ბაბუშერას აეროპორტიდან გადმოსვენებული ცხედრების სრული იდენტიფიკაცია მაქსიმუმ 6 თვეში მოხდება

სოხუმის ბაბუშერას აეროპორტიდან გადმოსვენებული ცხედრების სრული იდენტიფიკაცია მაქსიმუმ 6 თვეში მოხდება, - ამის შესახებ ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა მინისტრმა დავით დარახველიძემ გუშინ სამებაში განაცხადა, სადაც პატრიარქმა აფხაზეთში დაღუპული ქართველი გმირების, მათ შორის თბილისში გადმოსვენებულთა სახელზე პანაშვიდი გადაიხადა.

როგორც დარახველიძემ აღნიშნა, თბილისში 31 ცხედრის გადმოსვენება მოხერხდა და ამით ბაბუშერას სამარხი პრაქტიკულად დაიხურა. მისივე თქმით, მაქსიმუმ 6 თვეში მოხდება სრული იდენტიფიკაცია და შემდეგ ცხედრები ოჯახებს გადაეცემათ.

დავით დარახველიძის განცხადებით, 27 მაისს გაიხსნება დიღმის ძმათა სასაფლაო, სადაც სავარაუდოდ 23 ცხედარი განისვენებს და არ არის გამორიცხული მათ შორის აფხაზ თანამემამულეთა ცხედრებიც იყოს. მისი თქმით, იგივე პროცედურებით მოხდება მათი იდენტიფიცირება და ოჯახებისთვის გადაცემა.

დღეს სამებაში პოლიტიკოსების გარდა ბაბუშერას აეროპორტში დაღუპული იმ გმირების ოჯახის წევრებიც იმყოფებოდნენ, რომელთა ცხედრებიც თბილისში აფხაზეთიდან რამდენიმე დღის წინ გადმოასვენეს.

"ინტერპრესნიუსი"