"საგზაო ნიშნებს არავინ ვუყურებთ, მაგრამ რადგან წესია, უნდა გაკეთდეს"

გურჯაანში, სამ ქუჩაზე იანვარში დამონტაჟებულ ხელოვნურ უსწორმასწოროებთან საგზაო ნიშნები ჯერაც არ დაუდგამთ. აღნიშნული სამუშაოებისთვის მუნიციპალიტეტმა 3200 ლარი გამოყო, თუმცა ტენდერი ჩაიშალა.

"ტენდერში გამარჯვებული კომპანიის ვალდებულებაა "ბუგაროკებთან" საგზაო, გამაფრთხილებელი ნიშნების დადგმა. ამ ეტაპზე სურვილი არც ერთმა კომპანიამ არ გამოთქვა. თუკი ტენდერი მეორედ გამოცხადების შემდეგაც ჩაიშლება, თანხას დავამატებთ. მძღოლები პრეტენზიას გამოთქვამენ, რომ "ბუგაროკს" ვერ ხედავენ და პრობლემები ექმნებათ, ამ დროს კარგად ვიცით, რომ ნიშანს არავინ ვუყურებთ, მაგრამ რადგან წესია, უნდა გაკეთდეს. თავის დროზე იმიტომ არ მოხდა ყვითელი "შემაფერხებლის" გაკეთება, რომ ეს დიდ თანხებთანაა დაკავშირებული," - განმარტავს გურჯაანის გამგებელი ემზარ ჯიქურაშვილი.

გამგებლისგან განსხვავებული მოსაზრება აქვთ მძღოლებს. მათი თქმით, ქალაქში არსებული ასფალტის "შემაფერხებლები" შეუმჩნეველია, რასაც საგზაო ნიშნების არარსებობა ემატება და გარკვეული პრობლემები იქმნება.

"ეგ "ბუგაროკები" სულ მოსაშორებელია. გარჩევა დღისითაც ჭირს, ღამით კი შეიძლება სხვა მანქანის შუქმა შემოგანათოს, ვერ შენიშნო და მანქანა დაამტვრიო. ყვითელი ბუგაროკები უნდა გააკეთონ ან საგზაო ნიშანი უნდა იყოს, ყურადღებას მაინც მიაქცევდა კაცი. ვინც მაგ გზაზე ხშირად დავდივართ, ჩვენ კი ვიცით, მაგრამ ზოგჯერ სიბნელეში, ჩვენც ვერ ვარჩევთ და უცხო როგორ უნდა მიხვდეს, რომ "ბუგაროკია?", - ამბობენ მძღოლები.

იხილეთ ვრცლად

”სპექტრი”