21
მაისიდღის ზოგადი ასტროლოგიური პროგნოზი
თბილისის საკრებულოს უმრავლესობის წევრის, ვახტანგ მჭედლიძის მიერ საკრებულოს დატოვების შესახებ ოფიციალური ინფორმაცია გუშინ გავრცელდა.
როგორც საკრებულოში ამბობენ, ფრაქცია "ნაციონალური მოძრაობის" წევრმა საკრებულო საკუთარი განცხადების საფუძველზე დატოვა. დღეს კი პრესაში ვახტანგ მჭედლიძის საკრებულოდან წასვლის სხვა ვერსიას ასახელებენ.
გაზეთი "ალია" წერს, რომ მჭედლიძემ საკრებულო პრეზიდენტის კატეგორიული მოთხოვნის შემდეგ დატოვა.
"ალიას" ინფორმაციით, საკრებულოს უკვე ყოფილი წევრი "ნაციონალური მოძრაობის" აქტივისტებთან ერთად ახალი წლის დღეებში ერთ-ერთ რესტორანში ქეიფობდა და საკუთარი სუფრის წევრებს დაუპირისპირდა.
მჭედლიძემ ჩხუბის შემდეგ ერეკლე კოდუას დაურეკა, რომელიც მისი მეგობარი ყოფილა. "ამ საქმეებში გაწვრთნილ კოდუას დასახმარებლად თავისი ბიჭების ბრიგადა გამოუგზავნია, მჩაგვრელი "ნაციონალები" ერეკლე კოდუას ბიჭებს ისე უბეგვიათ, რომ, როგორც ამბობენ, ბევრი მათგანი დღემდე გონზე ვერ მოდისო", - წერს გაზეთი.
"ალიასთან" პრივატულ საუბრებში იმასაც ამბობენ, რომ ეს იყო სერიოზული ჩხუბი და ამის შესახებ მარტო საკრებულო კი არა, სააკაშვილიც საქმის კურსშიაო. სააკაშვილს კატეგორიულად მოუთხოვია, რომ დაძაბული ვითარების განსამუხტად უგულავა-კოდუას ძმაკაც მჭედლიძეს საკრებულო დაეტოვებინა. თუმცა, ეს ყველაფერი ასე მარტივად არ დასრულებულა. სააკაშვილს რამდენიმე დღის წინ საკრებულოს "ნაცმოძრაობის" წევრები დაუბარებია და "წინაპრების მოკითხვით, თავზე დაუფარებია მკვდარ-ცოცხალი".
მჭედლიძე ყოფილი მორაგბეა, ის საკრებულოში "ჯანდაცვისა და სოციალურ საკითხთა კომისიის" წევრი და "სარევიზიო კომისიის" თავმჯდომარის მოადგილე იყო. "ალია" იმასაც წერს, რომ მჭედლიძე "რუსთავი 2"-ის ტელეწამყვანის, გვანცა დარასელიას მეუღლეა და გიგი უგულავას მეუღლის მშობიარობის დროს ვენაშიც იმყოფებოდა.
ამბები.გე ვახტანგ მჭედლიძესთან დაკავშირებას შეეცადა, მაგრამ საკრებულოს ყოფილ დეპუტატს მობილური გამორთული ქონდა. რაც შეეხება მის მეუღლეს, გვანცა დარასელია ადასტურებს, რომ ვახტანგ მჭედლიძემ საკრებულო დატოვა, მაგრამ არა პრეზიდენტის მოთხოვნით, არამედ პირადი მოტივით. გვანცა დარასელია "ალიაში" გავრცელებულ ინფორმაციას მორიგ ჭორს უწოდებს.
ქეთი შარაშენიძე
