1
ივნისიდღის ზოგადი ასტროლოგიური პროგნოზი
თბილისის წიგნის მე-16 საერთაშორისო ფესტივალთან დაკავშირებით, "ექსპო ჯორჯიას" მე-11 პავილიონში ხალხმრავლობაა. მიუხედავად იმისა, რომ წიგნის ფესტივალი ოფიციალურად დღეს, 13.00 საათზე გაიხსნება, მკითხველთა დიდმა ნაწილმა სასურველი წიგნის შეძენა უკვე მოახერხა.
"ექსპო ჯორჯიაში" სხვადასხვა ასაკის მკითხველები გამოფენილ წიგნებს ათვალიერებენ და ყიდულობენ.
როგორც "ინტერპრესნიუსთან" საუბრისას ფესტივალის ორგანიზატორმა, საქართველოს წიგნის გამომცემელთა და გამავრცელებელთა ასოციაციის აღმასრულებელმა დირექტორმა თინათინ ბერიაშვილმა აღნიშნა, წელს ფესტივალზე დარეგისტრირებულია 63 მონაწილე, მათი ძირითადი ნაწილი გამომცემელია. ასევე ფესტივალში მონაწილეობენ სადისტრიბუციო ქსელები, წიგნის მაღაზიები, გამავრცელებლები, საუნივერსიტეტო და სასწავლო დაწესებულებები და საერთაშორისო ორგანიზაციები. მისივე თქმით, ფესტივალის ფარგლებში განხორციელდება ვაუჩერიზაციის პროექტი. კერძოდ, 66 ბიბლიოთეკა 715 ლარის ოდენობის ვაუჩერს მიიღებს და ბიბლიოთეკებს შეეძლებათ ნებისმიერ გამომცემელთან თავიანთი წიგნის მარაგების შევსება.
ფესტივალზე ყველაზე დიდი სტენდით გამოირჩევა გამომცემლობა "პალიტრა L". როგორც "ინტერპრესნიუსთან" საუბრისას გამომცემლობა "პალიტრა L" -ის დირექტორმა თინათინ ასათიანმა აღნიშნა, წელს "პალიტრა L"-ს ფესტივალზე წარმოდგენილი აქვს 1800-ზე მეტი დასახელების წიგნი.
გამომცემლობა სტუმრებს წიგნების მრავალრიცხოვან ჩამონათვალზე 75%-მდე ფასდაკლებას სთავაზობს. ასევე, იმ სერიას, რომლებიც პრესასთან ერთად განსაკუთრებულ ფასად იყიდება, ფესტივალზე აქციის ფასად გამოიფინა.
ამას გარდა, ფესტივალზე წარმოდგენილია წიგნის მაღაზიათა ქსელ "ბიბლუსის" ექსკლუზიური პარტნიორების სტენდი, მათ შორის, საკანცელარიო ნივთები, ასევე "ბიბლუსის" უკრაინელი პარტნიორების რუსულენოვანი ლიტერატურა.
ამას გარდა, "ექსპო ჯორჯიას" ეზოში ველოსიპედეპით მოძრაობენ "ბიბლუსის" წარმომადგენლები, რომლებიც მომხმარებლებს შეძენილი წიგნების მანქანამდე მიტანაში ეხმარებიან.
გარდა ამისა, დღეს, 15.00 საათზე დაგეგმილია წიგნის თაროს პრეზენტაცია, რომელიც გამომცემლობა "პალიტრა L"-მა სერიისთვის 50+1+49, "ასი წიგნი, რომელიც უნდა წაიკითხო, სანამ ცოცხალი ხარ" - შექმნა.
თბილისის წიგნის მე-16 საერთაშორისო ფესტივალი "ექსპო ჯორჯიას" მე-11 პავილიონში, 1-ელი ივნისის ჩათვლით გაგრძელდება. მკითხველებს წიგნების შეძენა 11.00 საათიდან 20.00 საათამდე შეეძლებათ.
