იაშვილის კლინიკაში ბავშვის გარდაცვალების გამო, შესაძლოა ექიმის პასუხისმგებლობის საკითხი დადგეს

ჯანდაცვის სამინისტროს სამედიცინო საქმიანობის სახელმწიფო რეგულირების სააგენტოს კონტროლის დეპარტამენტი იაშვილის კლინიკაში გარდაცვლილი ბავშვისთვის გაწეული სამედიცინო დახმარების ხარისხს სწავლობს.

როგორც ჟურნალისტებს ჯანდაცვის სამინისტროს სამედიცინო საქმიანობის სახელმწიფო რეგულირების სააგენტოს კონტროლის დეპარტამენტის უფროსმა ლადო კეპულაძემ განუცხადა, მისი დეპარტამენტი სწავლობს იაშვილის კლინიკაში გარდაცვლილი პაციენტის საქმეს ჰოსპიტალიზაციიდან გარდაცვალებამდე მონაკვეთში.

მისივე თქმით, კლინიკაში მივლინებულია კომისია.

როგორც კეპულაძემ განმარტა, დეპარტამენტმა საჩივრის შესწავლა 14 აპრილს, პაციენტის დედის განცხადების საფუძველზე დაიწყო. კერძოდ, პაციენტის დედა პრეტენზიას გამოთქვამდა, რომ ბავშვის ჯანმრთელობის მდგომარეობის გაუარესება სამედიცინო პერსონალის არასწორმა ჩარევამ გამოიწვია. მისივე თქმით, პაციენტი იმ დროისთვის სტაციონარში მკურნალობდა. დეპარტამენტი, ფაქტიურად საკითხის შესწავლას ასრულებდა, როდესაც ბავშვი გარდაიცვალა, ამიტომ კომისიამ მუშაობის ვადა გააგრძელა და იგი ადგილზე შემოწმებას ორშაბათს დაასრულებს, შემდეგ კი დოკუმენტაციას ექსპერტებს გადაუგზავნის.

როგორც ლადო კუპულაძემ განმარტა, ამ ეტაპზე ძირითადად დოკუმენტის გაფორმების წესებთან დაკავშირებული ხარვეზები გამოიკვეთა.

"ამ ეტაპზე, გარდა სამედიცინო დოკუმენტში გარკვეული ხარვეზებისა, რაც არ არის პირდაპირ კავშირში მკურნალობასთან, ბავშვის მდგომარეობასთან დაკავშირებული, სხვა რამეზე საუბარი არ შეგვიძლია, როცა ექსპერტები გააკეთებენ კლინიკურ შეფასებას, კარგად გამოიკვეთება რაღაც საკითხი პროფესიული პასუხისმგებლობის", - აღნიშნა ლადო კუპულაძემ.

მისივე თქმით, არ არის გამორიცხული, რომ ექიმის პროფესიული პასუხისმგებლობის საკითხი დადგეს.

მცირეწლოვანი ბავშვი 25 აპრილს გარდაიცვალა.

იაშვილის კლინიკაში გარდაცვლილი ბავშვის, დავით ვეფხვაძის ახლობლებსა და კლინიკის ექიმებს შორის დღეს სიტყვიერი დაპირისპირება მოხდა.

როგორც ოჯახის ახლობლები აცხადებენ, ისინი არ ეთანხმებიან ექიმების განცხადებას, რომ ბავშვს თანდაყოლილი პათოლოგიური დაავადება ჰქონდა. მათი განცხადებით, ბავშვის მკურნალმა ექიმმა, იაშვილის კლინიკის პროფესორმა, რესპირატორული მედიცინის დეპარტამენტის ხელმძღვანელმა პაატა გვეტაძემ ოჯახს ფორმა 100 არ მისცა, რომ ბავშვი კლინიკიდან გაეყვანათ და სამკურნალოდ ისრაელში გადაეყვანათ.

"ინტერპრესნიუსი"