სავარაუდო მკვლელი და ორივე გარდაცვლილი ერთ კორპუსში ცხოვრებდნენ - მეზობლები მუხიანში მომხდარი მკვლელობის მიზეზებზე

რამდენიმე საათის წინ მუხიანში ჯერჯერობით უცნობმა პირმა 40 და 60 წლის ადამიანები იმსხვერპლა. ამ დროისთვის არსებული ინფორმაციით, შეიარაღებულმა პირმა ცეცხლი ჯერ 40 წლის მამაკაცს გაუხსნა, შემდეგ კი ის პიროვნებაც მოკლა, რომელიც გარდაცვლილს გამოესარჩლა.

სამართალდამცველები დაახლოებით 40 წლამდე ასაკის ადამიანს ეძებენ. ის ყოფილი პატიმარია და ციხიდან ცოტა ხნის წინ გამოვიდა. როგორც ადგილობრივები აცხადებენ, მკვლელობის ერთ-ერთ მიზეზად მეზობლებს შორის წარსულში დაწყებული კონფლიქტი სახელდება. სავარაუდო მკვლელი და გარდაცვლილები, სამივე ერთ კორპუსში ცხოვრებდნენ. მკვლელობის მომენტში დანაშაულში ეჭვმიტანილი ნასვამ მდგომარეობაში იმყოფებოდა.

ასევე ადგილობრივების ინფორმაციით, მოსახლეობის ნაწილმა მკვლელობის შემდეგ სავარაუდო ბრალდებულის დაკავება შეძლო, თუმცა მოგვიანბეით მან შემთხვევის ადგილი დატოვა.

"როგორც ამბობენ, მკვლელი მთვრალი იყო. იარაღი ჰქონდა და წინ და უკან ატრიალებდა. მოკლულებმა ურჩიეს, რომ იარაღი შეენახა, რადგან ეზოში ბავშვები იყვნენ, მან კი აიღო და ამ ადამიანებს ესროლა", - აცხადებენ ადგილობრივები.

თვითმხილველების ინფორმაციით, ორივე მოკლულს ჭრილობა გულის არეში აქვს მიყენებული.

ცარცით შემოხაზული და დანომრილი ადგილების რაოდენობის მიხედვით, სავარაუდო ბრალდებულმა მკვლელობის ადგილას დაახლოებით 11-ჯერ გაისროლა.

სამართალდამცველები ამ დრომდე მუშაობენ შემთხვევის ადგილზე. გამოძიება 109-ე მუხლით მიმდინარეობს, რაც გულისხმობს განზრახ მკვლელობას დამამძიმებელ გარემოებებში.

იხილეთ ვიდეო

იხილეთ ასევე: მუხიანში ორი ადამიანი მოკლეს - რას ყვებიან თვითმხილველები

განახლება|მუხიანში გვიან ღამით მომხდარი მკვლელობა გახსნილია: შშს-მ ორი ადამიანის მკვლელობისთვის ბრალდებული დააკავა