პრემიერი - ლიკა ქავჟარაძე დარჩება, როგორც ულამაზესი ქართველი ქალი, რომელმაც დაიპყრო მთელი ქვეყნის გული

ლიკა ქავჟარაძე დარჩება, როგორც ულამაზესი ქართველი ქალი, რომელმაც დაიპყრო მთელი ქვეყნის გული, - ამის შესახებ საქართველოს პრემიერ-მინისტრმა გიორგი კვირიკაშვილმა მსახიობ ლიკა ქავჟარაძის პანაშვიდზე განაცხადა.

საქართველოს პრემიერ-მინისტრის თქმით, გულდასაწყვეტია, რომ რამდენიმე თაობის სათაყვანებელი მსახიობი უდროოდ გარდაიცვალა. მან გარდაცვლილის ოჯახის წევრებსა და ახლობლებს კიდევ ერთხელ მიუსამძიმრა.

"ძალიან გულდასაწყვეტია, რომ რამდენიმე თაობის სათაყვანებელი მსახიობი ლიკა ქავჟარაძე ასე უდროოდ წავიდა. მინდა მივუსამძიმრო მთელ საქართველოს და მის ოჯახს ეს უდიდესი დანაკლისი. ლიკა ქავჟარაძე არის კინოვარსკვლავი, რომელიც დარჩება, როგორც ულამაზესი ქართველი ქალი, რომელმაც დაიპყრო მთელი ქვეყნის გული", - განაცხადა გიორგი კვირიკაშვილმა.

მსახიობის სახლთან ამ დრომდე იკრიბებიან მისი მეგობრები, კოლეგები, ხელოვნების სხვადასხვა სფეროს წარმომადგენლები.

58 წლის მსახიობი საკუთარ სახლში გარდაცვლილი 11 ოქტომბერს იპოვეს. ახლობლები გარდაცვალების სავარაუდო მიზეზად გულის პრობლემას ასახელებენ. ექსპერტიზის დასკვნა კი 45 დღეში გახდება ცნობილი. მსახიობის გარდაცვალებასთან დაკავშირებით გამოძიება 115-ე მუხლით მიმდინარეობს. ლიკა ქავჟარაძე საკუთარი ნამუშევრების პერსონალური გამოფენისთვის ემზადებოდა. მეგობრების გადაწყვეტილებით, მიუხედავად ტრაგედიისა, აღნიშნული გამოფენა ვაკის არტ-გალერეაში 19 ოქტომბერს მაინც გაიმართება.