10
ივნისიდღის ზოგადი ასტროლოგიური პროგნოზი
ბათუმში, 26 მაისის ქუჩაზე, 10 წლის მოზარდთან სექსუალური ძალადობის გამო 74 წლის მამაკაცი, ტაქსის მძღოლი დააკავეს.
როგორც "ამბები.გე"-სთვის გახდა ცნობილი, მამაკაცმა მოზარდი ტაქსში მოტყუებით ჩასვა. მამაკაცი მას გაკვეთილების მომზადებაში დახმარებას დაპირდა. 10 წლის ბავშვი ავტომობილში ჩაჯდომაზე უარს არ იტყოდა რადგან, როგორც 26 მაისის ქუჩაზე მცხოვრებლები აცხადებენ, "აქ ყველა ყველას იცნობს" და მამაკაცისგან, რომელიც წლების განმავლობაში მასწავლებლად მუშაობდა, დახმარება არ მოერიდებოდა.
ტაქსის მძღოლები, რომლებიც ამავე ქუჩაზე აჩერებენ ავტომობილებს, მომხდარის შესახებ საუბარს ერიდებიან და აცხადებენ, რომ მათთვის გაუგებარია რა მოხდა. მძღოლები 74 წლის მამაკაცს დადებითად ახასიათებენ და ამბობენ, რომ "ის ამის ჩამდენი არ იყო".
დაზარალებული მოზარდის დედა თურქეთში სამუშაოდ იმყოფება, მამა ბავშვებთან ერთად ცხოვრობს. ის დღეს ალკოჰოლის მოქმედების ქვეშ იმყოფებოდა და ჟურნალისტებთან საუბარი არ ისურვა. როგორც ოჯახის გარშემომყოფები აცხადებენ, მამაკაცი ხშირად სვამს და 10 და 15 წლის მოზარდებზე ძირითადად, 10 წლის ბავშვის ნათლია ზრუნავს. დღეს, ნათლიამ მომხდარის შესახებ საუბარი არ ისურვა. მან მხოლოდ ის აღნიშნა, რომ ბავშვი შეშინებულია.
ჟურნალისტებთან საუბარი დაკავებული მამაკაცის ოჯახის წევრებმაც არ ისურვეს. შინაგან საქმეთა სამინისტროს ინფორმაციით, ბათუმში მოზარდთან სექსუალური ძალადობის გამო ტაქსის მძღოლი 140-ე და 141-ე მუხლების შესაბამისად დააკავეს. 140-ე მუხლი 16 წლის ასაკის მიუღწეველთან სექსუალური სახიათის ქმედებას გულისხმობს, 141-ე კი - გარყვნილ ქმედებას.
ცოტა ხნის წინ ბათუმის საქალაქო სასამართლოში დაკავებულის სასამართლო პროცესი დასრულდა. ბათუმის საქალაქო სასამართლოს მოსამართლე დავით მამისეიშვილმა მოზარდის გაუპატიურების მცდელობაში ბრალდებული დ. ფ. პატიმრობაში დატოვა. მოსამართლემ პროკურორის შუამდგომლობის საფუძველზე საკითხის კონფიდენციალობის და იმის გამო, რომ საქმეში არასრულწლოვნი ფიგურირებდა, სხდომა ნაწილობრივ დახურა. "პროკურორის შუამდგომლობა დაკმაყოფილდეს და ბრალდებულ დ. ფ-ს მიმართ აღმკვეთის ღონისძიების სახით გამოყინებულ იქნას პატიმრობა. ბრალდებული მოთავსებული იქნეს სასჯელაღსრულების დეპარტამენტის შესაბამის დაწესებულებაში", - აღნიშნა მოსამართლემ.
მოსამართლის განცხადებით, პროკურატურა ამტკიცებს, რომ ბრალდებულმა დანაშაული 23 მარტს შუადღის 15:00-დან 16:00 საათების შუალედში ჩაიდინა საკუთარ ავტომობილში, სადაც სქესობრივი კავშირი გაუკუღმართებული ფორმით დაამყარა 16 წელს მიუღწეველ პირთან და ჩაიდინა გარყვნილი ქმედება. მოსამართლემ განმარტა, რომ აღნიშნული საქმე ფიქსირდება მძიმე კატეგორიის დანაშაულად, რაც ბრალის დამტკიცების შემთხევაში 7-9 წლამდე პატიმრობას ითვალისწინებს.
ბრალდებულის ადვოკატი ბორის გურიელიძე აცხადებს რომ, მისი დაცვის ქვეშ მყოფი თავს დამნაშავედ არ გრძნობს. "ეს არის კონფედენციალური ინფორმაცია და არ მაქვს უფლება ვისაუბრო. სასამართლოს განაჩენის გასაჩივრების თაობაზე შევუთანხმდები ჩემი დაცვის ქვეშ მყოფს. ჩატარდება ექსპერტიზა, რისი მეშვეობითაც გაირკვევა, ნამდვილად ჩაიდინა თუ არა დანაშაული ბრალდებულმა", - აღნიშნა დავით გურიელიძემ. ჟურნალისტების კითხვაზე, როგორია ბრალდებულის ჯანმრთელობის მდგომარეობა, ადვოკატი აცხადებს, რომ "ის არის 76 წელს მიღწეული და მთლად დალაგებული არ არის".
აღნიშნულ საქმეზე წინასასამართლო სხდომა 16 მაისს 11:00 საათზე ჩაინიშნა.
