28
მარტიდღის ზოგადი ასტროლოგიური პროგნოზი
პროფესია, რომელიც ოჯახურ სიმყუდროვეზე დამანგრევლად მოქმედებს, - ეს ჟურნალ "გზის" ახალი ნომრის ერთ-ერთი თემაა. სტატიაში მკითხველი ცნობილების გულახდილ ინტერვიუებს იხილავს.
იმის გასარკვევად, თუ რა პროფესიის ადამიანებს ენგრევათ უფრო ხშირად ოჯახები, ჟურნალმა სოციალური ქსელის მეშვეობით ერთგვარი გამოკითხვა ჩაატარა. გამოკითხულთა უდიდესი ნაწილი მიიჩნევს, რომ ოჯახის დანგრევის ყველაზე დიდი საფრთხე მსახიობებსა და მომღერლებს ემუქრებათ, სხვები კი აღნიშნავენ, რომ ჟურნალისტებიც ვერ აგებენ მყარ ბუდეს. საზოგადოების უფრო მცირე ნაწილი ფიქრობს, რომ პროფესიას მნიშვნელობა არ აქვს: მუშაც და კალატოზიც იგივე "წარმატებით" დაანგრევს ოჯახს, როგორც - ხელოვანები.
- გამოკითხულ რესპონდენტთა უმრავლესობა მიიჩნევს, რომ ყველაზე ხშირად ოჯახები მსახიობებსა და მომღერლებს ენგრევათ. ამ მოსაზრებას ეთანხმები?
ნინი ბადურაშვილი, მომღერალი:
- ალბათ სწორია, რადგან ძალიან რთულ რეჟიმში გვიწევს ცხოვრება. ახალ წელს, სხვა დღესასწაულებზეც სახლში არ ვართ. ამ გარემოებამ ურთიერთობაში პრობლემები რომ არ შექმნას, მეორე ნახევარი ან შენი პროფესიის უნდა იყოს, ან - ძალიან გამგები, რაც იშვიათობაა.
- მიიჩნევ, რომ ოჯახის დანგრევის მიზეზი მხოლოდ ეს გარემოებაა?
- ხელოვანი ადამიანი, რომელსაც საკუთარი საქმე უზომოდ უყვარს, პროფესიას იშვიათად თმობს, კომპრომისზე ნაკლებად მიდის, ეს კი მისი მეორე ნახევრისთვის გაუგებარია. შეიძლება, ღამით დაგირეკონ და რეპეტიციაზე ან გადაღებაზე მისვლა გთხოვონ. ეს შენთვის მნიშვნელოვანია, გიხარია, მაგრამ კაცებს არ ესმით. ამ შემთხვევაში, იმ ოჯახებზე ვლაპარაკობ, სადაც ქალია პოპულარული. კაცებს პოპულარული მეუღლის ატანა და გაგება უჭირთ, განსაკუთრებით - საქართველოში.
ნათია ფანჯიკიძე:
- ვფიქრობ, რომ ქორწინება ლატარიაა, მით უმეტეს, საქართველოში ანუ ქვეყანაში, სადაც ოჯახებს ადრეულ ასაკში ქმნიან. ასეც რომ არ იყოს, ქორწინება მაინც გამართლებაზეა. ოჯახის ნაადრევად შექმნას თავისი ხიბლი აქვს, მაგრამ ნუ გვავიწყდება, რომ მედალს 2 მხარე აქვს: წყვილები ერთმანეთს კარგად არ იცნობენ, ამიტომ შეყვარებულობის რომანტიკული პერიოდის შემდეგ უსიამოვნო აღმოჩენები ხშირია. ერთმანეთს ეუბნებიან, თურმე, შენ როგორი ყოფილხარო.
- ოჯახი თქვენც ნაადრევ ასაკში შექმენით, მაგრამ ახერხებთ, ერთმანეთისთვის სასურველ ადამიანებად დარჩეთ. თქვენი საიდუმლო რაშია?
- 22 წელია, მე და ირაკლი ერთად ვართ. ჩვენ მამები ნაადრევად დავკარგეთ, ერთად ბევრი გასაჭირი გამოვიარეთ, მაგრამ არასდროს არც ერთს ხელები არ ჩამოგვიშვია. სულ ვცდილობდით, გვემუშავა, ახალი გზა გამოგვენახა. ბედნიერების რეცეპტის გაცემა მარტივი არ არის, მაგრამ ვცდილობ, ყველაფერი გავამარტივო, ადამიანისთვის ადვილად ხელმისაწვდომი გავხადო. უპირველეს ყოვლისა, ოჯახის წევრები მეგობრები უნდა იყვნენ, თორემ ნებისმიერ ხანგრძლივ ურთიერთობაში კონფლიქტი ჩნდება. შეიძლება, ბავშვობის მეგობართანაც მოგიხდეს უსიამოვნება, მაგრამ ის იმდენად ძვირფასია, ერთი კონფლიქტი და შელაპარაკება ურთიერთობას არ არღვევს. ოჯახშიც ბევრი ძვირფასი რამ ისე უნდა დაგროვდეს, რომ ყოველგვარი შეუთანხმებელი აზრი გადაწონოს.
სტატიის სრული ვერსია იხილეთ ჟურნალ "გზის" ახალ, 22-ე ნომერში.
