თაღლითური ბადე - როგორ ატყუებენ ამერიკაში დასაქმების მსურველ ქართველებს

"ფეისბუქში" დარეგისტრირებული გვერდი "ამერიკის მწვანე ბარათის - "გრინქარდის" ლატარეა და სავიზო მომსახურება" თაღლითურ ბადეს ამხელს, რომელიც ქართველების ალიასკაზე დასაქმებას უკავშირდება. გვერდზე გამოქვეყნებულ ინფორმაციას უცვლელად გთავაზობთ:

თაღლითური ბადე - "დასაქმება ალიასკაზე"

ამერიკაში სამუშაოდ და საცხოვრებლად წასვლის ბევრი მსურველი არსებობს ჩვენს ქვეყანაში. საქართველოში უკვე დიდი ხანია მუშაობს თაღლითური სქემა, რომლის მიხედვითაც გარკვეული პირები ამერიკის ალიასკაზე ან სულაც კანადაში თევზის გადამამუშავებელ ქარხანაში ან სხვა ტიპის საწარმოში დასაქმებას გპირდებიან.

ტიპიური რეკლამა შემდეგნაირად გამოიყურება: "დასაქმება ალიასკაზე (ამერიკა) თევზის და ზღვის ნობათის გადასამუშავებელი ქარხანა. 6 თვიანი ან 1 წლიანი კონტრაქტი. ასაკი 21 - 55. აუცილებელია რუსული ენის ცოდნა".

ახლა აგიხსნით სქემა როგორ მუშაობს: პირველ რიგში ალბათ გთხოვენ პასპორტების ან პირადობის ორიგინალების ან ასლების მიტანას, შემდეგ სხვა დამატებით საბუთებს. ჯერ უნდა ინგლისურად თარგმნოთ და მიიტანოთ გარკვეული დოკუმენტები (ხშირად საკმაოდ ბევრ საბუთებს გაგროვებინებენ). ეს ეფექტისთვის კეთდება, რომ ვითომ მართლა აკეთებენ რაღაცას. შემდეგ ყველაზე საინტერესო - ამასთან ერთად უნდა მიიტანოთ გარკვეული თანხა - 500 დოლარი ან 1000 ლარი, შეიძლება მეტი ან ნაკლები, გააჩნია ვინ რამდენს ითხოვს. ჩააბარებთ ამ საბუთებს და ფულს და იწყება მოლოდინი ანუ თქვენი დოკუმენტების განხილვის პროცესი, რომლებიც ვითომ იგზავნება ამერიკაში და მათ იქ გადახედავენ, განიხილავენ და გადაწყვეტენ აგიყვანონ თუ არა სამსახურში.

...ასე გადის 1, 2, ან 3 თვე. შემდეგ გეკონტაქტებიან და გეტყვიან. თქვენს საბუთებს სამწუხაროდ უარი ეთქვაო. ზოგჯერ რაღაც ზღაპრული მიზეზი მოჰყავთ, ზოგჯერაც მიზეზს სულ არ გეუბნებიან. ყველაზე საინტერესო და თქვენი ნდობის მოსაპოვებელი იარაღი არის ის, რომ თქვენს მიერ მიტანილ თანხას უმეტეს შემთხვევაში 100%-ით გიბრუნებენ უკან.

გილოცავთ! თქვენ უპროცენტოდ გაასესხეთ თანხა, რომლითაც თაღლითმა იხეირა.

სავარაუდოდ ალბათ გაჩვენებენ დამადასტურებელ ფოტოსურათებს და ვიდეოებსაც კი ინტერნეტში, YouTube-ზე ან სხვა საიტებზე, რომლებშიც ნაჩვენებია თუ როგორ მუშაობს იქ ჩასული ხალხი. ეს თაღლითური სქემა რუსეთიდან შემოვიდა. მიუხედავად იმისა, რომ უკვე ის მრავალი წელია არსებობს, ხალხი მაინც ებმება მათ ბადეში.

საინტერესოა თქვენი აზრის მოსმენა თუ გქონიათ შეხება მსგავს სქემასთან. გავაფრთხილოთ ერთმანეთი და გავუფრთხილდეთ ერთმანეთს!".