ბიძინა ივანიშვილი: "ბეღურები სააკაშვილს მაგონებენ”

ბეღურები სააკაშვილს მაგონებენ, არავის არ უნდა წავართვათ ბინა და სახლი, - ასე უპასუხა ბიძინა ივანიშვილმა პრესკონფერენციაზე, ტელეკომპანია "რეალ ტვ"-ის ჟურნალისტის კითხვას, რატომ არ უყვარს ბიზნესმენს ბეღურები.

"რატომ არ გიყვართ ბეღურები სინამდვლეში? იმიტომ რომ თქვენმა პინგვინმა ბეღურა შეჭამა და მოკვდა, თუ იმიტომ, რომ ისინი მერცხლებს უნგრევენ ბუდეს? თუ ასეა, მაშინ ამერიკული სოფლის დანგრევის პასუხისმგებლობაზე რას იტყვით?", - იკითხა "რეალ ტვ"-ს ჟურნალისტმა.

"მეშინია, ჩემი პასუხით მკითხავებს არ წავართვა ადგილი და უხელფასოდ არ დავტოვო. ისე, ამასთან დაკავშირებით ვიტყვი, რომ მერაბიშვილზე უფრო მაღალი წარმოდგენა მქონდა. ბეღურები სააკაშვილს მაგონებენ, არავის უნდა წავართვათ ბინა და სახლი. ამერიკულ სოფელს რაც შეეხება, იქ იყო უამრავი დარღვევა და ამაზე არსებობს წერილები", - განაცხადა ივანიშვილმა.

"ყველაფერი ჩემს მიწაზე ააშენეს, ძლივს კანონიერება აღვადგინე და ორჯერ და სამჯერ მეტი გადავუხადე, იმაზე კარგად მოვიქეცი ვიდრე იმსახურებდნენ. ჩემმა პინგვინმა კი სამწუხაროდ, მერცხალი გადაყლაპა. პინგვინების ტბასთან ძალიან სწრაფად ტრიალებდნენ მერცხლები და ამიტომ", - აღნიშნა ბიზნესმენმა.

კითხვა ბიძინა ივანიშვილის შესახებ ბოლო დროს გავრცელებულ ანეკდოტთან დაკავშირებით დაისვა, რომელსაც ანსამბლ "ქართული ხმების" წევრი თემურ ჭკუასელი გაზეთ ”კვირის პალიტრასთან” ინტერვიუში ასე ყვება:

”ბიძინას პინგვინი მოუკვდა. დაიბარა ხალხი და დაავალა მიზეზის გარკვევა, სხვებს ხომ არაფერი ემუქრებათო. გაკვეთეს პინგვინი და აღმოაჩინეს, რომ პინგვინს მკვდარი მერცხალი გაუძიძგნია. აღშფოთდა ივანიშვილი, კი მაგრამ, რა უნდოდა იქ მერცხალსო? ვერ გავიგეთ, ბატონო ბიძინა, ჭორვილაში მერცხალს რა უნდოდა თუ პინგვინსო? - გაკვირვებულან ვეტერინარები”.

ხოლო ამერიკულ სოფელთან დაკავშირებულ ისტორიას თემურ ჭკუასელი ასე იხსენებს: ”ბიძინას მაგ სოფლის გამო ჩემი 600.000 დოლარი მართებს. ხუმრობა იქით იყოს და, ბიძინა ივანიშვილის მიწაზე, რომელიც მას კანონიერად ჰქონდა ნაყიდი, ბიზნესმენ ვასილ ცოტაძის ამერიკელმა მეუღლემ მშენებლობა წამოიწყო. ბიძინამ ხალხი მიუგზავნა და გააფრთხილა, რომ ეს მისი მიწა იყო, მაგრამ ყური არავინ დაუგდო და ააშენეს ეგრეთ წოდებული ამერიკული სოფელი. ცოტაძის მეუღლე ამბობდა, მამაჩემი ბუშის მეგობარიაო და ეტყობა, ეგონა, საქართველოში ისე მოიქცეოდა, როგორც გაუხარდებოდა. მშენებლობა რომ დაასრულეს, ბიძინამ შეუთვალა, მშენებლობა 3 მილიონი დაჯდა, მე ექვსს გადაგიხდით, ოღონდ ეს დავა სასამართლოს გარეშე გადავწყვიტოთო. ბიძინამ ეს ადგილი იმიტომ იყიდა, რომ სარეკრეაციო ზონის გაშენება ჰქონდა გადაწყვეტილი. შემოუთვალეს, ამ წინადადებაზე ფიქრს 10 მილიონიდან დავიწყებთო. ბიძინა ფილანთროპი კი არის, მაგრამ ძალიან პრინციპულიცაა. შეურაცხყოფილად იგრძნო თავი და ამიტომ სასამართლოს მიმართა. ბუშთან მეგობრობის მიუხედავად, საქმე მოიგო - სახლები უნდა დანგრეულიყო. ცოტაძემ ერთი ამბავი ატეხა პრესაში, ივანიშვილი ბარბაროსულ აქტს სჩადის, ამერიკულ სოფელს ანგრევსო. მაშინ მე ვრცელი წერილით საზოგადოებას ვამცნე, სინამდვილეში რა მოხდა. როგორც კი წერილი დაიბეჭდა, ცოტაძემ ხალხი მომიგზავნა, თანახმა ვართ 6 მილიონზე და თუ ამ საქმეს მოაგვარებ, 10%-ს შენ მოგცემთო. ბიძინას ხასიათი ვიცი და ამ წინადადებაზე წინასწარ ვიცოდი პასუხი. ვუთხარი, დამაბარეს შენთან, წინასწარ ვიცი, ცოტაძეს რომ არაფერს გადაუხდი, მაგრამ ჩემი 600.000 უნდა მომცე-მეთქი! გულიანად ვიცინეთ ამ 600.000-ზე. არ გაინტერესებთ ამ საქმის გაგრძელება? დაინგრა ის სახლი და ბიძინა ივანიშვილმა მოგებული სასამართლოს მიუხედავად, მაინც გადაუხადა 6 მილიონი ცოტაძეს”, - ამბობს "ქართული ხმების" წევრი.