ვინ არის 33 წლის "კანონიერი ქურდი" ლავას ოღლი, რომელიც "სპორტსმენი კრიმინალებით" აჭარის გაკონტროლებას ცდილობს

მინდია გორაძის, იგივე "ლავას ოღლის" "კანონიერ ქურდად კურთხევა" 2013 წელს მოხდა. მისი სახელი უკრაინასა და საქართველოში, განსაკუთრებით კი ბათუმში, აქტუალური სწორედ ამ პერიოდიდან ხდება, თუმცა მისი კრიმინალური "ბეგრაუნდი" ბევრად "მდიდარია". ლავას ოღლისა და სამართალდამცავების გზები პირველად 2006 წელს გადაიკვეთა, როდესაც ის 2006 წელს ბანდიტიზმის მუხლით გასამართლდა.

მინდია გორაძემ ქვეყანა 2012 წელს დატოვა და იმ პერიოდიდან მისთვის ახალ ასპარეზად ოდესა იქცა. არსებული ინფორმაციით, ბათუმელი "ქურდი" ოდესაში ბინის ქურდებს აკონტროლებდა. მის მიერ კონტროლირებადი ქურდების ძარცვის მეთოდი კი საკმაოდ დახვეწილი იყო, - ისინი სახლებში შეღწევას ალპინისტების მოწყობილებებით ახერხებდნენ, თუმცა ლავას ოღლის უკრაინული ზეობის პერიოდი მალევე დასრულდა. ის უკრაინელმა სამართალდამცავებმა პირველად 2013-ში, მეორედ კი 2014 წელს დააკავეს და ორივე ჯერზე ლავას ოღლიმ სამართალდამცავებთან ღიად განაცხადა, რომ დიახ, ის კანონიერი ქურდია.

უკრაინიდან დეპორტირების შემდეგ ლავას ოღლი თურქეთში გადავიდა, თუმცა, როგორც "ნაციონალური მოძრაობის" წევრები ირწმუნებიან, მან საქართველოში შსს-ს მაღალჩინოსნის ნებართვით შემოაღწია, რასაც ქვეყნის ძალოვანი უწყება არ ადასტურებს.

რაც შეეხება მინდია გორაძის გავლენას ბათუმში, მედიაში გავრცელებული ინფორმაციის თანახმად, მან რამაზ დევაძეს ქალაქში "სპორტსმენ კრიმინალთა" ჯგუფის შექმნა დაავალა.

გახდა თუ არა ბათუმი საქართველოში "ქურდული სამყაროს" ცენტრი, ამ კითხვაზე პასუხი განსხვავებულია იმის მიხედვით, თუ ვინ გპასუხობთ. თუ ხელისუფლებას კითხავთ, ისინი უარყოფენ, ხოლო თუ "ნაციონალურ მოძრაობას" დაუსვამთ იგივე შეკითხვას, გიპასუხებენ, რომ ქვეყნის ზღვისპირა ქალაქში კრიმინალები და პოლიციის წარმომადგენლები შეხმატკბილებულები არიან. აღსანიშნავია, რომ აღნიშნული პოლიტიკური პარტიიდან ქურდულ სამყაროსთან დაკავშირებული ყველზე ხმაურიანი განცხადებებით გივი თარგამაძე გამოირჩევა, რომელიც სწორედ მის განცხადებებს უკავშირებს ბათუმში ორი ავტომობილის გადაწვის ფაქტს. თარგამაძე მიიჩნევს, რომ ქურდული სამყარო ჯავრს მის მეგობრებზე იყრის, რაც მისთვის გამაფრთხილებელი მესიჯია.

ბოლო ინფორმაციით, ლავას ოღლი ამჟამად თურქეთში იმყოფება, რაც შეეხება უკრაინას, მას იქ  ჩასვლა 2017 წლამდე აკრძალული აქვს.

იხილეთ ვიდეო

ასევე დაგაინტერესებთ| lenta.ru ქართველი კანონიერი ქურდების საფლავებს აქვეყნებს (+19 ფოტო)

AMBEBI.GE

სიახლე!

თუ დაინტერესებული ხართ მხოლოდ საზოგადოებრივი თემებით და არ გსურთ, მიიღოთ სხვა, თქვენთვის უინტერესო ინფორმაცია, მოიწონეთ გვერდი