აფხაზეთში ავიაკატასტროფას რუსი ტურისტები ემსხვერპლნენ: "გოგონას დედამ, ორსულობის გამო უარი თქვა გაფრენაზე..."

27 ივლისს ბიჭვინთაში მცირემოტორიანი თვითმფრინავი ჩამოვარდა. აფხაზეთის დე ფაქტო რესპუბლიკის საგანგებო სიტუაციათა სამსახურის ცნობით, შემთხვევის შედეგად, სამი ადამიანი დაიღუპა. თვითმფრინავი რუსულ კერძო ავიაკლუბს "მეშვიდე ცას" ეკუთვნოდა.

შემთხვევა ბიჭვინთაში 27 ივლისს, 17:22 საათზე მოხდა. აფხაზეთის დე ფაქტო რესპუბლიკის საგანგებო სიტუაციათა სამსახურის პრესსამსახურის უფროსმა მიზან ლომიამ განაცხადა, რომ დაღუპულები სამარიდან არიან, მათ შორის არის მცირეწლოვანი გოგონა.

"დაღუპულებს შორის არიან სამარელი მფრინავი, 1970 წელს დაბადებული ალექსანდრ სემიონოვი და მისი მგზავრები - 1987 წელს დაბადებული, მოსკოველი ანდრეი უკოლოვი და 2011 წელს დაბადებული ეკატერინა დარდიკინა. სამივე მათგანი რუსეთის მოქალაქეები არიან", - ამბობს ლომია.

პირველადი ინფორმაციით, მფრინავმა მართვა დაკარგა და ბიჭვინთასთან ახლოს, მდინარე ბზიფის ნაპირზე ჩამოვარდა. ბიჭვინთის ე.წ. საგანგებო სიტუაციათა სამსახურმა დაღუპულთა ცხედრები უკვე გადაასვენა პროზექტურაში.

ადგილობრივების თქმით, დაღუპული 6 წლის გოგონა დედასა და მამინაცვალთან ერთად ბიჭვინთის ერთ-ერთ სასტუმროში ისვენებდნენ. გოგონას დედამ, ფეხმძიმობის გამო უარი თქვა მათთან ერთად თვითმფრინავით გასეირნებაზე. ოჯახი მოსკოვში დაბრუნებას ხუთშაბათს აპირებდა, თუმცა, შემდეგ, პარასკევამდე დარჩენა გადაწყვიტეს...

გაგრის რაიონის ე.წ. პროკურატურა მომხდარის დეტალებს სწავლობს... ეს პირველი შემთხვევა არ არის, როდესაც მსგავსი რამ ხდება - 6 ივლისს ბიჭვინთის აეროპორტში, საჰაერო აპარატმა А-ЗЗ МА, რომელიც ასევე კერძო პირს ეკუთვნოდა, უკიდურესად სახიფათო დაშვება განახორციელა, რა დროსაც ორმა მოსკოველმა ტურისტმა საშუალო სიმძიმის ტრავმები მიიღეს.

აფხაზეთის ე.წ. პროკურატურამ მომხდართან დაკავშირებით კერძო კომპანიის წინააღმდეგ სისხლის სამართლის საქმე აღძრა.

მომხდარს უკვე მოჰყვა რუსულ და აფხაზურ სოციალურ ქსელებში გამოხმაურება. რუსების თქმით, მუდმივი რჩევის მიუხედავად, ამ მოუწესრიგებელ და განუვითარებელ "ქვეყანას" რატომღაც მაინც არ ეშვებიან...

"ვიზიარებ, ბავშვის დაღუპვის ტრაგედიას, ძალიან გულსატკენია, არავის განაცდევინოს, მაგრამ კიდევ რაღა უნდა მოხდეს, რომ იქაურობას შევეშვათ... გვაყაჩაღებენ, გვძარცვავენ, როგორც შეუძლიათ, ისე გვებრძვიან, სადაც უხერხდებათ იქ გვკლავენ... იქ მოუწესრიგებელია ყველაფერი, გზებიც კი და როგორ შეიძლება ენდო მათ საჰაერო აპარატებს?.. რა ძნელი მისახვედრია, რომ აფხაზეთში გაუმართავი, დაჟანგებული და ჯართადქცეული ტექნიკის მეტს არ ჩაიტანდნენ... თქვენ ხომ იცით "შიგნით" რა ხდება, თქვენ ხომ იცნობთ სიტუაციას და მაინც მიდიხართ, სიკვდილზე მიდიხართ, რატომ?.." - წერენ რუსები სოციალურ ქსელებში.

აფხაზების თქმით, ეს არის ბოლო წლებში გამორჩეულად მძიმე სეზონი, - "კვირა არ გადის, რამე უბედურება არ მოხდეს - გაუპატიურება, მკვლელობა, ყაჩაღობა, ახლა კი, ეს ტრაგედია... ეს ყველაფერი ნიშნავს, რომ ქვეყანაში ძირეული რეფორმებია ჩასატარებელი, ყველა მიმართულებით, თორემ, ყოველდღიურად კოლაფსისკენ მივდივართ... პროკურატურას ვთხოვთ, დროულად გამოიძიოს ტრაგედიის მიზეზები", - წერენ აფხაზები.

ლალი პაპასკირი

AMBEBI.GE

ფოტო: Sputnik Абхазия