15
ივლისიდღის ზოგადი ასტროლოგიური პროგნოზი
დედაქალაქში მოსახლეობისთვის წყლის შეუფერხებლად მიწოდება საკმაოდ სერიოზულ პრობლემად იქცა. ეს პრობლემა განსაკუთრებით გარეუბნებს აწუხებს.
- "დიღომში ვცხოვრობ, წყალი ხშირად ზაფხულშიც არ გვაქვს, ზამთარს ხომ ნუღარ იკითხავთ! ზოგჯერ მთელი დღე-ღამე არ გვაქვს წყალი. როგორ შეიძლება 21-ე საუკუნეში, თან დედაქალაქში, ადამიანს წყალი არ მიეწოდებოდეს?! ვრეკავთ ცხელ ხაზზე და იქაც არავინ გვპასუხობს, ეს წყლის კომპანიის დიდი უპასუხისმგებლობაა" - აღშფოთებას ვერ მალავს ლალი გელაშვილი.
"მიუხედავად იმისა, რომ საბურთალო 24- საათიან წყალმომარაგების გრაფიკშია ჩასმული, ხშირად წყალი მთელი ღამის განმავლობაში დაწყვეტილია, თან წნევაც დაბალია. რისთვის ვიხდით ფულს? წყლის გადასახადს სრულად გვახდევინებენ, წყალი კი სანახევროდ არ გვაქვს" - შემოგვჩივის საბურთალოს ერთ-ერთი მცხოვრები.
"ყველა სიახლემ" "ჯორჯიან უოთერ ენდ ფაუერს" რამდენიმე კითხვით მიმართა. გთავაზობთ მათ პასუხსაც: "წყლის მიწოდების შეწყვეტის მიზეზები არის სარეაბილიტაციო სამუშაოები მაგისტრალურ ქსელებზე, მოულოდნელი ავარიები და მათ აღსაკვეთად აუცილებელი სამუშაოების ჩატარება, წნევის რეგულატორებისა თუ წნევის გამაძლიერებლების დამონტაჟების პროცესი, გამრიცხველიანება, წყლის გათიშვა მოსახლეობის განცხადების საფუძველზე (როდესაც დაზიანებაა მობინადრეების კუთვნილ შიდა ქსელზე და კორპუსს ავტონომიური ურდული არ გააჩნია) და ახალი აბონენტების არსებულ ქსელებთან მიერთების სამუშაოები. კომპანია სამი მიმართულებით მუშაობს. პირველი მიმართულებაა სარეაბილიტაციო სამუშაოები წყალსადენის ქსელებზე, განსაკუთრებით კი ძველი ქსელების თანამედროვე ტიპის ახალი მილებით შეცვლა, რომელიც ნაკლებად მგრძნობიარეა ტემპერატურული ცვალებადობის მიმართ. 2014 წლის გეგმისა და ბიუჯეტის თანახმად, დაგეგმილია წყალსადენის ქსელების 70 კმ-ზე მეტის შეცვლა თბილისში. კომპანია მუშაობს, რომ აღმოფხვრას მილდენების დაზიანების მეორე, ასევე მნიშვნელოვანი მიზეზი და დაარეგულიროს ქსელებში მიწოდებული წყლის წნევა, რაც უნდა მოხდეს ზონირების გაუმჯობესებით და თბილისის სხვადასხვა უბანში უახლესი ტიპის წნევის რეგულატორების დამონტაჟებით (ბოლო 2 თვის მანძილზე 28 რეგულატორი დამონტაჟდა). და ბოლოს, წყლის შეწყვეტის შემთხვევების მნიშვნელოვანი ნაწილი გამოწვეულია არსებული ქსელების არასათანადო ტექნიკური მოწყობით (ესეც ძველი მემკვიდრეობაა). ერთ კონკრეტულ ტერიტორიაზე დაზიანების აღსადგენად, თუნდაც მომხმარებლის კუთვნილ შიდა ქსელზე, კომპანია იძულებულია წყლის მიწოდება გაუთიშოს დიდ არეალს, დაზიანებული მილის გარშემო. 2014 წლის გეგმის თანახმად, კომპანიის ბიუჯეტში გამოყოფილია მლნ ლარი წყალსადენის ქსელებზე საკვანძო ჭებისა და ჩამკეტ-მარეგულირებელი ურდულების მოსაწყობად, რაც საშუალებას მოგვცემს შევამციროთ წყლის გათიშვის არეალი კონკრეტული დაზიანების შემთხვევაში".
მაკა ქობალია
ყოველკვირეული გაზეთი "ყველა სიახლე"
(გამოდის ოთხშაბათობით)
