17
ივლისიდღის ზოგადი ასტროლოგიური პროგნოზი
მწერალი ზურაბ ქარუმიძე მისი პიროვნებისა და რომანის "მელია ტულეფიას" გამო ატეხილ სკანდალს გამოეხმაურა. მისი თქმით, რომანი არასწორად გაიგეს.
"აშკარად გაუგებრობას აქვს ადგილი, რომანისა, როგორც მხატვრული, მეტაფორული ტექსტისა, მოკლედ მოვყვები, საიდან დაიწყო ამ რომანზე ფიქრი. ეს ნაღდი ამბავია: 1926 წელს საქართველოში ჩამოვიდა ამერიკელი ბიზნესმენი მეუღლითურთ და იმოგზაურა, მათ შორის, სვანეთშიც, ეს მოგზაურობა აღწერილია კინოკამერით. ამ ამერიკელის მემუარებში ნახსენებია ქართველი კაცი, ვინმე შაქრო, რომელიც მე გამოვიყვანე ჩემი რომანის ცენტრალურ პერსონაჟად, გვარი შევუცვალე- კარმელი, ის ცოტა ექსცენტრიული პიროვნებაა, კომიკურიც არის და ტრაგიკულიც, რაღაც ხილვები აქვს და ა.შ.. რომანი იწყება ამ შაქროს სიზმრით და სწორედ აი ეს სიზმარია, რომელიც იწვევს გაუგებრობას და თავისებურ აგრესიაც კი ამ რომანის მიმართ. ამ სიზმარში აღწერილია ნაყოფიერების რიტუალი "მელია ტულეფია", რომელიც მე პირველად ამოვიკითხე ივანე ჯავახიშვილის ძალიან ცნობილ ნაშრომში "ქართველთა წარმართობა", სადაც აღწერილია ეს რიტუალი, უარქაულესი რიტუალია... შემდგომში, ეთნოგრაფების და ეთნოლოგების მოსაზრებებით გამოჩნდა, რომ ეს არის ძველი ხეთური რიტუალი, რომელიც შემორჩა სვანეთში. მოგეხსენებათ, ნაყოფიერების რიტუალი შემორჩენილია ფალიკურ ამბებთან და ამ რიტუალში სიმბოლურად ეს ყველაფერი თამაშდება.. სწორედ ეს რიტუალი ხსნის რომანს, რომელიც ესიზმრება ჩემს პერსონაჟს იმიტომ, რომ მას ძალიან უყვარს სვანეთი... თვითონ რომანი გაჯერებულია სვანეთისადმი დიდი სიყვარულით და აღტაცებით", - აცხადებს ქარუმიძე გამომცემლობა "სიესტასთვის" მიცემულ კომენტარში.
სკანდალის წინაისტორია ასეთია: დეპუტატმა სოსო ჯაჭვლიანმა ეს რომანი სვანეთის შეურაცხყოფად შეაფასა ქარუმიძის შესაძლო ელჩობა დიდ ბრიტანეთში ასე გააპროტესტა: "ქარუმიძეს ყოველ მეორე სიტყვაზე ფალოსი აკერია პირზე, ეტყოდა, თვითონაც გაფალოსდა და ფალოსს შეიძლება რამეზე ვეკამათო? ქარუმიძე არის ფალოსი და ჩემი ეს შეფასება გადამოწმებას არ ექვემდებარება".. ორიოდე დღის წინ კი პარლამენტის იურიდიული კომიტეტის სხდომაზე მოქალაქე გიორგი ხასაია შეიპარა და სანამ დეპუტატები "გონს მოეგებოდნენ" ამ რომანიდან სკაბრეზული, უცენზური სიტყვებით გაჯერებული ციტატა წაიკითხა.
/>ნინო კვიტაშვილი
