3
აპრილიდღის ზოგადი ასტროლოგიური პროგნოზი
საქართველოს პირველი პრეზიდენტის, ზვიად გამსახურდიას შვილი, კონსტანტინე გამსახურდია უარყოფს, რომ ინტერნეტში გასაყიდად გამოტანილი "მერსედესის" მარკის ავტომობილი პრეზიდენტ გამსახურდიას ეკუთვნოდა.
როგორც კონსტანტინე გამსახურდიამ დღეს პრესკონფერენციაზე განაცხადა, ზვიად გამსახურდია ორი ავტომობილით გადაადგილდებოდა.
"ორივე მერსედესი SL კლასის ტიპისაა, მათ შორის ისეთი, რომლითაც უშუალოდ პრეზიდენტი დადიოდა, ეს იყო მუქი ნაცრისფერი; მეორე მანქანა კი ღია მწვანე ფერის, ისიც SL კლასის. რომლითაც პრეზიდენტი გადადგილდებოდა იყო მეშვიდე კატეგორიის, ხოლო მეორე იყო მეხუთე კატეგორიის ჯავშანმანქანა. ეს ორივე ავტომანქანა შეძენილი იქნა გერმანიაში მაშინდელი ოფიციალური პირის კახი ასათიანის მიერ, თითოეული 42 ათას გერმანულ მარკად, ეს შეძენა, ჩემი მონაცემებით, უნდა განხორციელებულიყო 1991 წლის თებერვალში. ორივე მანქანა ჩამოყვანილ იქნა თბილისში, როგორც სახელმწიფო საკუთრება, ერთი მათგანი გადაეცა პრეზიდენტის ესკორტს და გადაადგილდებოდა საქართველოს პირველი პრეზიდენტი; მეორე მანქანა კი ერთხანს სადგომზე იმყოფებოდა, ხოლო შემდგომ იგი სარგებლობაში პრეზიდენტმა გადასცა აჭარის უზენაესი საბჭოს თავმჯდომარეს ასლან აბაშიძე", - განაცხადა კონსტანტინე გამსახურდიამ.
მისივე თქმით, როდესაც მოხდა სახელმწიფო გადატრიალება პრეზიდენტი მუქი ნაცრისფერი SL კლასის ჯავშანმაქანით ჩავიდა ქალაქ იჯევანში, სადაც ისინი იმყოფებოდნენ დაახლოებით 10 დღის განმავლობაში, ვიდრე არ გაირკვა მისი გროზნოში გადასვლის საკითხი.
გამსახურდიას განცხადებით, ავტომანქანა დარჩა იჯევანში, ხოლო საქართველოს სამხედრო საბჭომ, მოგვიანებით, ეს მანქანა დაიბრუნა.
"მეორე მანქანა იმყოფებოდა აჭარაში და ასლან აბაშიძემ ის შემდგომში დააბრუნა თბილისში. ედუარდ შევარდნაძის პერიოდში ორივე "მერსედესი" როგორც მუქი ნაცრისფერი, ასევე ღია მწვანე ფერის ჯავშანმანქანა იმყოფებოდა, ჯერ საქართველოს მთავარი პროკურატურის სადგომზე, ხოლო, როდესაც ხელისუფლებაში მოვიდა მიხეილ საკააშვილი, მაქანები გადაყვანილ იქნა სახელმწიფო ესკორტის სპეციალურ სადგომზე და საგანგებო სამსახურის დოტაციაზე. რამდენადაც ჩემთვის ცნობილია, ორივე მანქანა იყო მუშა მდგომარეობაში დღესაც ეს ორივე მანქანა იმყოფება სახელმწიფო ესკორტის სპეციალურ სადგომზე", - განაცხადა კონსტანტინე გამსახურდიამ.
მისივე თქმით, ის მანქანა, რომელიც დღეს ინტერნეტში გავრცელდა და საქართველოს პირველი პრეზიდენტის მანქანის სახელით იყიდება, არის ლურჯი ფერის.
"სხვათა შორის, რამდენიმე ფოტო ვნახე, ფოტოებზე არის მანქანის კარები გაღებულ მდგომარეობაში და ეს არ გავს ჯავშანმანქანას. ეს არც მეშვიდე კატეგორიის ჯავშანმანქანაა და არც მეხუთე კატეგორიის. მანქანა, რომელზეცაა საუბრი ჩემთვის უცნობია, რა მანქანაა საიდან გაჩნდა", - აღნიშნა გამსახურდიამ.
ინტერნეტსივრცეში რამდენიმე დღის წინ გავრცელდა ინფორმაცია, რომ საქართველოს პირველი პრეზიდენტის ზვიად გამსახურდიას კუთვნილი "მერსედესის მარკის ავტომობილი, რომელიც 1985 წელს არის გამოშვებული 32 000 აშშ დოლარად იყიდება.
