12 წლის კახელი გოგონა, რომელმაც გათხოვებაც მოასწრო, განქორწინებაც და ორსულობაც - სასიყვარულო სამკუთხედის ამბის ყველა მხარე

კახეთში განვითარებული სასიყვარულო სამკუთხედის ამბავი, რომელშიც 12 წლის ორსულმა სკოლის მოსწავლემ არაოფიციალურად გათხოვებაც მოასწრო და განქორწინებაც.

გურჯაანელი 12 წლის ორსული გოგონასა და 18 წლის ბიჭის ამბავმა მთელი საქართველო აალაპარაკა და საქმე უკვე სამართალდამცავების შესწავლის საგანიც გახდა. 18 წლის ახალგაზრდა, რომელმაც 6 თვის ორსული გოგონა მიატოვა, დააკავეს, ის ყვარელის წინასწარი დაკავების იზოლატორშია გადაყვანილი. საქმეზე გამოძიება 140-ე მუხლით დაიწყო, რაც არასრულწლოვანთან სქესობრივი კავშირის დამყარებას გულისხმობს და 7-დან 9 წლამდე თავისუფლების აღკვეთას ითვალისწინებს. 12 წლის მოზარდს კი ექსპერტიზა ჩაუტარდა.

როგორც ცნობილი გახდა, 12 წლის გოგონა 18 წლის ბიჭზე საკუთარი სურვილით ზაფხულში გათხოვდა და ამჯამად უკვე 6 თვის ორსულია. ის მეუღლემ ორი კვირაა, რაც მიატოვა და პირველ ცოლს დაუბრუნდა, რომელიც 9 თვის ორსულია. პირველი ცოლი კი მან 13 წლის ასაკში მოიყვანა და მასაც ერთ წელში გაშორდა.

"ფეხმძიმე გოგოს ხელი ჰკრა და გააგდო, მომწყინდა, მე უბრალოდ ქალი მინდოდა და ვერთობიო. ნივთია, რომ ერთობა და სხვაზე გადაინაცვლებს? პირველი ცოლი ორსულადაა და თუ ორსული უნდოდა, ეს ორსულად არ არის?", - ამბობს გოგონას დედა.

გოგონას მიმართ მეუღლის მხრიდან სისტემატიურ ძალადობაზე საუბრობენ ორსულის მამაც და დაც.

"ისე მექცეოდა, თავ-ბედს ვიწყევლიდი, მასხარადაც მიგდებდაო. მე შენ იმიტომ მყავხარ, რაც მინდა, სადაც მინდა, როგორც მინდა ისე უნდა მოგექცეო. ბავშვიანს ხელს როგორ ვკრავ, ბავშვსაც გააჩენს, არ მოვაშორებინებ, ბავშვმა რა დააშავა", - ამბობს გოგონას მამა.

"ტონუსი ქონდა მომატებული, წამლებსაც არ ყიდულობდნენ, ჩვენ რასაც შევძლებდით, ვყიდულობდით. ექიმმა უთხრა, თავის შორს დაეჭირა, მაგრამ მე როგორც მინდა, ისე იქნება, მაშინ ცოლი რისთვის მოვიყვანე, ურთიერთობა უნდა გვქონდესო", - ამბობს გოგონას და.

ამბის სხვა ვერსია აქვს ბიჭის ოჯახს. დაკავებულის დედა ნებისმიერი ძალადობრივ ქმედებას კატეგორიულად გამორიცხავს. "არავინ ცუდად არ ექცეოდა, თავზე ვევლებოდი. ჩვენ არ გაგვიგდია" ,- ამბობს ბრალდებულის დედა.

ძალადობას გამორიცხავენ და გოგონას ოჯახს ადანაშაულებენ ბიჭის ახლობლებიც.

"გავრცელდა ინფორმაცია, ვითომ გააუპატიურა, რამდენი თვის ფეხმძიმეა აბა კითხეთ. დღეს და გუშინ ხომ არ წაიყვანა, რამდენი თვეა ამის ოჯახში ცხოვრობს? არ უცემია და თუ ზედმეტი დაიყვირა ან შეაგინა მეუღლემ, რომ თხოვდებოდა მომზადებულიც უნდა ყოფილიყო. ოჯახიდან არც არავის გაუგდია, თავისი ნებით წავიდა. ეს ბიჭიც ადგა და პირველი ცოლი მოიყვანა. ამის მერე წამოვიდა საჩივარი გოგონას მხრიდან", - ამბობს ოჯახის ახლობელი.

სექსუალური ურთიერთობა რომ არაოფიციალურ ქორწინებამდე ქონდა წყვილს, ამ ვერსიას გოგონას კლასელების ნათქვამიც ამყარებს. როგორც ისინი ყვებიან, 18 წლის ბიჭს 12 წლის გოგონა სექსუალური კავშირის დამყარების მიზნით, საკლასო ოთახიდანაც გაჰყავდა საგაკვეთილო პროცესის დროს და ამბობდა, რომ ის მისი საცოლე იყო.

აღნიშნულ ინფორმაციას სკოლის დირექტორი კატეგორიულად უარყოფს. როგორც ის ამბობს, უამრავი საქმე აქვს და სხვის ცხოვრებაში ვერ ჩაერევა.

"ჩვენ გვქონდა გოგონასთან საუბარი და ის ბედნიერად გრძნობდა თავს. პირველი ცოლი ჰყავდა იმ ბიჭს, მაგრამ რატომ უნდა მეეჭვა რამე? ეს გოგონა როცა მოდიოდა სკოლაში, მას დამრიგებელი ჰყავს და არასოდეს უთქვამს, რომ ვინმე ძალადობდა. არ მაინტერესებს, ვის ჰყავს ცოლი და ვის - არა. სოფელში იმდენი ადამიანია, სკოლის დირექტორმა რატომ უნდა იცოდეს? გოგონა დადიოდა სკოლაში, ჩვეულებრივ ესწრებოდა გაკვეთილებს, ბოლოს უკვე ფეხმძიმედ იყო და აღარ მოსულა. მე არ ვერევი სხვის პირად ცხოვრებაში. გამოიძიოს პროკურატურამ. კანონი ზოგადი განათლების შესახებ მე არ მაძლევს ამ ბავშვის ამორიცხვის უფლებას, ვუწერთ არას. მე ისედაც ბევრი საქმე მაქვს და თქვენგან გასხვავებით სხვის პირად ცხოვრებაში არ ვერევი", -ამბობს სკოლის დირექტორი.

სკოლის დირექტორისა და მშობლის პასუხისმგებლობის საკითხზე ამახვილებს ყურადღებას სახალხო დამცველის აპარატი. ომბუდსმენის ოფისმა საქმის შესწავლა უკვე დაიწყო.

"საქართველოს შრომის, ჯანმრთელობისა და სოციალური დაცვის სამინისტრომ დროულად უნდა განახორციელოს ბავშვთა ძალადობისგან დაცვის მიმართვიანობის (რეფერირების) პროცედურით გათვალისწინებული ვალდებულების შესრულება. შესაძლო ძალადობის შესწავლის პროცესში ჩაერთოს სოციალური მუშაკი და ფსიქოლოგი. ასევე შესწავლილი იქნას მშობლის მოვალეობის შესრულების საკითხი და განხორციელდეს შესაბამისი ღონისძიებები შესაძლო დანაშაულის შეუტყობინებლობის საკითხის შესწავლისათვის.

საქმის ფაქტობრივი გარემოებებიდან გამომდინარე, ასევე შესაძლოა იკვეთებოდეს ზოგადსაგანმანათლებლო დაწესებულების დირექტორის პასუხისმგებლობის საკითხი, რადგან, მედიაში გავრცელებული ინფორმაციის თანახმად, მისთვის ცნობილი იყო 12 წლის ბავშვის მიმართ სქესობრივი თავისუფლებისა და ხელშეუხებლობის წინააღმდეგ მიმართული სავარაუდო ქმედების შესახებ. აღნიშნულის მიუხედავად მან არ განახორციელა რეფერირების შესაბამისი პროცედურით გათვალისწინებული სავალდებულო ქმედებები, მათ შორის, საფუძვლიანი ეჭვის საფუძველზე ძალადობის იდენტიფიკაცია და შემთხვევის შემდგომი მართვა განსაზღვრული კომპეტენციის ფარგლებში", - განაცხადეს სახალხო დამცველის აპარატში.

მტყუან-მართლის გარკვევამდე კი ფაქტია, რომ ერთი თითქოსდა "უწყინარი სიყვარულის " ამბიდან მიტოვებული არასრულწლოვანი და ბრალდებული მამაკაცი მივიღეთ, რომელიც სულ მალე 2 შვილის მამა გახდება. კახეთში განვითარებული ეს სენსიტიური ამბავი, სიყვარულის საზღვრებს სცდება და უფროსების გულგრილ დამოკიდებულებას ადასტურებს. ტრაგიკული კი ის არის, რომ მიტოვებამდე, ახლა უკვე დაპირისპირებული ორივე მხარე, ერთად და ბედნიერად ცხოვრობდა, შეგუებულები 12 წლის პატარძალსა და 18 წლის დანიშნულ ბიჭს.

მოამზადა ბელა თაბუაშილმა ტელეკომპანია "გურჯაანის", "კახეთის საინფორმაციო ცენტრისა" და ტელეკომპანია "იმედის" მასალების მიხედვით.