ირაკლი ღარიბაშვილი - ძნელია, სიამაყის გარეშე მოისმინო იმ კვლევის შედეგები, რომელიც მსოფლიო ბანკმა, ჯანმო-მ და USAID-მა ჩაატარეს

ჯანდაცვის მიმართულებით, ასე მცირე დროში, ჩვენ ნამდვილად წარმოუდგენელ შედეგს მივაღწიეთ, - ამის შესახებ საქართველოს პრემიერ-მინისტრმა ირაკლი ღარიბაშვილმა "ექსპო ჯორჯიას" საგამოფენო ცენტრში მიმდინარე საყოველთაო ჯანდაცვის პროგრამის შედეგების შემაჯამებელ კონფერენციაზე სიტყვით გამოსვლისას განაცხადა. მისი თქმით, მთავრობა არ მიეცემა თვითკმაყოფილებას, რადგან პრობლემები კიდევ არსებობს.

"ძნელია, სიამაყის გარეშე მოისმინო იმ კვლევის შედეგები, რომელიც მსოფლიო ბანკმა, მსოფლიო ჯანდაცვის ორგანიზაციამ და USAID-მა ჩაატარეს - გამოკითხულთა 80 პროცენტზე მეტი ხაზგასმულად დადებითად აფასებს საყოველთაო ჯანდაცვის რეფორმის შედეგებს. ჩვენ ნამდვილად წარმოუდგენელ შედეგს მივაღწიეთ ასე მცირე დროში. თუმცა, რა თქმა უნდა, ჩვენ არ მივეცემით თვითკმაყოფილებას, რადგან ყველაზე კარგად ვიცით, რომ კიდევ არსებობს პრობლემები, კიდევ ბევრი შრომა გვაქვს გასაწევი. დასამალი არ არის, რომ უმძიმესი მემკვიდრეობა გვერგო, და ყველაზე მეტად ეს ჯანდაცვის სფეროში იგრძნობოდა", - აღნიშნა ღარიბაშვილმა.

მისივე თქმით, შეიცვალა მდგომარეობა და საქართველოს ყველა მოქალაქე უზრუნველყოფილია საბაზისო სამედიცინო მომსახურებით. "როგორც იცით, ჩვენი მოსახლეობის უდიდესი უმრავლესობისთვის საერთოდ ხელმიუწვდომელი იყო ჯანდაცვა. მცირე შემოსავლიანი, განსაკუთრებით კი სოციალურად დაუცველი მოსახლეობა, უმძიმეს მდგომარეობაში იყო. ხშირად ოჯახები მკურნალობისთვის, განსაკუთრებით კი ოპერაციებისთვის, იძულებული იყვნენ აეღოთ სესხი ან, სულაც, გაეყიდათ სახლ-კარი, რაც ოჯახების გაღატაკებას იწვევდა. ამიტომაც, ადამიანები მხოლოდ უკიდურეს შემთხვევაში მიმართავდნენ სამედიცინო დაწესებულებას, რაც ხშირად დაგვიანებულიც კი იყო და მძიმე შედეგებით მთავრდებოდა. ჩვენ თავიდანვე განვაცხადეთ, რომ ადამიანი, მისი ჯანმრთელობა და სოციალურ სოლიდარობაზე დაფუძნებული საზოგადოების ჩამოყალიბებაზე ზრუნვა ჩვენი პოლიტიკური გუნდის, ჩვენი მთავრობის მთავარი პრიორიტეტი იქნებოდა. ჩვენი მოქალაქეების უზრუნველყოფა ხარისხიანი და ხარჯეფექტური ჯანდაცვის ხელმისაწვდომობით ერთ-ერთი მთავარი გამოწვევა იყო ჩვენი ხელისუფლებისთვის. ჩვენ მიზნად დავისახეთ და მოქალაქეებს შევპირდით, რომ სახელმწიფო იზრუნებდა და არც ერთ თავის მოქალაქეს არ დატოვებდა სამედიცინო მომსახურების გარეშე, ბედის ანაბარა, და ეს პირობა შევასრულეთ. ჩვენი მთავრობის მიერ გატარებულმა რეფორმამ უამრავ ადამიანს შეუმსუბუქა ყოფა და მოუხსნა ფინანსური ტვირთი. საყოველთაო ჯანდაცვის სახელმწიფო პროგრამამ დაახლოებით სამნახევარი მილიონი ადამიანი მოიცვა", - აღნიშნა ღარიბაშვილმა.

მისივე თქმით, მთავრობა მუდმივად იზრუნებს იმისთვის, რომ ქვეყნის მოქალაქეებმა თავი დაუცველად აღარასოდეს იგრძნონ. "დაგეგმილი გვაქვს ახალი კლინიკების აშენება, ხოლო არსებულ კლინიკებს სულ უფრო მივუახლოებთ თანამედროვე სტანდარტებს. განსაკუთრებულ ყურადღებას ვუთმობთ სამედიცინო მომსახურების ხარისხის ამაღლებას და სამედიცინო პერსონალის პირობების გაუმჯობესებას. მაგალითად, სულ ახლახან მთავრობის გადაწყვეტილებით, მიმდინარე თვიდან 30 პროცენტით გაიზარდა სოფლის ექიმისა და ექთნის დაფინანსება. ჩვენი ყოველი შემდეგი ნაბიჯი უნდა ემსახურებოდეს როგორც პაციენტებისთვის, ისე ჩვენი მედიკოსებისთვის ღირსეული პირობების შექმნას", - განაცხადა პრემიერ-მინისტრმა.

ღარიბაშვილმა კონფერენციაზე დემოგრაფიულ პრობლემებზეც ისაუბრა. მისი თქმით, მთავრობის ერთ-ერთი უმთავრესი საზრუნავია ქვეყანაში დემოგრაფიული ვითარების გაუმჯობესება.

"ჩემი ინიციატივით, იქ, სადაც შობადობა დაბალია, და ასეთი 6 რეგიონი გვაქვს, ყოველ მესამე და მომდევნო ახალშობილზე ბარში გაიცემა 150 ლარი, მთაში კი - 200 ლარი. მიმაჩნია, რომ ეს მნიშვნელოვნად შეუწყობს ხელს დემოგრაფიული მდგომარეობის გამოსწორებას", - აღნიშნა პრემიერმა.

მანვე ისაუბრა სახელმწიფო პროგრამაზე, რომელიც მიზნად ისახავს სოციალურ რეაბილიტაციასა და ბავშვებზე ზრუნვას. ღარიბაშვილის განცხადებით, ძალიან მნიშვნელოვანია შეზღუდული შესაძლებლობების ბავშვებზე ზრუნვა.

"ჩვენი მიზანია, ყველა პირობა შევუქმნათ მათ განვითარებისა და სოციალური ინტეგრაციისათვის, არ მოვაკლოთ მათ მზრუნველობა. ჩვენ გავზარდეთ მომსახურების სპექტრი ბავშვთა სპეციალიზებულ დაწესებულებებში და იმედი მაქვს, არც ერთი ბავშვი არ დარჩება განსაკუთრებული ყურადღების გარეშე. მთავრობამ შემოიღო ახალი მომსახურება, რომლის მიზანია მიუსაფარ ბავშვთა თავშესაფრით უზრუნველყოფა. გვაქვს სიახლეც - ზრუნვის პროგრამას დაემატა ახალი ქვეპროგრამა, რომელიც ითვალისწინებს კრიზისულ მდგომარეობაში მყოფი ბავშვიანი ოჯახების გადაუდებელ სოციალურ დახმარებას. ეს პროგრამა საშუალებას იძლევა მივხედოთ სიღატაკეში მყოფ ოჯახებს, რათა აღარავინ დარჩეს გადაუდებელი საჭიროების გარეშე", - განახცადა პრემიერმა.

მანვე დიდი მადლობა გადაუხადა ყველას, რეფორმის ყველა მონაწილეს, მედპერსონალს, ვინც თავდაუზოგავად, წარმოუდგენელი შრომის ფასად ემსახურება ჯანდაცვას.

"ბევრი სკეპტიკურად იყო განწყობილი ჯანდაცვის რეფორმის მიმართ, ბევრი კრიტიკაც იყო, ბევრს დაუჯერებლად მიაჩნდა და შეუძლებელი ეგონა ამ რეფორმის გატარება. მაგრამ ჩვენმა გუნდმა და ბატონმა დავით სერგეენკომ შეძლეს ამ რეფორმის წარმატებით განხორციელება. დღეს უკვე იმ ეტაპზე ვართ, როცა რეფორმასულ უფრო და უფრო იხვეწება და მეტ მომსახურებას მოიცავს. დარწმუნებული ვარ, მალე ჯანდაცვის რეფორმის შედეგები კიდევ უფრო საგრძნობი გახდება და ჩვენი ქვეყნის თითოეული მოქალაქის ჯანმრთელობაზე აისახება", - განაცხადა ღარიბაშვილმა.

"ინტერპრესნიუსი"