18
მარტიდღის ზოგადი ასტროლოგიური პროგნოზი
მომღერალი, ტაქსისტი გევორქ პეტროსიანი "ნიჭიერის" მეშვეობით, გუშინ მთელმა საქართველომ გაიცნო. მის მიერ შესრულებულმა სიმღერამ ჟიურიზე და მაყურებელზე წარუშლელი შთაბეჭდილება დატოვა. პეტროსიანი ამბობს, რომ რამდენიმე წლის წინ იეღოვას მოწმეების მსხვერპლი გახდა და მისი კარიერა სწორედ ამიტომ დაინგრა. მისი თქმით, ჰქონდა შანსი ორგანიზაციის უხუცესი გამხდარიყო, მაგრამ ამაზე უარი თქვა და იეღოვას მოწმეების რიგები დატოვა, რასაც მისი ოჯახიც შეეწირა. ის მეუღლემ მიატოვა.
- რატომ მიიღეთ "ნიჭიერში" მონაწილეობის გადაწყვეტილება?
- ორი მიზეზი მქონდა. მინდოდა ჩემი მეუღლისთვის დამემტკიცებინა, რომ ჩემში ნიჭი მოკლეს და მეჩვენებინა მისთვის, თუ რისთვის შემეძლო მიმეღწია ამ სექტის მსხვერპლი რომ არ გავმხდარიყავი.
- რომელ სექტას გულისხმობთ?
- იეღოვას, სადაც დაახლოებით ათი წლის წინ აღმოვჩნდი. დეპრესია მქონდა, ის პერიოდი იყო, როცა საქართველოში მუსიკით ვერ იშოვიდი კარგ შემოსავალს. რეალურად, კარგ მუსიკოსებსაც არ აფასებდნენ და მეც არ ვიყავი გამონაკლისი. რომ გაიგო სანათესაომ, კერძოდ, ბიცოლამ, რომელიც მაშინ გაწევრიანებული იყო იეღოვას ორგანიზაციაში, მითხრა, მე წაგიყვან იქ, სადაც სულ სხვა ფასეულობები და სულ სხვა მუხტიაო და ასე აღმოვჩნდი იეღოვას ორგანიზაციაში. მართალი ადამიანის პოზიციიდან ვიტყვი, რომ არასწორი კუთხით მანახეს წმინდა წერილები. საუბარია სახარებაზე, სადაც ქრისტე, როგორც უფალი არ არის ნახსენები, ეს არის სექტა. არა აქვს მნიშვნელობა, მე გავაგრძელებ თუ არა სიმღერას, უბრალოდ, მინდოდა მეჩვენებინა საზოგადოებისთვის, რომ მე, როგორც მომღერალი, მოვკვდი და როგორც პიროვნება აღმოვჩნდი სექტაში.
- დაოჯახებული იყავით მაშინ, როცა სექტის მსხვერპლი აღმოჩნდით?
- იქ გავიცანი ჩემი მეუღლე, იეღოველია ისიც. როცა წამოვედი ამ სექტიდან, თვითონ შეიტანა განცხადება სასამართლოში და 6 თვეა, რაც დავშორდით. ყოველდღიურად უფრო და უფრო ვრწმუნდებოდი იეღოვას სწავლების ცდომილებაში. მოგეხსენებათ, სახარება შედგება 27 წიგნისგან, მარტო მე-7 საუკუნეში გვევლინება იმ სახით, როგორიც დღეს გვაქვს. სანამ ბიბლია შედგებოდა ამ სახით, წმინდა მამები იკვლევდნენ, რომელია სულიწმინდა ჩაბერილი წიგნები და რომელი - არა. რა უფლება აქვთ იეღოველებს, როცა თავის ქადაგებაში იყენებენ კანონს, როცა ბიბლიური კანონი შედგენილია წმინდა მამების მიერ. ისინი სხვის ნაშრომს იყენებენ.
- როდის და როგორ მიხვდით, რომ სექტის მსხვერპლი იყავით?
- ბოლო 3 წელი ვიყავი მართლმადიდებელი, რაც უფრო იკლებდა ჩემი ქადაგების ინტენსიურობა, მეუღლესთან იმატებდა პრობლემები. მეუბნებოდნენ, შენ გაქვს პოტენციალიო, რადგან კარგი განათლება მქონდა, რამდენიმე ენას ვფლობ, რეალურად შემეძლო გავმხდარიყავი მათი უხუცესი, მაგრამ სურვილი არ მქონდა. გარდა იმისა, რომ შენ ეს არ გჯერა, დოქტრინა ისე აქვთ დაყენებული იეღოველებს, რომ ეს არაა საკმარისი. ვიცოდი მეუღლე დამშორდებოდა, ბავშვს წაიყვანდა, მაგრამ ისინი მავალდებულებდნენ, სხვებთან მექადაგა. ჩემი ტრაგედია ჩემი ტრაგედიაა და ამის გამო სხვას ვერ მოვახვევდი თავზე იმას, რაც მე არ მწამს. ამიტომ წამოვედი, ვერ ვიქადაგებდი.
- ოპერიდან რატომ წამოხვედით?
- ორ სპექტაკლში მივიღე მონაწლეობა, ვანო მაჭავარიანის სპექტაკლებში ვიმღერე არიები და მერე წამოვედი. მშობლებთანაც მქონდა პრობლემა, მითხრეს ან ჩვენი სიყვარული აირჩიე, ან დარჩი იეღოვასთანო. მიხევდნენ ჟურნალებს. ტაქსის მძღოლად ვმუშაობ რამდენიმე წელია, თავისუფალი გრაფიკი მაქვს და შემიძლია, როცა მინდა მაშინ წავიკითხო წმინდა მამების ცხოვრება. სახარების ახსნა და ა.შ. წიგნის გამოცემას ვაპირებ "იეჰოვას მოწმეების ნაპრალები", პატრიარქსაც შევხვდი უკვე და მამა თომასთან ერთად ვმუშაობ წიგნზე. ჩემთვის მთავარია ჩემი მართლმადიდებლური მისია შევასრულო.
ტაქსაობამ გადამარჩინა, როცა ღამის საათებში ვბრუნდებოდი სახლში, მეუღლეს იმ დროს ეძინა და საშუალება მქონდა, იეღოვას გარდა, სხვა ლიტერატურაც მეკითხა. როგორც ყველა ნორმალური ადამიანი, იმ გრაფიკით რომ მემუშავა და სახლში 8-9 საათზე დავბრუნებულიყავი, ამას ვერ მოვახერხებდი. განგაშს ატეხავდა, 3 წელი ისე ვკითხულობდი მართლმადიდებლურ ლიტერატურას, მეუღლე ვერ იგებდა. რატომ უნდა შემიყვარდეს უმოქმედო ღმერთი, როცა იესომ ამდენი სიკეთე და სიყვარული დათესა. სხვაობას ხომ გრძნობთ? იეღოვამდე მონოფიზიტი ვიყავი, ახლა კი მართლმადიდებელი ვარ, ძალიან ძალიან მწამს. ქრისტე მხსნელად უნდა მიიღოს ყველა ადამიანმა საკუთარ გულში. მე თვალსაჩინო ფიგურა ვიყავი იეღოვას მოწმეებისთვის. სხვებს ჩემზე ეუბნებოდნენ, მიბაძეთ მას. ეს სხვანაირად შეიძლებოდა გაკეთებულიყო, ორგანიზაცია არ უნდა იყოს გაიგივებული ღმერთთან. ანუ მათი დევიზია - ჩვენთან თუ არ ხარ, ვერ გადარჩები. თუ ვერ იქადაგე, ვერ გადარჩები.- მეუღლეს არ აქვს თქვენთან დაბრუნების სურვილი?
- მას აქვს შერიგების სურვილი, მაგრამ მხოლოდ იმ შემთხვევაში, თუ დავბრუნდები იეღოვას მოწმეებში.
თამარ ბოჭორიშვილი
AMBEBI.GE
