მიხეილ სააკაშვილი - სპეცრაზმი, რომელიც დონბასში მოქმედებს, გადმოსხმული იყო კოჯრის მიდამოებში თბილისის ცენტრის ასაღებად

საქართველოს ყოფილი პრეზიდენტის, მიხეილ სააკაშვილის განცხადებით, იმან, რაც დღეს უკრაინაში ხდება, აჩვენა, რომ 2008 წელს საქართველოს მთავრობის ქმედება იყო სწორი. ამის შესახებ მიხეილ სააკაშვილმა საპრეზიდენტო ბიბლიოთეკის გახსნის დროს, აშშ-იდან ჩართვისას განაცხადა.

მიხეილ სააკაშვილი ამერიკის შეერთებული შტატების სახელმწიფო მდივნის თანაშემწის, ვიქტორია ნულანდის იმ განცხადებასაც გამოეხმაურა, რომლის მიხედვითაც ერთ-ერთი პირი, რომელიც 2008 წლის ომში საქართველოს წინააღმდეგ იბრძოდა და ახლა აღმოსავლეთ უკრაინაში მოქმედებს, რუსეთის სამხედრო დაზვერვის (ГРУ) აგენტია.

"ამერიკის შეერთებული შტატების სახელმწიფო დეპარტამენტმა დღეს გამოაქვეყნა დოკუმენტური მასალა იმის თაობაზე, რომ ის სპეცრაზმი, რომელიც დონბასში მოქმედებს, იყო იგივე ხალხი, რომელიც მოქმედებდა ცხინვალში. მე კარგად მახსოვს ეს სპეცრაზმი. მაშინდელი ინფორმაციით, ისინი გადმოსხმული იყვნენ კოჯრის მიდამოებში და მათი ამოცანა იყო თბილისის ცენტრის აღება. ჩვენ რომ მაშინ არ გვემოქმედა, დღეს ჩვენ სახელმწიფოებრიობა არ გვექნებოდა. ყირიმი არის სამჯერ დიდი, ვიდრე აფხაზეთი. დონბასი, ყირიმი, ლუგანსკი, ერთად აღებული არის საქართველოზე დიდი. დღეს ეს რუსეთს პრაქტიკულად უბრძოლველად აქვს აღებული. რამდენჯერ უნდა დავრწმუნდეთ, რომ მაშინ მე ვიყავი მართალი? დღეს უკრაინამ, როგორც არასდროს, აჩვენა, ჩვენ რომ მაშინ ხელი არ გაგვენძრია, წინააღმდეგობა არ გაგვეწია, არ გაგვესროლა, არ დაგვეხოცა მათი პირველი რაზმები, საქართველო დღეს აღარ იქნებოდა, როგორც სახელმწიფო. ჩვენ მაშინ გადავარჩინეთ სახელმწიფო და საქართველოს ეროვნულობა, ერთიანობა", - განაცხადა მიხეილ სააკაშვილმა.

"ინტერპრესნიუსი"