"ჩემში რაღაც დემონია" - შალვა რამიშვილი ეთერში ჟირაფებთან და სპილოებთან ერთად დაბრუნდება

შალვა რამიშვილი იმ სფეროს უბრუნდება, რომელიც, როგორც თვითონ ამბობს, უფრო შეჰფერის.

აპრილის ბოლოდან, "იმედის" ეთერში "შალვა რამიშვილის შოუ" გავა. "გადაცემა იქნება არაორდინარული და მაყურებელს ვურჩევ, დაებას ტელეეკრანთან. მას ჩვენ ისეთ პროდუქტს შევთავაზებთ, რომ პირს დააღებს და შესაძლოა, კონტროლიც კი დაკარგოს", - ამბობს ჟურნალისტი, სულ ცოტა ხნის წინ - საქართველოს პრეზიდენტის კონსულტანტი და აწ უკვე შოუმენი.

- შალვა, რა დაუდგრომელი ხარ, ერთ ადგილას დიდხანს რატომ ვერ ჩერდები?

- (იცინის) რა ვიცი აბა, ალბათ ბობოქარი სული მაქვს.

- შენი მხრიდან ცოტა უცნაური განაცხადი იყო და იქნებ აგვიხსნა, რა გინდოდა პოლიტიკაში? ისეთი არასტანდარტული ტიპი, რომელიც ჩარჩოებში თითქოს არ თუ - ვერ ჯდება, უცებ ჩინოვნიკი ხდება...

- ბავშვობაში ბოშამ მიმკითხავა და მითხრა, რომ მრავალწახნაგა ცხოვრება მექნებოდა და ერთ-ერთი წახნაგი პოლიტიკური  აღმოჩნდა. ბოშა ქალის სიტყვები გამართლდა და სწორედ იღბლის მეტაფიზიკური გავლენების გამო აღმოვჩნდი  პოლიტიკაში. როცა პოლიტიკაში ხარ, პოლიტიკურ ცენტრთან ახლოს უნდა იყო და ამიტომ აღმოვჩნდი მარგველაშვილის მასობრივი კომუნიკაციების დეპარტამენტის უფროსად.

- უმადლი იღბლის მეტაფიზიკურ გავლენას?

- ეს ბედისწერის მოთხოვნა იყო. მართალი თქვი, რომ ჩემი ჩარჩოებში მოქცევა შეუძლებელია და ამიტომაც ვიცვლი ცხოვრების ყაიდას წელიწადში 2-3-ჯერ.

- იქნებ იმის დამტკიცება გინდოდა, რომ ყველაფერი გამოგდის? ბოლოს და ბოლოს, რას "ჩალიჩობ", თუ იცი?

- ჩემში რაღაც დემონია, რომელიც არ მასვენებს. დემონი არის ჩემში და სოკრატეში.

- გალაკტიონზე თქვა ეგ ტერენტიმ... რატომღა დატოვე პოსტი? ან მისვლა რა იყო, ან - წამოსვლა? ეს გადაწყვეტილება, შემთხვევით, პოლიტიკურ პროცესებს ხომ არ უკავშირდება? იქნებ გვიან მიხვდი, რომ იქ არ იყო შენი ადგილი? ან იქნებ

გამოგიშვეს?

- აი, ეს არის სწორედ ამ დემონისა და ბოშის ნამკითხავების გავლენა. ცხოვრებაში ძალიან ბევრ სფეროს მივედ-მოვედები, მინდა გამოცდილება შევიძინო და მერე განვავრცო. არავის გამოვუშვივარ. გულწრფელად გეუბნები, რომ იქ კი იყო ჩემი ადგილი, მაგრამ სადაც დავბრუნდი, ეს სფერო უფრო შემეფერება.

- ამას რომ მიმხვდარიყავი, მაინცდამაინც პრეზიდენტის კონსულტანტი უნდა გამხდარიყავი? როდის მიხვედი მაგ დასკვნამდე?

- ამას მივხვდი 15 მარტის დილის 12 საათზე. ამას გაგებით შეხვდა ყველა, მათ შორის - მარგველაშვილი და მითხრა, რომ გამომივა. მოდი, შოუზე ვილაპარაკოთ, არ მინდა პოლიტიკურ ნიუანსებზე საუბარი.

- კარგი, ვილაპარაკოთ. რა სახის შოუს წაიყვან?

- შოუ ძალიან საინტერესო და არაორდინარული იქნება და მაყურებელს ვურჩევ, ეკრანთან დაებას, რადგან კომპანიამ, რომელიც ამ გადაცემას ამზადებს, აშშ-ის ერთ-ერთ სტუდიაში შეიძინა მაყურებელზე და მის ქვეცნობიერზე

ზემოქმედების ნეიროლინგვისტური მეთოდი. ეს არის ეფექტიანი კომუნიკაციის ყველაზე ძლიერი და აღიარებული

მეთოდი. ანუ ჩვენ შეიძლება ისეთი ხუმრობებით გავუმასპინძლდეთ მაყურებელს, რომ გაოცებისგან პირი დააღონ და კონტროლიც კი დაკარგონ. ეს შეიძლება ნახევრად ხუმრობით შევთავაზოთ. შოუ 10 წლამდე ბავშვებისთვის რეკომენდებული არ იქნება. ასაკოვნებისთვის კი იმიტომ იქნება სასარგებლო, რომ მაყურებელი ახალგაზრდავდება. გვექნება ბუფონადის ელემენტებიც - ყველა შოუში გვინდა ერთი დიდი ცხოველის გამოჩენა. ახლა იმას განიხილავენ, ეს ცხოველი ჟირაფი იქნება თუ სპილო. ყველა შოუში იქნებიან ბალერინები, რომლებიც განსაკუთრებულ, ექსტრაორდინარულ ცეკვას შეასრულებენ. მიდის მოლაპარაკება და გვინდა მაროკოდან, ტაილანდიდან, ცეილონიდან ჩამოვიყვანოთ არა მსახიობები, არამედ ადგილობრივი კოლორიტული ადამიანები, გლეხები.

ვუყურებ რუსულ შოუებსაც და არსად აქამდე მსგავსი არაფერი ყოფილა. მაგალითად, ცეილონელი ჩაის მკრეფავი. ეს ადამიანები შეასრულებენ თავიანთ ეროვნულ სიმღერებს, ცეკვებს. მე ახლა საიდუმლოებას კი არ გავცემ, ძირითად ნაწილს ჩემთვის ვინახავ, მაგრამ დაახლოებით ასე იქნება.

- ეს ყველაფერი ალბათ დიდ თანხებთან იქნება დაკავშირებული. სპონსორი ვინ იქნება?

- არა, არ ითხოვს დიდ თანხებს. სპონსორი ჯერ არ გვყავს.

- წეღან თქვი, შოუ 10 წლამდე ბავშვებისთვის არ იქნება რეკომენდებულიო. რატომ, პიკანტური თემებისა და ელემენტების გამო, ალბათ?

- ჩვენ გვაქვს იდეა, რომ დავამსხვრიოთ თოვლის ბაბუის მითი. ეს იქნება ძალზე ხმაურიანი მსხვრევა და შეიძლება ნამსხვრევები სტუდიაში და უფრო შორს დაიყაროს. პატარა ბავშვს, რომელსაც სჯერა თოვლის ბაბუის, ამას რომ შეხედავს, შეიძლება არ მოეწონოს. ნუ, არის სხვა მიზეზებიც, რატომაც უნდა მოარიდონ პატარები ამ შოუს. იმედია, ამ ინტერვიუს 5-6 წლის ბავშვები არ წაიკითხავენ.

- შენი აზრით, დღეს საზოგადოებას რა თემები აინტერესებს?

- ჩემი აზრით, ბევრი თემა აინტერესებს საზოგადოებას, მაგრამ აქ მთავარი ეს არ არის. მთავარია, როგორ მივაწვდით მას მაყურებელს. მაგალითად, ჟირაფით სოციალური პრობლემების გაშლა უცდია ვინმეს? ჟირაფის მეშვეობით შეიძლება ტაქსის მძღოლებთან დაკავშირებული პრობლემებიც წარმოვაჩინოთ. ანუ ჩვენ გვექნება ალეგორიული გადასვლები.

- იქნებ მიმახვედრო, ჟირაფით როგორ უნდა წარმოაჩინო სოციალური და ტაქსის მძღოლების პრობლემები?

- როგორ გეკადრებათ, გაიხსენეთ, როგორია ჟირაფი, ტაქსის ტრაფარეტი და რა კავშირში არიან ისინი ერთმანეთთან.

ჩვენი სტილი იქნება ისეთი, რომ მაყურებელი დავაფიქროთ, თავად მივცეთ ფანტაზიის საშუალება და თვი-

თონ მიხვდებიან ყველაფერს.

- რა ერქმევა შოუს და როდის გავა ეთერში?

- "შალვა რამიშვილის შოუ" აპრილის ბოლოდან, შაბათობით გავა ეთერში. ეს იქნება ერთსაათიანი გადაცემა.

რამდენიმე საიდუმლო გავთქვი. შეიძლება ის არც გავაკეთოთ, რაც ვთქვი, შეიძლება უარესიც გამოვიდეს, ვნახოთ... ეს შოუ ძალიან კარგი უნდა გამოვიდეს.

- იმედია, ამ შოუში მაინც დარჩები დიდხანს.

- შოუ დაახლოებით 15-16 წელზე გვაქვს გათვლილი.

- კაცი, რომელიც ცხოვრების ყაიდას წელიწადში 2-3-ჯერ იცვლის, ამ შოუში აპირებს დაბერებას?

- რატომაც არა, ვნახოთ...

ნანა ფიცხელაური

ჟურნალი ”გზა”

(გამოდის ხუთშაბათობით)