22 წამში მოპოვებული გამარჯვება - გენო პეტრიაშვილი ოლიმპიური ბრინჯაოს პრიზიორია

20 აგვისტოს, რიო დე ჟანეიროში მიმდინარე ზაფხულის XXXI ოლიმპიურ თამაშებზე თავისუფალ ჭიდაობაში მძიმეწონოსანმა გენო პეტრიაშვილმა საქართველოს დელეგაციას მეოთხე ბრინჯაოს, სულ კი მეშვიდე მედალი მოუტანა.

სანუგეშო ტურნირში 22 წლის ქართველმა ფალავანმა ჯერ კანადელ ქორი ჯარვისს 9:2 სძლია, ბრინჯაოს მედლისთვის შეხვედრაში კი ამერიკელ ტერველ დლაგნევს სუფთად, ნახევარ წუთში მოუმთავრა საქმე - 10:0.

შეგახსენებთ, რომ ქართველმა ფალავანმა მერვედფინალში უკრაინელ ალენ ზასეევს დაძაბულ ბრძოლაში 11:6 მოუგო, მანამდე კი სასტარტო შეხვედრაში ბულგარელ დიმიტარ კუმჩევს ანგარიშით 10:0 სძლია. მეოთხედფინალში გენომ ირანელ ნემათ ჩასემისთან წააგო (4:4).

დღესვე სასტარტო შეხვედრა დათმო და ბრძოლას გამოეთიშა სანდრო ამინაშვილი (86).

შეგახსენებთ, რომ მანამდე ოლიმპიური ჩემპიონები ძალოსანი ლაშა ტალახაძე და თავისუფალი სტილით მოჭიდავე ვლადიმერ ხინჩეგაშვილი გახდნენ. ვერცხლს ძიუდოისტი ვალერი ლიპარტელიანი დასჯერდა, ბრინჯაოს მედლები კი ლაშა შავდათუაშვილმა (ძიუდო), შმაგი ბოლქვაძემ (ბ/რ ჭიდაობა) და ირაკლი თურმანიძემ (ძალოსნობა) მოიპოვეს.