თურქეთში მოკლული სამი ადამიანის შესახებ ახალი დეტალები ხდება ცნობილი

მედია თურქეთში დაღუპულების შესახებ დამატებით ინფორმაციას ავრცელებს. თურქული პრესის ცნობით, დაღუპულები არიან 56 წლის ემა შარიპოვა, მისი და, 46 წლის ელნაზი და ერთ-ერთის შვილიშვილი 19 წლის საჰიპ შარიპოვი.

მედიის ინფორმაციით, მათი ცხედრები ბინაში იპოვეს. ემა შარიპოვას და საჰიპ შარიპოვს ყელი ჰქონდათ გამოჭრილი, ელნაზ შარიპოვა კი გაგუდული იყო.

ტრაგიკული შემთხვევა თურქეთის ჩრდილო-დასავლეთში მდებარე ქალაქ დუზჯეში მოხდა, რომელიც სტამბოლიდან დაახლოებით 228 კილომეტრში მდებარეობს.

იხილეთ ვიდეო| ახალი დეტალები თურქეთში ყელგამოჭრილი 3 ქართველის შესახებ

საქართველოს საგარეო საქმეთა სამინისტროს ინფორმაციით, ამ დროისთვის დადგენილია, რომ თურქეთში გარდაცვლილთაგან ერთია საქართველოს მოქალაქე. გარდაცვლილთაგან ერთ-ერთ ქალს საქართველოს მოქალაქეობა შეწყვეტილი ჰქონდა და ის ამჟამად თურქეთის მოქალაქეა, ხოლო გარდაცვლილი მამაკაცის მოქალაქეობის საკითხი დადგენილი არ არის.

თურქეთში მომხდარ მკვლელობასთან დაკავშირებით მედიაში ურთიერთგამომრიცხავი ინფორმაციები ვრცელდება. აზერბაიჯანული გამოცემა haqqin.az-ის ინფორმაციით, თურქეთში, შირნაკის პროვინციაში, გუშინ ღამით სამართალდამცველებმა ერთ-ერთ საცხოვრებელ სახლში სამი ადამიანის ცხედარი იპოვეს. მათივე ინფორმაციით, სამივე ქართველია და მათ ყელი აქვთ გამოჭრილი.

განსხვავებულ ინფორმაციას ავრცელებს თურქული მედია. საინფორმაციო სააგენტო DHA-ს ცნობით, პოლიციამ ბინაში ქალბატონის, მამაკაცის და 7 წლის ბავშვის ცხედრები იპოვა, სიკვდილის ერთ-ერთ მიზეზად კი მხუთავი აირით გაგუდვა სახელდება. როგორც თურქმა სამართალდამცველებმა ჟურნალისტებს განუცხადეს, სამივე ქართველია. მომხდართან დაკავშირებით დაწყებულია გამოძიება.