შეზღუდული შესაძლებლობების პირთა პანდუსებით კუნთმაგარი სპორტსმენებიც კი ვერ სარგებლობენ

თბილისში ფეხით მოსიარულეთა ხიდებზე დიდი ხანია პანდუსები დამონტაჟდა. რამდენად მოსახერხებელია მათი გამოყენება შეზღუდული შესაძლებლობების მქონე პირთათვის? ამის შესამოწმებლად მცირე ექსპერიმენტის ჩატარება გადავწყვიტეთ.

თორნიკე ხიდაშელი სპორტსმენია. ექსპერიმენტში მონაწილეობაზე ადვილად დაგვთანხმდა. მთელი დღის მანძილზე თორნიკე თბილისის ქუჩებში ეტლით გადაადგილებას ცდილობდა. გვსურდა დაგვედგინა, რამდენად შესაძლებელია ფიზიკურად ძლიერი ადამიანისთვის პანდუსებით დამოუკიდებლად სარგებლობა. ქუჩაში გადაადგილება არ გასჭირვებია, თუმცა, პანდუსზე ასვლის არაერთი მცდელობის შემდეგ, დანებდა და საკმაოდ დაღლილმა თქვა: "აქ ასვლის შანსი არ არის". ექსპერიმენტი ამით არ დამთავრებულა. თორნიკეს დახმარება გამვლელმა სცადა, თუმცა ეს მცდელობაც უშედეგოდ დასრულდა. 

თბილისის მერიის კეთილმოწყობის სამსახურის უფროსმა, გიორგი ყოჩიაშვილმა ექსპერიმენტის ვიდეოჩანაწერის ნახვის შემდეგ ”ამბები.გე”-ს განუცხადა, რომ ექსპერიმენტში მონაწილე პირებმა სათანადოდ არ მოინდომეს. მისი თქმით, გადასასვლელ ხიდებზე პანდუსები სპეციალურად შეზღუდული შესაძლებლობების მქონე პირთათვის დამონტაჟდა და ამ პანდუსებით სარგებლობა სავსებით შესაძლებელია.

მერიის პრეს-სპიკერი, ბაჩო დოლიძე პანდუსებთან დაკავშირებით სხვა ინფორმაციას ფლობს. მისი განცხადებით, პანდუსები ბარგის გადასაზიდი საშუალებაა. იმის გასარკვევად, თუ რამდენად მოსახერხებელია პანდუსები ხელბარგის გადასატანად, მეორე ექსპერიმენტი ჩავატარეთ. მაგრამ აღმოჩნდა, რომ პანდუსის რელსები არა ბარგის, არამედ ეტლის ბორბლების დაშორებით არის დამონტაჟებული, რაც შეუძლებელს ხდის ამ რელსებით ბარგის ატანას.

"მოძრაობა კეთილი გარემოსთვის" უფროსმა, რატი იონათამიშვილმა განაცხადა, რომ თბილისში პანდუსებით გადაადგილება შეზღუდული შესაძლებლობების პირთათვის ძალიან რთულია. ამ შემთხვევაში კი საქმე თანხის გაფლანგვასთან გვაქვს: "პანდუსები სტანდარტებს არ აკმაყოფილებს და გამოუსადეგარია. ის ხელახლა უნდა გადავაკეთოთ. თანხის ორმაგ ხარჯვასთან გვაქვს საქმე, ჩვენ ასეთი ფუფუნება ნამდვილად არ გვაქვს."

პანდუსები საერთაშორისო სტანდარტებს არ აკმაყოფილებს. სიტყვა "ინვალიდი" წუნიანს ნიშნავს, მისი გამოყენება შეზღუდული შესაძლებლობის ადამიანის მიმართ დაუშვებელია. ჩვენში კი, როგორც აღმოჩნდა, ეს სიტყვა ყველაზე მეტად მერიის დამონტაჟებულ პანდუსებს შეეფერება.

ელენე ცინცაძე