"გასიებულები იყვნენ ორივე ცემისგან" - არტურ ოგანეზოვის მამა პრემიერს, პრეზიდენტს, პროკურატურას და შს სამინისტროს მიმართავს

პოლიციისთვის წინააღმდეგობის გაწევაში ბრალდებული არტურ ოგანეზოვის მამა პრემიერს, პრეზიდენტს, პროკურატურას და შს სამინისტროს მისი შვილის საქმის ობიექტურად გამოძიების თხოვნით მიმართავს. როგორც ვლადიმერ ოგანეზოვმა განაცხადა, 4 აპრილს, როდესაც მისი შვილი დააკავეს, იგი იმყოფებოდა ძველი თბილისის განყოფილებაში, სადაც არტურ ოგანეზოვის განწირული ყვირილი ესმოდა. შემდგომ კი, როგორც მამა იხსენებს, მისი შვილი და მისი მეგობარი განყოფილებიდან ნაწამები ჩამოიყვანეს.

"ვერ ვიცანი ჩემი შვილი, დღეს კი პროკურორები სადისტებს ხელს აფარებენ და მფარველობენ. ვთხოვ ღარიბაშვილს, მარგველაშვილს, შს სამინისტროს და პროკურატურას, საქმე სამართლიანად გამოიძიონ და ვისაც რა ეკუთვნის, დაისაჯოს. თუნდაც ჩემი შვილი იყოს დამნაშავე, შესაბამისად დაისაჯოს, მაგრამ სადისტები, რომლებიც პოლიციაში არიან და ახალგაზრდებს აწამებენ, გარეთ არ უნდა დადიოდნენ. გასიებულები იყვნენ ორივე ცემისგან, გაშავებულები ჰქონდათ სახეები", - განაცხადა ვლადიმერ ოგანეზოვმა.

ის დღეს საქალაქო სასამართლოში დაკითხული გამომძიებლის ჩვენებასაც გამოეხმაურა. კერძოდ, გამომძიებელმა რომელიც ოგანეზოვისა და ბაბაიანის საქმეზე დაკითხეს, განაცხადა, რომ ევროპის მოედანზე ახალგაზრდები ჩხუბობდნენ, რა დროსაც პოლცია ადგილზე მივიდა და ოგანეზოვმა მას ფიზიკური და სიტყვიერი შეურაცხყოფა მიაყენა. დეტალები კი, რა ადგილებში ჰქონდათ დაზიანებები ბრალდებულებს, გამომძიებელმა გიორგი ლიპარტელიანმა დეტალურად ვერ გაიხსენა. ბრალდებულის მამა აცხადებს, რომ სასამართლოში დაკითხული პოლიციელები ცრუობენ, როდესაც ამბობენ, რომ მოვლენები არ ახსოვთ.

არტურ ოგანეზოვი და ფილიპე ბაბაიანი პოლიციას ფიზიკურ ანგარიშსწორებაში ადანაშაულებენ. ბრალდებულების ინფორმაციით, მათ მაჯის საათის მეშვეობით გადაღებული აქვთ თუ როგორ უსწორდებიან პოლიციელები ევროპის მოედანზე, კლუბ "ნაინთან" და შემდგომ ძველი თბილისის განყოფილებაში.

"ინტერპრესნიუსი"