რა ხდებოდა შუფუტინსკის კონცერტზე ბათუმში - უკმაყოფილება VIP ლოჟაში და უწესრიგობით შეწუხებული მაყურებელი
რუსული შანსონის შემსრულებლის, მიხეილ შუფუტინსკის კონცერტის მიმართ განსაკუთრებული მოლოდინი ჰქონდა როგორც მაყურებელს, ასევე ორგანიზატორებს. ვინ დარჩა კმაყოფილი, ვინ - უკმაყოფილო და რა ხდებოდა კონცერტის დროს ბათუმის კორტებზე, ამის შესახებ "ამბები.გე"-ს რეპორტაჟიდან გაიგებთ.
მიხეილ შუფუტინსკის კონცერტი 21:00 საათზე უნდა დაწყებულიყო, თუმცა მაყურებლის წინაშე მომღერალი საათნახევრის დაგვიანებით წარსდგა. შანსონის მოყვარულთა პირველი უკმაყოფილება სწორედ ამან გამოიწვია.
დაგვიანებით დაწყებული კონცერტის შემდეგ უკმაყოფილება გამოთქვეს VIP ლოჟის ბილეთების მფლობელებმა. ნასტია და ქსენია პრივილეგირებული ადგილის ბოლო მაგიდასთან ისხდნენ, თუმცა ადგილი მალევე დატოვეს და სცენასთან ახლოს, ფეხზე მდგომი ადევნებდნენ კონცერტს თვალს. როგორც მათ აღნიშნეს, VIP ლოჟა მათთვის მოუხერხებელი იყო, რადგან მათ ფეხზე მდგარი ხალხი ეფარებოდა.
ფეხზე მდგარი ხალხის გამო დისკომფორტზე საუბრობდა წინა რიგებში მსხომი მაყურებელიც. ისინი ამბობდნენ, რომ უწესრიგობა იყო და ორგანიზატორები და დაცვის პოლიცია არ უზრუნველყოფდნენ სკამებზე მსხდომი მაყურებლის კომფორტს. უწესრიგობის დროს რამდენიმე მაყურებელი სკამზეც ავიდა.
მაყურებელი იმედგაცრუებული იყო შუფუტინსკის მიერ ახალი ალბომიდან შესრულებული სიმღერებისა და მოკლე პროგრამის გამო. შუფუტინსკის კონცერტი 22:30-ზე დაიწყო და 23:13-ზე დასრულდა. 43 წუთიანი მოკლე პროგრამის მიუხედავად, შანსონის მოყვარულებმა ალკოჰოლის მიღებაც მოასწრეს, მათთვის განკუთვნილი ადგილებიც დატოვეს და ჯერ კიდევ სკამებზე მსხდომი მაყურებლის დისკომფორტის მიუხედავად, შუფუტინსკის ცნობილ სიმღერებზე "ტაგანკა" და "მარჯანჯა" აცეკვდნენ. "ამბები.გე" მაყურებელს გაესაუბრა:
თეა საბაშვილი ბორჯომიდან:
"ძალიან მიყვარს ეს მომღერალი. ბორჯომიდან ჩამოვედით მე და ჩემი მეუღლე, ბილეთებში გადავიხადეთ 130-130 ლარი, მაგრამ გაგვიცრუვდა იმედები. მან შეასრულა ახალი ალბომიდან სიმღერები, ხოლო ძველი ალბომიდან, რაც ჩვენ გვიყვარს, მხოლოდ ორი სიმღერა იმღერა. "აფთერ ფართის" ბილეთები გვაქვს და ვნახოთ, რამდენად შევძლებთ მასთან მიახლოებას. ორგანიზატორებმა თქვეს, რომ პირდაპირ კონტაქტში იქნება მაყურებელთან და სურათების გადაღების საშუალებაც გვექნება".
ირმა ჭანტურია თბილისდან:
"არ არის ორგანიზებული, ბილეთში 50 ლარი გადავიხადეთ, წინა რიგებში რომ ვყოფილიყავით, ორგანიზატორების და დაცვის პოლიციის ბრალია ეს ქაოსი. ეს ხალხი წამოიშალა და წინ დადგა, წეღან ვიღაც მთვრალი იდგა, ყვიროდა უაზრობებს, ხედავდნენ და არ გაიყვანეს. ვინც კონცერტს ატარებს, უნდა გაეწია ორგანიზება".
ნასტია და ქსენია მოსკოვიდან:
"VIP ადგილის ბილეთები გვაქვს, მაგრამ დავტოვეთ და წინ გადმოვედით იმიტომ, რომ ადგილი სულ უკანა მაგიდასთან შეგვხვდა. ხალხი ფეხზე დგას და ჩვენი მაგიდიდან არაფერი ჩანდა. იმედი გვაქვს "აფთერ ფართის" დროს მოგვეცემა საშუალება დროის უფრო კარგად გატარების. ძალიან მოგვწონს პროგრამა, ახალი სიმღერები და ბათუმი".
მაყურებელთა შორის ბევრი უცხოელი იყო - ძირითადად რუსეთიდან. მოსკოვიდან ბათუმში დასასვენებლად ჩამოსული წყვილი, ვიტალი და იულია კლიმჩუკები კონცერტით კმაყოფილები იყვნენ:
"არაჩვეულებრივი კონცერტი იყო, ძალიან გვენატრებოდა ჩვენი საყვარელი მომღერლის კონცერტი და სიტყვებით ვერ გადმოვცემთ ისეთი ბედნიერები ვართ, რომ ბათუმში ვესწრებით მის კონცერტს. შეასრულა სიმღერები ახალი ალბომიდან, რისი ცოცხლად მოსმენის საშუალებაც აქამდე არ გვქონდა".
კონცერტით კმაყოფილნი იყვნენ ორგანიზატორებიც. Music Promotion-ის ხელმძღვანელის ნინო დავითაიას ინფორმაციით, კონცერტს 3 000 ადამიანი ესწრებოდა:
"დღევანდელი დღე, ამინდის გაუარესების მიუხედავად, ძალიან წარმატებული აღმოჩნდა. ძალიან ბევრი ადამიანი მოვიდა, დაახლოებით 3 000 მაყურებელია დღეს აქ. ხალხი ძალიან კარგად ატარებენ დროს და ერთობა. ჩვენ ძალიან მოხარულები ვართ, რომ ბათუმს ასეთი სასიამოვნო საღამო ვაჩუქეთ".
კონცერტის დაწყებამდე მიხეილ შუფუტინსკიმ ჟურნალისტებთან კომენტარი გააკეთა. როგორც მან აღნიშნა, ის ბათუმში პირველადაა და მოხარულია, რომ საქართველოში კონცერტის ჩასატარებლად ჩამოვიდა. მისივე თქმით, ის წლების წინ სოხუმში იმყოფებოდა. მიხეილ შუფუტინსკიმ რუსეთის მიერ საქართველოს ოკუპაციის თაობაზე დასმულ შეკითხვაზე აღნიშნა, პოლიტიკა უნდა აკეთონ პოლიტიკოსებმა:
"ცოტას ვღელავ, იმიტომ რომ არასდროს ვყოფილვარ ბათუმში. მე მეგონა, რომ ვიყავი აქ ნამყოფი, მაგრამ ეს იყო ძალიან დიდი ხნის წინ - სანამ წავიდოდი ამერიკაში მე ვიმყოფებოდი სოხუმში. დღეს იქნება კონცერტი, რაც ჩემთვის ძალიან სასიამოვნოა. ველოდები, როდის გავალ სცენაზე და ვიმღერებ თქვენთვის. გეტყვით, რომ მე ვმღერი სიმღერებს და პოლიტიკით უნდა იყოს დაკავებული ის ხალხი, ვინც აკეთებს პოლიტიკას. ჩემი პოლიტიკაა ის კარგი სიტყვები და ის სიმღერები, რომელსაც მე ვმღერი ჩემი მაყურებლისთვის", - აღნიშნა მიხეილ შუფუტინსკიმ.
კონცერტის ბილეთები 30-დან 130 ლარამდე ღირდა.
ნინო ხოზრევანიძე
ბათუმი
იხილეთ ვიდეო
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
