მათხოვარი ოთარინიო კალაძეს ეძებს - მინისტრის მამის ძველი ნაცნობის გალექსილი, ემოციური მუდარის წერილი

თბილისის ქუჩებში არაერთ ფინანსურად გაჭირვებულ ადამიანს შეხვედებით, რომლებიც თავს მათხოვრობით ირჩენენ. ზოგი მათგანი მოწყალების სანაცვლოდ დაგლოცავთ, ზოგმა შესაძლოა, ხატი გაჩუქოთ. ახლახანს კი გამოჩნდა შუა ხნის მამაკაცი, რომელიც მოწყალების სანაცვლოდ მის მიერ დაწერილ ლექსს გაჩუქებთ...

ლექსის ავტორია ოთარინიო, რომელიც, როგორც შინაარსიდან ირკვევა, კალაძის მამის ძველი ნაცნობია, რომლისგანაც წლების წინ ბევრი სიკეთე ახსოვს. ახლა კი დახმარებას კახი კალაძეს სთხოვს. სათხოვარი კი ისეთივეა, როგორც ათასობით დასაქმების გარეშე დარჩენილის ქვეყანაში - სამსახურის შოვნა. ლექსის ავტორი სწორედ ამ ხერხით ცდილობს ხმა მიაწვდინოს კახი კალაძეს.

ერთ-ერთი, ვინც ოთარინიოსგან მოწყალების სანაცვლოდ მის მიერ დაწერილი ლექსი მიიღო, Ambebi.ge-ს თანამშრომელია. გთავაზობთ ლექსს (სტილი დაცულია) და ვიმედოვნებთ, რომ ასე უფრო გავუმარტივებთ ავტორს ხმა მიაწვდინოს ადრესატს.

კახი კალაძეს

მთავრობამ ნდობა გამოგიცხადა

რუსებმაც კი თქვეს მალადეც,

დაბადების დღეს გილოცავ

ვიც-პრემიერო კალაძევ!

შენთვის ყოველთვის ვიქნები

მუდამ ყურადღებიანი,

ჩემზე ბევრად მდიდარია

ჟორჟიკ ამბარცუმიანი.

კახა თავმდაბალი ხარ,

კეთილი ხარ და ჭკვიანი,

არჩევნებზე შემოვხაზე

ორმოცდაერთიანი.

მამაშენი ადრიან წლებში

მაკითხებდა გაზეთებს,

დინამოში რომ იყავი

მჩუქნიდა ათ მანეთებს.

ჩემო კახა, გენაცვალე

მინდა მქონდეს სამსახური,

ფულის თხოვნა სირცხვილია

საკუთარი მინდა ფული.

კახა, გთხოვ, გემუდარები

იქნებ სადმე დამასაქმო,

ლუკმა პურის ფული მქონდეს,

დაგილოცავ ოჯახს, საძმოს (დემეს და კობის).

ავტორი - ოთარინიო

ასევე დაგაინტერესებთ: კახა კალაძის სტილის ევოლუცია და უცნობი ფოტოები (+15 PHOTO)