ზანდუკელის ქუჩაზე მოზარდის გაუპატიურებას ცდილობდნენ?

თბილისში, ზანდუკელის ქუჩაზე, 15 წლის მოზარდის გაუპატიურებას, სავარუდოდ, სამი უცხოელი ცდილობდა. შემთხვევა დღეს დილით მოხდა. როგორც ქუჩის მცხოვრებლები ამბობენ, დილის 8:00 საათზე, 15 წლამდე ბიჭი ყვირილით შევარდა ერთ-ერთ სახლში და დახმარებას ითხოვდა.

"დილის 8 საათი იქნებოდა, კარზე ბრახუნის ხმა გავიგეთ. გავაღეთ კარი, ატყდა წივილ-კივილი, იყო 15-16 წლის მოზარდი ბიჭი, თითქმის შიშველი, პირსახოცი ჰქონდა შემოხვეული და ითხოვდა შველას. რამდენიმე წუთში გაურკვეველი წარმომავლობის უცხოელიც მოვიდა და ბავშვის გაყვანას ითხოვდა, თუმცა არ გავატანეთ. რის შემდეგაც  ერთ-ერთმა უცხოელმა ბავშვს ტანსაცმელი მიუტანა. როგორც მოზარდმა გვითხრა, მისი გაუპატიურების მცდელობა იყო, მან თქვა, რომ სამი უცხოელი იყო და მოტყუებით გამოეპარა მათ. ჩვენ პატრული გამოვიძახეთ, საპატრულო პოლიციის მოსვლამდე ისინი გაიქცნენ", - განაცხადა "ინტერპრესნიუსთან" საუბრისას ერთ-ერთმა თვითმხილველმა.

მისივე ინფორმაციით, მოზარდმა მას უთხრა, რომ თავად "გლდანის გამანაწილებელში" ცხოვრობს, ხოლო უცხოელებს იმიტომ გაჰყვა, რომ სიგარეტს და საკვებს დაპირდნენ.

ამ დროისთვის ზანდუკელის ქუჩაზე კრიმინალისტები მუშაობენ. როგორც ქუჩის მცხოვრებლები ამბობენ, მოზარდი პატრულის თანამშრომლებმა წაიყვანეს.

"ინტერპრესნიუსი"