლანდელი ადმინისტრაციის ხელმძღვანელის მოადგილემ, ნინო კობახიძემ "ინტერპრესნიუსს" დაუდასტურა, რომ სადღეისოდაც ეს წესი მოქმედებს - დღევანდელი მდგომარეობით მთავრობის ადმინისტრაციაშიც საჯარო მოხელეები დანიშნული არიან პრემიერის მიერ - კონკურსის გარეშე, თუმცა კობახიძემ ხაზგასმით აღნიშნა, რომ ეს შეიცვლება და პოლიტიკური თანამდებობის პირების გარდა, ყველა პოზიცია მთავრობის ადმინისტრაციაში კონკურსს დაექვემდებარება.

"ჩვენ ადმინისტრაციად გარდავიქმენით. რეორგანიზაციის პროცესი თითქმის დასრულდა. დაახლოებით ივლისის დასაწყისში ადმინისტრაციის ახალ კონცეფციას წარმოვადგენთ. მზადდება საჯარო მოხელეთა დანიშვის კონცეფცია და ესეც გამოვა. ჩვენ ვფიქრობთ, რომ უნდა გაიმიჯნოს პოლიტიკური თანამდებობის პირები და ადმინისტრაციის სტაფი. პრემიერთან ერთად, გამოიყოფა პოლიტიკური თანამდებობის პირები, რომელთა დანიშვნაზეც გადაწყვეტილებას პრემიერი მიიღებს. დანარჩენი ადმინისტრაციის "სტაფი" - არის ეს საქმის წარმოება, წერილების მიღება, საორგანიზაციო საკითხები, იურისტები და ასე შემდეგ, გვინდა, რომ კონკურსის წესით შევარჩიოთ, რათა სტრუქტურა გახდეს ძლიერი და ეს ხალხი პოლიტიკური თანამდებობის პირთა ცვლილებაზე დამოკიდებული არ იყოს. მე დამხვდა მთავრობის კანცელარიის სისტემა, როცა ხალხი უკონკურსოდ ინიშნებოდა", - განუცხადა "ინტერპრესნიუსს" ნინო კობახიძემ.

ამასთან, კობახიძემ აღნიშნა ისიც, რომ ბევრ ევროპულ ქვეყანაში მოქმედებს პრაქტიკა, როცა პრემიერის ადმინისტრაციაში და პრეზიდენტის ადმინისტრციაში თანამშრომლები პრემიერისა და პრეზიდენტის მიერ ინიშნებიან და კონკურსი არ ტარდება.

აქვე შეგახსენებთ, რომ პრეზიდენტის ადმინისტრაციაშიც იმგვარი სისტემა დაინერგა, როცა ვაკანტური თანამდებობების შესავსებად კონკურსის ჩატარება საჭირო აღარ არის - ადმინისტრაციის თანამშრომლებს პირდაპირ პრეზიდენტი ნიშნავს.

ერთ-ერთი ბოლო ცვლილება ამ მიმართულებით "საჯარო ინფორმაციის პროაქტიულად გამოქვეყნების წესისა და საჯარო ინფორმაციის ელექტრონული ფორმით მოთხოვნის სტანდარტის დამტკიცების შესახებ" პრეზიდენტის ბრძანებულებაში განხორციელდა, რომლის მიხედვითაც, იმ ინფორმაციათა ჩამონათვალიდან, რომელიც პრეზიდენტის ადმინისტრაციის ვებ-გვერდზე პროაქტიული წესით უნდა გამოქვეყნდეს, ამოღებულია ინფორმაცია ადმინისტრაციაში გამოცხადებული კონკურსის წესით შესავსები ვაკანტური თანამდებობების შესახებ და ნორმატიული აქტები, რომლებიც ადმინისტრაციაში ვაკანტური თანამდებობის დასაკავებელი კონკურსის ჩატარების წესებს განსაზღვრავს.

აღნიშნული ცვლილება, რომელიც კონკურსებთან დაკავშირებული ინფორმაციის ადმინისტრაციის ვებ-გვერდზე გამოქვეყნების ვალდებულების გაუქმებას ითვალისწინებს, თავის მხრივ პრეზიდენტის ადმინისტრაციის ახალი დებულებიდან გამომდინარეობს. პრეზიდენტის ადმინისტრაციის ახალი დებულება გასული წლის 19 დეკემბერს არის მიღებული და აღნიშნული დოკუმენტის მიხედვით, ადმინისტრაციის თანამშრომლებს თავად პრეზიდენტი ნიშნავს. ეს კი იმას ნიშნავს, რომ მათი დანიშვნა კონკურსების გარეშეა შესაძლებელი.

"ინტერპრესნიუსი"