26
მაისიდღის ზოგადი ასტროლოგიური პროგნოზი
თბილისში უნივერსიტეტის მაღლივ კორპუსთან ახალი მეტროსადგურის მშენებლობაზე ტენდერი უახლოეს მომავალში გამოცხადდება , - ამის შესახებ განცხადება საქართველოს მუნიციპალური განვითარების ფონდის ხელმძღვანელმა, ელგუჯა ხოკრიშვილმა დღეს, პრესკონფერენციაზე გააკეთა.
ხოკრიშვილის თქმით, მუნიციპალური განვითარების ფონდმა გუშინ დაასრულა მშენებლობის პროექტთან დაკავშირებული სამმხრივი მოლაპარაკებები, რომელსაც ფონდი თბილისის მეტროპოლიტენსა და ესპანურ კომპანია "ევროსტუდიოსთან" აწარმოებდა.
"მოლაპარაკების დასრულებისა და პროექტის ირგვლივ მიღწეული შეთანხმების დასადასტურებლად, საქართველოში აზიის განვითარების ბანკის წარმომადგენელი ჩამოვიდა. თბილისის მეტროპოლიტენის ახალი სადგურის მშენებლობას სწორედ აზიის განვითარების ბანკი აფინანსებს. მხარეებს შორის შეთანხმება საქრათველოს მუნიციპალური განვითარების ფონდს აძლევს შესაძლებობას, მეტროსადგურის მშენებლობაზე ტენდერი გამოაცხადოს. ახალი სადგურის მშენებლობაზე ტენდერი უახლოეს დღეებში გამოცხადდება", - განაცხადა ხოკრიშვილმა.
მისივე თქმით, უკვე ორშაბათს სრული პროექტი და სატენდერო პაკეტი მზად იქნება, რომელიც გადაეგზავნება მერიას საბოლოოდ შესათანხმაბელად, რის შემდეგაც აზიის განვითარების ბანკის პროექტი კიდევ ერთხელ დამატებით შემოწმებას გაივლის.
ხოკრიშვილის ინფორმაციით, პროექტის ღირებულება კონფიდენციალურია, თუმცა ღირებულება სავარაუდოდ 35-42 მილიონი ევროს ფარგლებში იქნება. პროექტი 2 წელში უნდა დასრულდეს, რის შემდეგაც, ხოკრიშვილის თქმით, ის გადაეცემა მერიის სატრანსპორტო სამსახურს და მერია მიიღებს გადაწყვეტილებას, რა სახელს დაარქმევენ ახალ სადგურს.
პროექტს აზიის განვითარების ბანკი აფინანსებს, სახელმწიფოს თანადაფინანსება - 15%-ს შეადგენს.
