თურქეთში ქართული ტაძრების რესტავრაციის სანაცვლოდ ოთხი მეჩეთის აღდგენას სპეციალისტები აფასებენ
იშხანის, ხანძთის, ოშკისა და ოთხთა ტაძრის თურქეთში რესტავრაციის სანაცვლოდ საქართველოს სხვადასხვა ტერიტორიაზე ოთხი მეჩეთის აღდგენას სპეციალისტები აფასებენ.
ისტორიკოს მარიკა ლორთქიფანიძის აზრით, საქართველოს ტერიტორიაზე ოთხი მეჩეთის აღდგენა უხერხულ მდგომარეობას ქმნის, თუმცა ძეგლების ისტორიული მნიშვნელობა იმდენად დიდია, რომ ქართული მხარე დათმობაზე უნდა წავიდეს.
"ფაქტი ის არის, რომ აჭარაში მეჩეთები ისედაც შენდება, ქართული ტაძრების რესტავრაციის სანაცვლოდ მეჩეთების აღდგენა უხერხულ მდგომარეობას ქმნის, მაგრამ რას ვიზამთ, ტაოში ქართული ტაძრების აღდგენის სანაცვლოდ ქართულ მხარეს დათმობაზე წასვლა მოუწევს", - განაცხადა "ინტერპრესნიუსთან" საუბრისას მარიკა ლორთქიფანიძემ.
ხელოვნებათმცოდნე გოგი ხოშტარია კი მიიჩნევს, რომ საქართველოსთვის მეჩეთები და მუსლიმური სამყარო საფრთხეს არ წარმოადგენს.
"დემოკრატიული და ტოლერანტულობის პრეტენზიის მქონე ერისთვის მეჩეთების აგება გასაკვირი არ უნდა იყოს. მიმაჩნია, რომ მუსლიმური სამყარო ჩვენი ქვეყნისთვის საფრთხეს ამ ეტაპზე არ წარმოადგენს", - განაცხადა გოგი ხოშტარიამ.
თურქეთის ტერიტორიაზე იშხანის, ხანძთის, ოშკისა და ოთხთა ტაძრის რესტავრაციის სანაცვლოდ, ბათუმსა და საქართველოს სხვადასხვა ტერიტორიაზე ოთხი მეჩეთის აღდგება. მოლაპარაკებები მხარეებს შორის აქტიურად მიმდინარეობს.
კულტურული მემკვიდრეობის დაცვის სააგენტოს ხელმძღვანელის, ნიკოლოზ ვაჩეიშვილის განმარტებით, თურქული მხარე საქართველოს ტერიტორიაზე არსებულ ოთხ მეჩეთს აღადგენს. კერძოდ - ბათუმში, ახალციხეში რაბას მეჩეთს, ქობულეთში კვირიკეს და სამცხეში კიდევ ერთ მეჩეთს. ბათუმში მეჩეთი, პრაქტიკულად, თავიდან უნდა აშენდეს.
ნიკოლოზ ვაჩეიშვილის ცნობით, შეთანხმების მიღწევის შემთხვევაში, ქართული მხარე განახორციელებს ტაო-კლარჯეთის ქართული ტაძრების რესტავრაციას.
შეთანხმება, სავარაუდოდ, 2011 წელს გაფორმდება.
ბაია პატარაიას თათია სამსახარაძე და უფლებადამცველები დაუპირისპირდნენ - „სამი წელია პირში წყალი მაქვს დაგუბებული...“
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
