ფონდი, რომელიც ბავშვების სიცოცხლეზე ზრუნავს, 710 ლარის იმედადაა - როგორ დავეხმაროთ სიმსივნით დაავადებულ პატარებს

...დაავადებულ ბავშვთა სიცოცხლის გადასარჩენად დიმიტრი ცინცაძის სახელობის ფონდი სამი წელია იბრძვის. ფონდს ამ წლების მანძილზე ადამიანების ქველმოქმედებამ შეაძლებინა 189 ბავშვისათვის დახმარების გაწევა და 157 ბავშვის სიცოცხლის გადარჩენა... ამჟამად, ფონდი, რომლის ანგარიშზეც ათობით გადარჩენილი სიცოცხლეა, არსებობის მანძილზე ყველაზე დიდ კრიზისშია - ანგარიში თითქმის დაცარიელებულია და ფონდში მხოლოდ 710 ლარია(!). 710 ლარი ლეიკემიითა და სიმსივნით დაავადებული ბავშვებისთვის, რომლებიც ყოველდღე უყურებენ სიკვდილს თვალებში და რომლებსაც აქვთ სიცოცხლის უფლება! მშობლებისთვის, რომლებიც ავადმყოფ შვილებთან ერთად ყოველ დღეს იმედის თვალით შესცქერიან და კეთილი ადამიანების იმედად არიან დარჩენილნი...

არადა, ქველმოქმედება რა მარტივია! ანგარიშზე გადარიცხული თითო ლარიც კი, ათობით დაავადებული პატარას სიცოცხლის გადასარჩენად პატარა ნაბიჯია, ჩვენი პატარა ნაბიჯებით კი მათთვის ჯანმრთელი მომავლის შექმნა შეგვიძლია.

ჟურნალი "ოჯახის მკურნალი" მკითხველს ქველმოქმედებაში ჩართვის მარტივ გზას სთავაზობს: ჟურნალის ოქტომბრის ნომრიდან შემოსული თანხა მთლიანად გადაირიცხება დიმიტრი ცინცაძის ფონდში! ასე, რომ, თუ "მკურნალის" ოქტომბრის ნომერს შეიძენთ, ამით თქვენს მნიშვნელოვან წვლილს შეიტანთ მძიმე დიაგნოზის მქონე ბავშვების გადარჩენის კეთილშობილურ საქმეში. #ქველმოქმედებამარტივია!

ყოველდღიურად გაზეთის რედაქცია ათობით წერილს იღებს დაავადებებისა და პირადი პრობლემების შესახებ. ბოლო წლებში საგრძნობლად გახშირდა კითხვები ლეიკემიასთან დაკავშირებით. ისტორიები, ძალიან სევდიანი და მძიმეა, განსაკუთრებით მაშინ, როდესაც საქმე პატარა ადამიანების სიცოცხლეს ეხება. სწორედ ამან გადააწყვეტინა "მკურნალს" საქველმოქმედო პროექტის - #ქველმოქმედებამარტივია წამოწყება:

ეკატერინე პეტრიაშვილი, "ოჯახის მკურნალის" მარკეტინგის მენეჯერი: "ოქტომბრის ნომრის გაყიდვიდან შემოსული თანხა სრულად გადაირიცხება დიმიტრი ცინცაძის სახელობის ფონდში, რომელიც ლეიკემიითა და სიმსივნით დაავადებულ ბავშვებს ეხმარება. მნიშვნელოვანია, რომ ეს არ იქნება ერთჯერადი აქცია, გვინდა ქველმოქმედება ადამიანების ცხოვრების ყოველდღიურ ნაწილად ვაქციოთ. რა არის იმაზე დიდი სიკეთე და ბედნიერება, როდესაც შენი ქმედება ადამიანის სიცოცხლეს იხსნის, ამ დროს ჩვენ ყველა ხომ გმირები ვხდებით.

კერძო თუ საჯარო სექტორში ბევრია დასაქმებული და მათ, ვისაც ამის საშუალება გვაქვს, თვეში თუნდაც სულ მცირედი 1 ლარით, ერთი ზარით ან ჟურნალის ერთი ნომრის შეძენით შეგვიძლია უამრავი სიცოცხლე გადავარჩინოთ. სწორედ ამიტომ ყველას მოვუწოდებთ გულისხმიერად მოეკიდეთ ამ საკითხს, რაც მთავარია არ დაიზაროთ და ჩაერთეთ აქციაში, #ქველმოქმედებამარტივია!

"ოჯახის მკურნალის" საქველმოქმედო ნომერში მკითხველი იპოვის პატარა ღილს, რომელიც სიმბოლურ ხეზე უნდა მიამაგროს. ხე ნომრის გამოსვლის დღეს "ბიბლუსი გალერეაში" (ვაკე, ჭავჭავაძის 7 ნომერი) განთავსდება. მას ჟურნალის მკითხველები და ყველა, ვისაც ქველმოქმედებაში ჩართვის სურვილი ექნება, ამ ღილებით შეავსებენ.

ღილს ამ შემთხვევაში თავისებური დატვირთვაც აქვს - თითოეული მათგანი სიმბოლურად გადარჩენილ სიცოცხლეს აღნიშნავს. შესაბამისად, თუ ხეზე ბევრი ღილი დამაგრდება, ეს იქნება ნიშანი, რომ ჩვენ ერთად ბევრი პატარას სიცოცხლე გადავარჩინეთ...

დონაცია მარტივია, თქვენი თანადგომა შეუფასებელი. მიეცი სიცოცხლის უფლება! დარეკე 0901080806

აქვე იხილეთ ფონდის რეკვიზიტები:

დარეკეთ 09 01 08 08 06, ზარის ღირებულება 1 ლარი

საქართველოს ბანკი:BAGAGE22

GE62BG0000000996577500