15
ივლისიდღის ზოგადი ასტროლოგიური პროგნოზი
სასულიერო პირებისა და მრევლის ნაწილი პრემიერ-მინისტრს რუსთაველზე, წმ. თეოდოსი ჩერნიგოველის სახელობის ტაძრის შენობის დაბრუნების თხოვნით მიმართავს. რუსთაველის გამზირი #48-სთან, სადაც "ტაოპრივატ ბანკი", კაფე "გალერი" და სხვა ოფისებია განთავსებული, სასულიერო პირებმა და მრევლმა დღეს წმინდა მღვდელმთავრის თეოდოსი ჩერნიგოველის ხსენების დღესთან დაკავშირებით პარაკლისი გადაიხადეს.
დეკანოზ დავით ქვლივიძის განცხადებით, აღნიშნულ ადგილზე 1911 წელს წმინდა თეოდოსი ჩერნიგოველის სახელობის ტაძარი იყო აგებული, რომელიც კომუნისტურ პერიოდში ეკლესიას ჩამოერთვა და გადაკეთდა.
მისივე განმარტებით, შენობის ნაწილში ეკლესია იყო განთავსებული, ნაწილში კი საეკლესიო დანიშნულების ობიექტები. დღეს იქ "პრივატბანკის" ოფისია, გვერდით კი ღამის კლუბი, სადაც ახლახანს ადამიანი გარდაიცვალა და ასეთი შემთხვევები იქ პერმანენტულად ხდება.
"თქვენ შეგიძლიათ წარმოიდგინოთ სადმე საქართველოში მიტოვებულ მეჩეთში იყოს ღამის ბარი? ან წარმოიდგენთ სადმე, კათოლიკურ ეკლესიაში რომ იყოს ღამის ბარი და იქ ნარკოტიკები იყიდებოდეს და ხალხი იხოცებოდეს? ეს ხდება მხოლოდ მართლმადიდებლური ქვეყნის დედაქალაქში. ეს არის დაცინვა და ამაზე მეტი რელიგიური შეურაცხყოფა მე ვერ წარმომიდგენია", - აღნიშნა დეკანოზმა დავით ქვლივიძემ.
პარაკლისის დასრულების შემდეგ მრევლისა და სასულიერო პირების ნაწილმა აღნიშნეს, რომ საჭიროა წერილობით მიმართონ პრემიერ მინისტრს, რათა რუსთაველის 48-ში წმინდა მღვდელმთავრის ტაძარი აღდგეს.
