თბილისის საბავშვო ბაღებში სათვალთვალო კამერების დამონტაჟება მიმდინარეობს

თბილისის საბავშვო ბაღებში სათვალთვალო კამერების დამონტაჟების პროცესი მიმდინარეობს. როგორც "ინტერპრესნიუსს" საბავშვო ბაგა-ბაღების მართვის სააგენტოს ხელმძღვანელმა რამაზ სულამანიძემ განუცხადა, კამერები მონტაჟდება საბავშო ბაღის შესასვლელში, პერიმეტრზე, ჰოლში, საწყობში, სამზარეულოში. ამასთან, მისივე თქმით, ბაღების ადმინისტრაცია თავად წყვეტს, დაამატოს თუ არა სათვალთვალო კამერები შენობის სხვა მონაკვეთებში.

რამაზ სულამანიძის განმარტებით, სააგენტო სამუშაო ჯგუფებში კამერების დამონტაჟებას არ გეგმავს, თუმცა ბაღის ადმინისტრაციას გადაწყვეტილების დამოუკიდებლად მიღების უფლება აქვს, შესაბამისად, რამდენიმე წელია 15-20 ბაღის ადმინისტრაციამ საკუთარი ინიციატივით, სამუშაო ჯგუფებში კამერების დამონტაჟების გადაწყვეტილება მიიღო.

ამასთან, რამაზ სულამანიძემ "ინტერპრესნიუსთან" საუბრისას ვაუჩერიზაციის პროექტის შესახებ ისაუბრა. კერძოდ, პროექტის განხორციელების შემთხვევაში, ნებისმიერი ბავშვი, რომელიც კერძო ბაღში დადის, სახელმწიფოსგან ვაუჩერს მიიღებს. ამასთან დაკავშირებით შეთანხმება მერიის ახალ ხელმღვანელობასთან მოხდება.

"აღნიშნული პროექტი ყველა ბავშვისთვის, მათ შორის, კერძო ბაღების აღსაზრდელებისთვის ვაუჩერის გაცემას ითვალისწინებს, რათა ბაღის გარეშე თბილისში არც ერთი ბავშვი არ დარჩეს. დღეის მდგომარეობით, სახელმწიფო ბაღებში 50 000-მდე ბავშვის დატევა არის შესაძლებელი. იმის გამო, რომ ბავშვი არ დარჩეს ბაღის გარეშე, კერძო ბაღებშიც შესაძლებელია წაყვეს ვაუჩერი. ეს ჯერჯერობით პროექტია. კონკრეტული თანხა ჯერ ცნობილი არ არის, თუმცა მნიშვნელოვანი შეღავათი იქნება", - აღნიშნა რამაზ სულამანიძემ.

მისივე თქმით, ვაუჩერის ოდენობა ფიქსირებული იქნება და ყველა აღსაზრდელი ერთი და იმავე მოცულობის ვაუჩერს მიიღებს, განურჩევლად იმისა, თუ სად და რომელი რაიონის კერძო ბაღში დადის იგი.

"პრინციპი მარტივია – ყველა ბავშვის თანაბარ პირობებში ჩაყენება. მშობელს შეუძლია თავად გადაწყვიტოს, ვაუჩერი კერძო ბაღში წაიღოს ან ბავშვი სახელმწიფო ბაღში მიიყვანოს", - აღნიშნა რამაზ სულამანიძემ.

მისივე თქმით, პროექტთან დაკავშირებით, გადაწყვეტილების მიღება საკრებულოს ახალ შემადგენლობას მოუწევს.

"ინტერპრესნიუსი"