"პატრიარქმა ჩვენი შემოქმედებითი ჯგუფი დალოცა" - როდის დაიწყებენ მამა გაბრიელზე ფილმის გადაღებას

ცოტა ხნის წინ საინტერესო ამბავი დავაანონსეთ: რეჟისორი გია კაჭარავა გაზაფხულზე თანამედროვე წმინდანზე, მამა გაბრილზე ფილმის გადაღებას იწყებდა.

"ამბები.გე" პროექტის შემოქმედებით ჯგუფს შეეხმიანა, რომლის წევრებიც დავით ქაცარავა (პროდუსერი) და მისი მეუღლე - სოფო ხაჭაპურიძე (პროექტის პიარ-მენეჯერი) არიან. საინტერესოა, რა მდგომარეობაშია პროექტი, რომლის გადაღებაც გაზაფხულზე უნდა დაწყებულიყო, მით უფრო, რომ საქმე მამა გაბრიელს ეხება. 

- თქვენს გეგმებში რაიმე ხომ არ შეიცვალა?

სოფო ხაჭაპურიძე:

- ფილმის გადაღება, მოგეხსენებათ, როგორი რთული პროცესია. მანამდე კი სერიოზული მოსამზადებელი პერიოდია გასავლელი. ამიტომ ახლა ეგ ეტაპი გვაქვს. თან, ისეთ თემას შევეჭიდეთ, რომ ყველაფერი იდეალურად გვინდა, რომ გამოგვივიდეს... იყო პარტნიორების ძიება, შეხვედრები, შეთანხმებები და ძალიან გამოცდილ კინოკომპანიას ("სარკე") მივაკითხეთ, სადაც კვალიფიციური პროდიუსერები მუშაობენ, მასშტაბურ ფილმებს იღებენ. მათთან კონსულტაციებით იმ დასკვნამდე მივედით, რომ ჩვენი ფილმი არა ორნაწილიანი, არამედ ერთნაწილიანი იყოს. არადა, როგორც იცით, ფილმის რეჟისორ გია კაჭარავას ის ორნაწილიანად და მეტადაც ჰქონდა ჩაფიქრებული. მოკლედ, გვირჩიეს, მის ნაწილებად დაყოფას, ქრონომეტრაჟით ოდნავ გრძელი ფილმი იყოსო. ამიტომ გია კაჭარავას ამჟამად ხელახლა უწევს სცენარზე მუშაობა და ეს პროცესი დროში ცოტა გაიწელება. სერიოზული სამუშაო მიმდინარეობს, ისეთი, ყველაფრის საფუძველი რომ არის. სცენარი თუ არ ვარგა, როგორი უმაგრესი რეჟისორული ნამუშევარიც არ უნდა იყოს,ფილმი არ გამოვა. ძლიერი სცენარი ფილმის საძირკველია.

- გადაღებას გაზაფხულზე გეგმავდით. რას ფიქრობთ ამასთან დაკავშირებით? როდის დაიწყებთ?

- გაზაფხულზე გამოცხადებული კასტინგის თარიღი სცენარის გამო გადავწიეთ. ჯობია ეს პროცესი გაიწელოს და მერე ადვილად წავა ყველაფერი. მოკლედ, სცენარზე ვართ დამოკიდებულები.

- ჩვენი ბოლო შეხვედრიდან ვიცი, რომ კათოლიკოს-პატრიარქმა ილია II-მ ამ ფილმის შესახებ არაფერი იცოდა. ამ მიმართულებით რაიმე თუ შეიცვალა?

- კი, მამა ტარიელის ორგანიზებით (ძალიან სპონტანურად) მოხდა შემოქმედებითი ჯგუფის პატრიარქთან შეხვედრა. იქ ჩემი მეუღლე დავით ქაცარავაც გახლდათ. პატრიარქმა პროექტი დალოცა და ამასთან, შემოქმედებითი ჯგუფის ყველა წვერიც. ჩემი მეუღლე იქიდან საოცარი შთაბეჭდილებებითა და შეგრძნებებით დაბრუნდა. ყველანი ამაღლებულ ხასიათზე იყვნენ.

ლალი ფაცია

სპეციალურად "ამბები.გე"-სთვის

იხილეთ ასევე: ექსკლუზივი: მამა გაბრიელზე ფილმის გადაღება იწყება - დავით ქაცარავა პროექტის დეტალებზე