ვინ არის რობი უილიამსის "მეგობარი ზურა", რომელსაც მომღერალმა "ტვიტერზე" გამოჯანმრთელება უსურვა - ექსკლუზიური ინტერვიუ ზურა ცნობილაძესთან
საქართველოდან გამგზავრების შემდეგ, ბრიტანელი მომღერალი რობი უილიამსი „ტვიტერზე“ ქართველი ბიჭის ფოტოს აქვეყნებს და წერს, რომ „მეგობარ ზურას გამოჯანმრთელებას უსურვებს“.
ფოტოს სოციალურ ქსელში დიდი გამოხმაურება მოჰყვა. ყველას აინტერესებდა, ვინ იყო ქართველი ახალგაზრდა, რომელიც ბრიტანელი მუსიკოსის ყურადღების ცენტრში მოხვდა. როგორც გაირკვა, ის 28 წლის ზურა ცნობილაძეა, წარმოშობით ქუთაისიდან არის. გერმანიაში ცხოვრობდა, თუმცა ცოტა ხნის წინ საქართველოში დაბრუნდა, რისი ერთ-ერთი მიზეზიც რობი უილიამსის კონცერტი გახლდათ.
"Ambebi.ge"-ს ზურამ ექსკლუზიური ინტერვიუ მისცა.
- ამ წამს გავიგე რაც ხდება, ჯერ პოსტიც არ მინახავს. გერმანიაში ვცხოვრობ და საქართველოში რობი უილიამსის კონცერტის გამო ჩამოვედი. სამწუხაროდ, ჯანმრთელობის პრობლემები შემექმნა, წელის ტკივილები გამირთულდა და ვერ მოვახერხე კონცერტზე მოხვედრა. გადავიღე ეს ფოტო და „ფეისბუქზე“ დავდე, გავაკეთე ჰეშთაგი "hello robby", ეს იყო და ეს. ეტყობა იგრძნო როგორ მინდოდა მის კონცერტზე მოხვედრა და რას განვიცდიდი იმის გამო, რომ ეს ვერ შევძელი, ამიტომაც გამოაქვეყნა ჩემი ფოტო "ტვიტერზე". ძალიან ბედნიერი ვარ, ვერც გადმოვცემ ამ სიხარულს. ვერ წარმოვიდგენდი ეს თუ მოხდებოდა. რობის პოსტს ამოვბეჭდავ და ყველან გავაკრავ.
- პირადად არასდროს შეხვედრიხართ?
- არანაირი შეხება არ მქონია რობი უილიამსთან. მისი თაყვანისმცემელი ვარ ბავშვობიდან, მაგრამ მის კონცერტზე არასდროს ვყოფილვარ. მუსიკა ჩემთვის რელიგიასავით არის და სულ ვესწრები მსოფლიო ვარსკვლავების კონცერტებს. ყოველთვის მიმართლებს და მათი ყურადღების ცენტრში ვხვდები. ეს ჩემგან დამოუკიდებლად ხდება, რობის კონცერტზე თუ მოვხვდებოდი, ალბათ რაღაც სასწაულს ჩავიდენდი. ჩემთვის კარგი შანსი იყო მასთან მინიმუმ სელფის გადაღება. ჯგუფი "სიგურ როსი" მიყვარს განსაკუთრებით. ისლანდიელი მუსიკოსები არიან, რამდენჯერაც ჩაატარეს გერმანიაში კონცერტი, ყოველთვის ვესწრებოდი. ერთხელ დრამის ჯოხები მაჩუქეს, სელფებიც გადავიღეთ. სხვა მუსიკოსების ყურადღების ცენტრშიც ვხვდები, მაგრამ ახლა ისეთ ეიფორიაში ვარ სიხარულისგან არაფერი არ მახსოვს.
- პროფესიით მუსიკოსი ხართ?
- პროფესიულად მუსიკასთან არანაირი შეხება არ მაქვს. უბრალოდ წარმოდგენა არ მაქვს რა უნდა მოხდეს სამყაროში მუსიკის გარეშე.
თამარ ბოჭორიშვილი
Ambebi.ge
ასევე იხილეთ: რობი უილიამსი ნაჩუქარი ყაბალახით
"New York, New York" - ცნობილი ჰიტი მომღერალმა "Georgia, Georgia!"-თი შეცვალა
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
