4
ივნისიდღის ზოგადი ასტროლოგიური პროგნოზი
"საქართველოს წაართვეს ორი ტერიტორია და უფრო შორს წასვლაც შეიძლებოდა, მედვედევი რომ არ გაჩერებულიყო. ავიღებდით თბილისსაც. ქართველები, სინამდვილეში, ძალიანაც იმედგაცრუებულნი არიან, რომ ეს არ გავაკეთეთ. ისინი აღიარებენ ძალას - ემორჩილებოდნენ თურქებს, ირანელებს, რუსებს და ჩვენ არცთუ ყველაზე ცუდი ვარიანტი ვართ", - ამის შესახებ რუსი ფილოსოფოსი, პუტინის მმართველობის მთავარ იდეოლოგად მიჩნეული ალექსანდრე დუგინი ჯერ კიდევ 2010 წელს წერდა.
თბილისის აღებისთვის მადლობას ეტყოდნენ თუ არა, ძნელი სათქმელია, მაგრამ თუ იმ რამდენიმე ქართველის მოსაზრებას, რომლებიც ალექსანდრე დუგინს "ევრაზიული კავშირის" პროპაგანდისთვის ემადლიერებიან, დანარჩენ საქართველოზე განაზოგადებს, გასაგებიც კია, საიდან მოსდის ასეთი აზრები თავში რუს ექსპერტს.
ასე მაგალითად, Facebook-ში დუგინმა საკუთარ გვერდზე ვიდეო, სახელწოდებით - "საქართველო ნატოში ვერ შევა!" გააზიარა. მასში ასახულია 28 მარტს თბილისში, "რია ნოვოსტის" პრეს-კლუბში "ევრაზიული კავშირის" თაობაზე გამართული ტელეხიდი და შენობის გარეთ მიმდინარე საპროტესტო აქცია. დუგინმა აღნიშნულ ვიდეოს თავისი კომენტარი წაუმძღვარა, სადაც საქართველოს ევრაზიულ კავშირში გაწევრიანების ერთ-ერთ მთავარ მომხრეს და "ერეკლე მეორეს საზოგადოების" ხელმძღვანელს არჩილ ჭყოიძეს გმირად მოიხსენიებს და ნატო-ს მომხრეების წინააღმდეგ ბრძოლისთვის ხოტბას ასხამს.
"საქართველოს ევრაზიული გმირი - არჩილ ჭყოიძე ანტლანტისტებთან ბრძოლაში. ყველაზე რთული რეგიონი. ბრავო, არჩილ! ევრაზია ყველაფერზე მაღლაა!", - წერს ალექსანდრე დუგინი. არჩილ ჭყოიძის სამადლობელმა პასუხმაც არ დააყოვნა: "პატივცემულო ალექსანდრე გელიევიჩ, მადლობა თბილი სიტყვებისთვის. თქვენი შრომისა და ლექციების დახმარებით მე მივხვდი, რაში მდგომარეობს ევრაზიულობის ჭეშმარიტი არსი. მე დარწმუნებული ვარ, რომ მალე ამას ბევრი ჩემი თანამოქალაქე მიხვდება. თქვენი მხარდაჭერა შეუფასებელია ჩვენთვის, განსაკუთრებით იმ რთული ვითარების ფონზე, რომელიც დაგვიტოვა ყოფილმა პრეზიდენტმა და მისმა აგრესიულმა გუნდმა. კიდევ ერთხელ მადლობა".
"ამებები.გე" არჩილ ჭყოიძეს დაუკავშირდა, რომელმაც დაუდასტურა, რომ ზემოაღნიშნული კომენტარი მას ეკუთვნის და იგი დუგინის ოფიცილურ გვერდზე დაწერა. ხოლო კითხვაზე - რამდენად მისაღებია მისთვის ალექსანდრე დუგინის იმპერიალისტური ხედვები, ჭყოიძე განმარტავს:
"დუგინის განცხადებები, 2008-2009 წელს რაც იყო, როცა სააკაშვილმა დაიწყო კონფლიქტი, აბსოლუტურად სხვა განცხადებებია. მაშინ დუგინის მხრიდან იყო საკმაოდ მწვავე განცხადებები საქართველოსთან მიმართებაში, თუმცა თუ თქვენ ნახავთ დუგინის განცხადებებს იგივე 2012 წელს, 2013 წელს, როცა გორში პირდაპირ ეთერში ჩავრთეთ, მან ასეთი რამ თქვა, რომ თუ საქართველო უარს იტყვის ნატო-ზე და შევა ევრაზიულ კავშირში, ყველა მავთულხლართის მომენტალურად აღება მოხდება და რუსეთი დაიწყებს დიალოგს აფხაზებთან და ოსებთან, რათა ისინი საქართველოს შემადგენლობაში დაბრუნდნენ.
ამიტომ მხოლოდ იმაზე საუბარი, დუგინი რას ამბობდა 2009 წელს, არასწორი იქნება… დღესდღეობით საქართველო არის დამოუკიდებელი?! ხომ ვხედავთ, რომ ხან რომელი დასავლეთ ევროპის ლიდერი მოგვცემს შენიშნვას და მითითებას, ხან - რომელი. ამერიკის გავლენაზე კი ლაპარაკიც ზედმეტია. ამერიკის ელჩი რიჩარდი ხშირ შემთხვევებში პრაქტიკულად თანამდებობებზე ნიშნავს ადამიანებს და უხეშად ერევა საქართველოს საშინაო საქმეებში", - აცხადებს ჭყოიძე, თუმცა საიდან აქვს ინფორმაცია, რომ აშშ-ს ელჩი საკადრო პოლიტიკაში ერევა, არ აკონკრეტებს."ამერიკის გავლენა რომ არის საქართველოში, იყო და კიდევ უფრო ძლიერდება, ეს რეალობაა. თუმცა, მიუხედავად იმისა, რომ ყურმოჭრილი მონა იყო როგორც წინა ხელისუფლება, ისე თითქმის ასეთივედ რჩება ახალიც, თქვენ ნახეთ ბარაკ ობამას განცხადება, რომ არ მოხდება ნატო-ს გაფართოება და მეტიც, საქართველო და უკრაინა არც კი ადგანან ნატო-ს გზას. ეს რას ნიშნავს, რომ ჩვენ ტყუილად დავხოცეთ ის ბიჭები, რომლებიც ავღანეთში იცავდნენ ვითომდაც მშვიდობას, ტყუილად გვყავდა ერაყში სამშვიდობო კონტინგენტი, ტყუილად ვუშვებთ ახლა აფრიკაში, ნატო-ში მაინც არავინ გვიღებს. ამიტომ თუ ჩვენი ქვეყანა ევრაზიის კავშირში გაწევრიანებით შეძლებს ტერიტორიების დაბრუნებას, ეკონომიკის წინსვლას, სოფლის მეურნეობის პროდუქტების ძვირად გაყიდვას ევრაზიულ ბაზარზე - რატომაც არა?! რა მნიშვნელობა აქვს, ჩვენ რამე სიტყვა გვაქვს ამოჩემებული, რომ ნატო უნდა ერქვას ან ევროკავშირი? ჩვენ უნდა ველაპარაკოთ იმ ქვეყანას, რომელსაც შეუძლია საქართველოს ტერიტორიული პრობლემის მოგვარება და ეს არის რუსეთი", - განაცხადა არჩილ ჭყოიძემ.
ამასთან, ის არ მიიჩნევს, რომ ევრაზიული კავშირში გაწევრიანება საქართველოს სუვერენიტეტს შელახავს და თვლის, რომ აღნიშნული ორგანიზაცია ისეთივე მეტნაკლებად თანასწორ უფლებებზე დაფუძნებული კავშირი იქნება, როგორც ევროპის კავშირი.
"თუ დომინანტობაზეა ლაპარაკი, ევროკავშირსაც ჰყავს თავისი დომინანტი ქვეყანა - გერმანია. ევრაზიულ კავშირში დომინანტი ქვეყანა რაღაც დონეზე შეიძლება იყოს რუსეთი, თუმცა მე ვფიქრობ, რომ ეს არ იქნება იმ დონეზე, რომ საქართველოს ან სუვერენიტეტს ან კულტურას რაიმე სახით ხელი შეუშალოს, აი, ევროკავშირში შესვლით კი ძალიან ბევრ რამეს დავკარგავთ. ჯერ ერთი, იქაც არავინ მიგვიღებს, ამიტომ უნდა შევხედოთ პრაგმატულად სიტუაციას და ჩვენი ქვეყნისთვის რაც იქნება უკეთესი, ისე მოვიქცეთ. ამიტომ, დუგინი იქნება თუ პუტინი იქნება, ჩვენ უნდა ერთ რამეს შევეგუოთ კიდეც და ვიფიქროთ ასე - უნდა მოველაპარაკოთ პუტინს, დუგინს, "ედინაია როსიას" დეპუტატებს - იმ ხალხს, ვისაც ჩვენი პრობლემების გადაწყვეტა შეუძლია", - განაცხადა არჩილ ჭყოიძემ და დასძინა, რომ დღესაც კი, როდესაც დიპლომატიური ურთიერთობა არ არსებობს და რუსეთი ოკუპანტად არის მოხსენიებული, რუსეთიდან საქართველოში გაცილებით მეტი თანხა შემოდის, ვიდრე სხვა ქვეყნებიდან.
"ამბები.გე" დაინტერესდა, რუსეთიდან შემოსულ თანხებს შორის "ერეკლე მეორეს საზოგადოების" დაფინანსებაც თუ იგულისხმება, თუმცა არჩილ ჭყოიძე კატეგორიულად უარყოფს ინფორმაციას იმის შესახებ, რომ მისი ორგანიზაცია ან "ევრაზიის ინსტიტუტი", რომლებიც ბოლო დროს საქართველოში რუსეთის მხარდამჭერ აქციებს აწყობენ, სწორედ დუგინის ფონდიდან ფინანსდებიან.
"ეს არის აბსოლუტური სიცრუე. რომ ფინანსდებოდეს გნებავთ დუგინისგან, გნებავთ პუტინისგან და გნებავთ, რუსეთის ნებისმიერი სხვა სტრუქტურისგან, ნამდვილად არ დავმალავდი, იმიტომ რომ ამაში დასამალი არაფერია. ერთადერთი ორგანიზაცია, რომელმაც ორი საგანმანათლებლო პროექტი დაუფინანსა "ერეკლე მეორეს საზოგადოებას", ეს იყო "ФОНД РУССКИЙ МИР", რომელიც რუსეთის ფარგლებს გარეთ რუსული ენის, კულტურის, ხელოვნების პროპაგანდას ეწევა. თითო გრანტი შეადგენდა 12 000 დოლარს და იყო გაწერილი ექვს თვეზე. ისე კი, ნამდვილად თუ ვინმე დაგვაფინანსებს რუსეთიდან, არ დავმალავ და საზოგადოებისთვის იმ დღესვე ყველაფერი გამჭვირვალე გახდება", - განაცხადა არჩილ ჭყოიძემ.
რაც შეეხება ალექსანდრე დუგინს, ის არის ავტორი რუსული ნეოიმპერიალისტური იდეისა, რომელიც ევროკავშირზე პროტექტორატის დამყარებასა და რუსეთისგან ახალი ბიზანტიური იმპერიის შექმნას ითვალისწინებს.
"ამ იდეის დედაარსი გახლავთ, რომ ჩვენ უნდა დავიპყროთ ევროპა, მივიტაცოთ და მივიერთოთ... გავიხსენოთ დიდი პოეტი ტიუტჩევი, რომელიც მსგავს კონცეფციას ავითარებდა XIX საუკუნეში. ის მიიჩნევდა, რომ რუსეთის იმპერიას უნდა დაეპყრო ევროპა, რუსი მეფე საერთო ევროპული მეფე უნდა ყოფილიყო და ე.ი. ბიზანტიის იმპერიის ამაღორძინებელი. შეიძლება ევროპელებს მიეცეთ მაღალი ხარისხის ავტონომია ამ გლობალური მესამე რომის იმპერიის ფარგლებში.
მართლმადიდებლობა მშვენივრად მოილაპარაკებს კონსერვატიულ კათოლიკურ წრეებთან. ევროპული ელიტა - ნიცშე, შპენგლერი - მნიშვნელოვანწილად ფიქრობდნენ ევროპის ძლიერი და კონსერვატიული რუსეთისათვის გადაცემაზე. ასე რომ, რომელიღაც მეხუთე პრორუსული კოლონა ევროპაში გარანტირებული გვაქვს. აბა, შევხედოთ ევროპის შეიარაღებულ ძალებს - ისინი თითქმის ნულის ტოლია. ვთქვათ, არსებობს ნატო. მაგრამ, საქმე ის გახლავთ, რომ ნატო-ს ბლოკი მძაფრ ოპერაციებში, როგორც დავინახეთ სამხრეთ ოსეთსა და აფხაზეთში, არ ერევა. ჩვენ წავეკიდეთ მათ მეგობარ სააკაშვილს, მოვუგეთ მას და პასუხად მხოლოდ თუხთუხი და ამერიკული ბალეტი დავინახეთ შავ ზღვაზე, ნატო-ს ამერიკულ კრეისერებზე. მერედა რა? სამხრეთ ოსეთიც და აფხაზეთიც ჩვენ დაგვრჩა! ასე რომ, ევროპას ჩვენ შევთავაზებთ თავისთავადობას, ოღონდ იქ ჩვენს პროტექტორატს დავამყარებთ და – მორჩა", - წერს ალექსანდრე დუგინი და არ მალავს, რომ "დიახ, რუსეთს მოუხდება მეხუთე კოლონის მოძებნა, შექმნა და მისი წინ წაწევა, თავისი ხალხის გაყვანა ევროპის ხელისუფლებაში და "გაზპრომის" ფულით სარეკლამო სააგენტოების შეძენა ევროპულ გამომცემლობებში", - წერს დუგინი.ნანა ჩიჩუა, Ambebi.ge
