30
მაისიდღის ზოგადი ასტროლოგიური პროგნოზი
ჩემსა და პრეზიდენტ გიორგი მარგველაშვილს შორის არავითარი დაძაბულობა არ არსებობს, – ამის შესახებ პრემიერ-მინისტრმა ირაკლი ღარიბაშვილმა "მაესტროს" ჟურნალისტის შეკითხვის საპასუხოდ განაცხადა, რომელიც პრემიერისა და პრეზიდენტს ურთიერთობას ეხებოდა.
ირაკლი ღარიბაშვილის განცხადებით, პრემიერსა და პრეზიდენტს შორის ჯანსაღი ურთიერთობა არის.
"ამ თემაზე მინდა დავასრულო სპეკულაცია, არავითარი დაძაბულობა და მითუმეტეს, პიროვნული დაძაბულობა არ არსებობს. ჯანსაღი ურთიერთობა გვაქვს, რომელიც უნდა გვქონდეს ახალი კონსტიტუციის ამოქმედების შემდეგ პრეზიდენტს და პრემიერს. ეს საუბრები და სპეკულაციები მიმდინარეობს მიზანმიმართულად ისევ "ნაციონალური მოძრაობის" მხრიდან, რომელსაც ხელს უწყობენ სხვადასხვა მედიასაშუალებები და ახდენენ ამის ტირაჟირებას. ეს არის მიზანმიმართული პოლიტიკა- მოახდინონ მოსახლეობის დაძაბვა, რომ რაღაც ხდება. არაფერი არ ხდება", - განაცხადა ირაკლი ღარიბაშვილმა.
მისივე თქმით, როდესაც არის სახელმწიფო მნიშვნელობის საკითხები, ის პრეზიდენტთან ერთად ჩნდება.
"იგივე იყო 26 მაისს, რომელიც გახსნა პრეზიდენტმა და ჩვენ ერთად ვიზეიმეთ ეს დღე. ჩვენ უნდა მივეჩვიოთ, რომ კონსტიტუცია შეიცვალა, აღმასრულებელი ხელისუფლების ხელმძღვანელი დღეს არის პრემიერი, პრეზიდენტს სხვა ფუნქცია აქვს, პარლამენტს - სხვა. ის, რომ პრეზიდენტი და პრემიერი ერთად არ ჩნდებიან, ამაში უცნაური არაფერია. არ არის აუცილებელი სტუმრად ჩამოსულ უცხოელ პრეზიდენტს პრემიერი და პრეზიდენტი ერთად დახვდნენ. მე გერმანიაში ვიყავი, მათ ჰყავთ პრეზიდენტი და კანცლერი, მე იქ პრეზიდენტი არ მინახავს", - განაცხდა ირაკლი ღარიბაშვილმა.
რაც შეეხება ჟურნალისტის შეკითხვას - იქნება თუ არა გიორგი მარგველაშვილი ასოცირების ხელშეკრულების ხელმოსაწერად გასამგზავრებელ დელეგაციაში, პრემიერის განმარტებით, ამ თემაზე პრეზიდენტთან არ უსაუბრია.
"არ გვისაუბრია ამ თემაზე, თუ ამის სურვილი და საჭიროება იქნება პრობლემა არ არის. გადაწყდა, რომ ასოცირების ხელშეკრულებას პრემიერ-მინისტრი მოაწერს ხელს", - აღნიშნა ირაკლი ღარიბაშვილმა.
მისივე თქმით, ასოცირების ხელშეკრულების თემაზე პრეზიდენტმა და პრემიერმა განსხვავებული განცხადებები გააკეთეს, რადგან ვერ მოხერხდა პოზიციების წინასწარ შეჯერება.
"გაკეთდა ამ თემაზე ურთიერთგანსხვავებული განცხადებები. სასურველი იქნებოდა წინასწარ შეგვეჯერებინა განცხადებები. რაღაც კომუნიკაციის პრობლემა წარმოშვა იმან, რომ მე აქ არ ვიყავი, პრეზიდენტი იყო საქართველოში, ვერ მოხერხდა პოზიციების შეჯერება. ის, რომ განსხვავებული პოზიცები დაფიქსირდა ეს მიუთითებს, იმაზე, რომ ჩვენს ქვეყანაში არის რეალური დემოკრატია. ის, რომ პრეზიდენტი და პრემიერი არ არიან ერთ აზრზე მიუხედავად იმისა, რომ პრეზიდენტი ჩვენი კანდიდატია, მე ამაში ტრაგედიას ვერ ვხედავ. პრეზიდენტს და მე გვაქვს საერთო ინტერესები, ქვეყნის ინტერესები არ დაზარალდება", - განაცხადა პრემიერმა.
ნახეთ ვიდეო
