თინა ხიდაშელმა ევროსაბჭოს საპარლამენტო ასამბლეაზე საქართველოსთვის დაწესებული სანქციის მოხსნა მოითხოვა
დეპუტატმა თინა ხიდაშელმა ევროსაბჭოს საპარლამენტო ასამბლეის სხდომაზე საქართველოსთვის დაწესებული სანქციის მოხსნა მოითხოვა.
ხიდაშელი ევროპელი ლიბერალების სახელით გამოვიდა და განაცხადა, რომ გასული წლის ნოემბერში, ევროსაბჭოს საპარლამენტო ასამბლეის ბიუროს მიერ მიღებული გადაწყვეტილება საქართველოსთვის სანქციის დაკისრების შესახებ, დაუსაბუთებელი და გაუგებარი იყო.
"ვფიქრობ, დღევანდელ ვითარებაში რეალობა უფრო დრამატულად და ნათლად გამოჩნდა. ამ კვირაში მოგვიწევს, კენჭი ვუყაროთ იმ ადამიანებისთვის ხმის უფლების ჩამორთმევას, ვინც წლების მანძილზე სხვადასხვა ქვეყნების ოკუპაციას აძლევდა ხმას, მათ შორის საქართველოს და მოლდოვას ოკუპაციას, ვინც მხარი დაუჭირა დამოუკიდებელი ქვეყნის, უკრაინის, ნაწილის ანექსიას. იმედს ვიტოვებ, ასამბლეა არ უღალატებს იმ ფუნდამენტს და ფილოსოფიას, რომელზეც ეს ორგანიზაცია შეიქმნა და კენჭისყრა რუსეთის დელეგაციისთვის ნეგატიურად დასრულდება", - განაცხადა თინათინ ხიდაშელმა.
საქართველოს პარლამენტის წევრის სიტყვით გამოსვლის პასუხად, ევროსაბჭოს საპარლამენტო ასამბლეის ბიუროს წარმომადგენელმა და მომხსენებელმა ნატაშა ვუჩკოვიჩმა განაცხადა, რომ საქართველოსთვის დაწესებული სანქციის მოხსნის საკითხის განხილვას ბიურო შემდეგ სხდომაზე დაუბრუნდება.
სტრასბურგში ევროსაბჭოს საპარლამენტო ასამბლეის სხდომა მიმდინარეობს, სადაც ევროპარლამენტარებმა 9 და 10 აპრილს უკრაინის მხარდამჭერი რეზოლუციისა და რუსეთისთვის ხმის უფლების ჩამორთმევის შესახებ გადაწყვეტილება უნდა მიიღონ.
ევროსაბჭოს საპარლამენტო ასამბლეის ბიუროს გადაწყვეტილებით, საქართველოში ორი წლის განმავლობაში, ევროსაბჭოს საპარლამენტო ასამბლეის ეგიდით შეხვედრები არ უნდა გაიმართოს. ამ სანქციით ბიურომ გაითვალისწინა საპროცედურო წესების კომიტეტის მოსაზრება ორი რუსი დეპუტატის საქმესთან დაკავშირებით, რომელსაც საქართველოში საპრეზიდენტო არჩევნებზე დაკვირვების უფლება არ მიეცა.
LIVE: გია ხუხაშვილი "ნიუსრუმიდან"
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
