26
ივნისიდღის ზოგადი ასტროლოგიური პროგნოზი
სოფელ სამრეკლოს ეკლესიიდან 68 ლარის ქურდობის გამო, 21 წლის ახალგაზრდა, რომელსაც ჯანმრთელობასთან დაკავშირებული პრობლემები აქვს, 5 თვეა პატიმრობაშია. ბრალდებული აღიარებს, რომ მშიერი იყო და მოპარული ფულით პური და ძეხვი იყიდა, თანხის ნაწილი კი პოლიციელებმა ჯიბიდან ამოუღეს. სიღნაღის სასამართლო უკვე მესამე თვეა საქმეს იხილავს. ბრალდებულს 6-დან 10 წლამდე თავისუფლების აღკვეთა ემუქრება. დაზარალებულად ხორნაბუჯისა და ჰერეთის ეპისკოპოსი, მელქისედეკ ხაჩიძეა ცნობილი.
21 წლის მამაკაცი ექვსშვილიანი სოციალურად დაუცველი ოჯახის წევრია. ისინი სოფელში, ყოფილი აბანოს შენობაში, მძიმე პირობებში, ბეტონზე ცხოვრობენ მცირეწლოვან ბავშვებთან ერთად. ბრალდებული ქურდობისთვის, წარსულში ორჯერ იყო ნასამართლევი. მათ შორის ერთხელ 20 ლარის ღირებულების ჯართის მოპარვისთვის და პირობითი მსჯავრი მოხსნილი არ ჰქონდა. ამ გარემოების გამო პროკურატურამ მას ბრალი სისხლის სამართლის კოდექსის 238-ე მუხლით აქვს წაყენებული.
"ქურდობა - ჩადენილი სადგომში ან სხვა საცავში უკანონო შეღწევით, იმის მიერ, ვინც ორჯერ ან მეტჯერ იყო ნასამართლევი სხვისი ნივთის მართლსაწინააღმდეგო მისაკუთრებისათვის ან გამოძალვისათვის - ისჯება თავისუფლების აღკვეთით ვადით ექვსიდან ათ წლამდე".
ბრალდებულის დედის, მაია ფოცხვერაშვილის თქმით, 6 იანვარს გამართულ სასამართლო პროცესზე ნახა, რომ მის შვილს ერთი თითი დაზიანებული ჰქონდა. "პროცესზე ჩემმა შვილმა თქვა, რომ ციხეში ცემენ. ბადრაგი აჩუმებდა. პროცესის მერე მე გონება დავკარგე, გული გამიხდა ავად, ისეთი რაღაცები თქვა ჩემმა შვილმა, თან ნახევარი თითი აღარ ჰქონდა", - აცხადებს ბრალდებულის დედა.
სასჯელაღსრულების სამინისტროში კი განმარტავენ, რომ ბრალდებულმა და მისმა თანამესაკნემ ფსიქოტროპული მედიკამენტები მოითხოვეს, უარის მიღების შემდეგ კი გაბრაზებულმა ხელი კედელს მიარტყა, რა დროსაც თითი დაიზიანა.
