1
ივნისიდღის ზოგადი ასტროლოგიური პროგნოზი
ფობია რაიმე სიტუაციის, საგნის ან საქმიანობის მიმართ ძლიერი პანიკური შიშია. ფართოდ გავრცელებული ფობიების გარდა, იშვიათი შიშებიც მრავლადაა... რა უცნაური ფობიებია ამჟამად გავრცელებული საქართველოში? -ამ კითხვით მივმართეთ ფსიქოლოგ ლილი ხეჩუაშვილს.
- მეტად უცნაური ფობია სჭირდა ჩემს 23 წლის პაციენტს. ახალგაზრდა ქალს პანიკურად ეშინოდა პეპლების, რომელიც სრულიად უწყინარი და მშვენიერია. იმის გაფიქრებაც კი ზარავდა, როგორ აქნევს პეპელა ფრთებს. მყოლია პაციენტები, რომელთაც აგორაფობია, ანუ ხალხმრავალი ადგილების, გაშლილი სივრცის შიში ჰქონიათ ანუ ხალხის კი არ ეშინიათ, არამედ ფრთხილობენ, რაიმე ისეთი არ დაემართოთ, რომ ვერავინ უშველოს, სახლში ვერ მიბრუნდნენ, ამას თან პანიკური შეტევაც ახლავს.
ასევე, საკმაოდ გავრცელებულია აგორაფობიის ისეთი სახე, როგორიცაა დიდი სავაჭრო ცენტრების, მოლების შიში. გვქონია შემთხვევები, როცა პაციენტი ტრანსპორტში ჩაჯდომას, სახლიდან გასვლას გაურბის. გვხვდება სოციალური ფობიაც - ადამიანებთან ურთიერთობის, ახალი ადამიანების გაცნობის შიში. ამ ადამიანებს კინოთეატრში ჯდომა და ფილმის ყურება არ შეუძლიათ, არც ბილეთის რიგში დოგმა. არსებობს მობილურის არქონის აკვიატებული შიშიც, ეს შეიძლება აგორაფობიის, პანიკური შეტევის სიმპტომი იყოს, ანუ მობილური არ მაქვს, დაკარგული ვარ, ვერ დავურეკავ იმათ, ვისი იმედიც მაქვს, უცხო ადგილას უცებ რაიმე არ დამემართოს და ა.შ.
ადამიანებს ხშირად იპყრობს საჯარო გამოსვლების შიში, ანუ როცა მას ერთი შეხედვით, კომუნიკაციის პრობლემა არა აქვს, მაგრამ დიდი აუდიტორიის წინაშე ენა უვარდება და სიტყვას ვერ ძრავს, როგორი ენაწყლიანი არ უნდა იყოს, უნივერსიტეტში ვასწავლი და ასეთი რამ ხშირია ჩემს სტუდენტებში.
არსებობს ქლოუნფობია, - კლოუნების შიში, ეს უფრო ბავშვობის მწარე გამოცდილებიდან მოდის, როცა შენ პატარა ხარ და თავზე უშველებელი ჯამბაზი დაგყურებს, მოხატული სახით, შეიძლება შეგეშინდეს. ილუზორული საფრთხის მატარებელ ობიექტად შეიძლება ყვავილიც კი იქცეს. არც თუ იშვიათად გვხვდება აუტოფობია, საკუთარი თავის შიშს რომ უწოდებენ. სინამდვილეში, ეს უფრო მარტოობის, მარტო დარჩენის შიშია, ასევე შიში, რომ ეგოისტად არ ჩამოყალიბდე. არსებობს ციფრების შიში, მაგალითად, ტეტრაფობია - ოთხიანის შიში, ანუ ამ ციფრს რაღაცას უკავშირებ და პანიკა გიპყრობს..
ჩვენს რეალობაში ყველაზე გავრცელებული ფობიები კი სიმაღლის, დახურული სივრცის, ასევე, ობობების, გველების, თაგვის შიშია. ხდება ხოლმე, როცა ადამიანს საწინააღმდეგო სქესისა ეშინია, მაგალითად ზიგმუნდ ფროიდი ქალებს გაურბოდა, თუმცა, ჩემს პრაქტიკაში ამგვარი შემთხვევა არ მქონია..
ნინო კვიტაშვილი, Ambebi.ge
