რამდენს იხდიდნენ მშობლები შვილების განათლებისთვის კერძო სკოლებში, რომლებმაც რეავტორიზაცია ვერ გაიარეს

გასულ წელს, საქართველოს მასშტაბით მოქმედი 227 კერძო სკოლიდან რეავტორიზაცია ექვსმა კერძო სკოლამ ვერ გაიარა.

"განათლების ხარისხის განვითარების ეროვნული ცენტრის" ინფორმაციით, ავტორიზაციის გაუქმების ძირითადი მიზეზები იმ სტანდარტების დარღვევა იყო, რომელთაც ნებისმიერი ზოგადსაგანმანათლებლო სასწავლებელი ავტორიზაციის მიღების, თუ რეავტორიზაციის პროცესში უნდა აკმაყოფილებდეს. ეს სტანდარტებია: საგანმანათლებლო პროგრამები, მატერიალური რესურსი და ადამიანური რესურსი.

აღსანიშნავია, რომ ავტორიზაციის პროცესში, ძირითადად, მატერიალურ რესურსთან დაკავშირებული დარღვევები, სასკოლო გეგმის ეროვნულ სასწავლო გეგმასთან არათავსებადობა და მოსწავლეების შეფასების სისტემასთან დაკავშირებული ხარვეზები გამოიკვეთა.

იმ სკოლებიდან, რომელთაც დარღვევების გამო რეავტორიზაცია ვერ გაიარეს, 3 დედაქალაქში, 3 კი რეგიონებში მდებარეობს.

თბილისი: შპს "ნიკოლოზ წერეთლის სახელობის საერთაშორისო სკოლა"; "შპს ნუნუ ავაგუმაშვილი"; შპს "გალაკტიონ ტაბიძის სახელობის ვერის უბნის ლიცეუმი".

გორი: შპს "საუნჯე - გორის კერძო საშუალო სკოლა"; რუსთავი: შპს "ჯეო რეალი";

აღნიშნული სკოლებიდან რამდენიმე მათგანში გადასახადი არც ისე ხელმისაწვდომია, მაგალითად, შპს "ნიკოლოზ წერეთლის სახელობის საერთაშორისო სკოლაში" სწავლის საფასური წელიწადში, საქართველოს მოქალაქეებისთვის 4 000$, ხოლო უცხოეთის მოქალაქეებისთვის 6 000$ იყო. ამჟამად სკოლა აღარ ფუნქციონირებს.

კიდევ ერთ, შპს "თბილისი გალაკტიონ ტაბიძის სახელობის ვერის უბნის" ლიცეუმში," სადაც სასწავლო პროცესი ამჟამად შეჩერებულია, წლიური გადასახადი წელიწადში 2 500- 3 000 ლარი იყო. სკოლისთვის ავტორიზაციის გაუქმების მიზეზი არასაკმარისი ადამიანური რესურსი გახდა:

"ჩვენთან თვის გადასახადი 250-დან 300 ლარამდეა. ჯერჯერობით მოსწავლეების კონტიგენტი არ გვყავს და მათი მიღება სექტემბრიდან მოხდება," - განგვიმარტა სკოლის წარმომადგენელმა.

რაც შეეხება რეგიონებს, შპს "საუნკე - გორის კერძო საშუალო სკოლა," ავტორიზაციის გარეშე სკოლის მცირე ფართობის გამო დარჩა, რომლის გაფართოებასაც, მეპატრონეები სამომავლოდ გეგმავენ, რათა რეავტორიზაცია გაიარონ. "საუნჯეში" სწავლის გადასახადი თვეში 70 ლარი იყო.

AMBEBI.GE-მ დანარჩენ სკოლებთან კომუნიკაცია სცადა, თუმცა უშედეგოდ. სკოლები, სადაც სწავლის საფასურში მშობლები სოლიდურ თანხას იხდიდნენ, დღეს აღარ ფუნქციონირებენ, თუმცა "განათლების ხარისხის განვითარების ეროვნული ცენტრის" განცხადებით, არც ერთი მოსწავლე სკოლის გარეშე არ დარჩება და ავტორიზაცია გაუქმებული სასწავლებლების მოსწავლეებმა და მათმა მშობლებმა განათლებისა და მეცნიერების სამინისტროს უნდა მიმართონ. სხვა სკოლაში გადასვლა მობილობის საშუალებით იქნება შესაძლებელი.

მარიამ მენაბდიშვილი

AMBEBI.GE