დაკავებული ქართველი ჟურნალისტების ადგილსამყოფელი ამ დრომდე უცნობია

რუსი ოკუპანტების მიერ დაკავებული ქართველი ჟურნალისტების ადგილსამყოფელი ამ დრომდე უცნობია, - ამის შესახებ "ინტრეპრესნიუსს" ტელეკომპანია "TV 3"-ის მთავარმა პროდიუსერმა მაია ჭუჭულაშვილმა განუცხადა.

მისივე თქმით, მათთვის უცნობია, გადაიყვანეს თუ არა ჟურნალისტები ცხინვალში, რადგან მათთან კონტაქტზე გასვლა ამ დრომდე ვერ ხერხდება.

მაია ჭუჭულაშვილის ინფორმაციით, ტელეკომპანიის გადამღები ჯგუფი აძვში საზღვრის გადმოწევის ფაქტის გასაშუქებლად იყო წასული და 17:00 საათზე ჟურნალისტს ადგილიდან ჩართვა უნდა ჰქონოდა, თუმცა მასთან კავშირი შეწყდა.

მისივე თქმით, ამის შემდეგ გადამღებ ჯგუფთან დაკავშირება ამ დრომდე ვერ მოხერხდა. მომხდარის შესახებ კი ტელეკომპანიის ხელმძღვანელობისთვის ცნობილი მძღოლის მეშვეობით გახდა, რომელიც მოშორებით იმყოფებოდა. შესაბამისად, მაია ჭუჭულაშვილის განცხადებით, მათთვის უცნობია, რა გახდა გადამღები ჯგუფის დაკავების მიზეზი.

როგორც ჭუჭულაშვილმა აღნიშნა, საქმის კურსშია უკვე შინაგან საქმეთა სამინისტრო, საგარეო საქმეთა სამინისტრო და ევროკავშირის სადამკვირვებლო მისია.

დაკავებულია ტელეკომპანია "TV 3"-ის გადამღები ჯგუფი - ჟურნალისტი ბელა ზაქაიძე, ოპერატორი ვახო ლეკიაშვილი და ტელეკომპანიის ტექნიკური თანამშრომელი მიხეილ მიხოევი.

"ინტერპრესნიუსი"